ರದ್ದು ಮಾಡಿದ ನೋಟು ಬದಲಾಯಿಸುವುದಕ್ಕಾಗಿ ಫೋನ್ ಮಾಡಿ ₹48,000 ಕಳೆದುಕೊಂಡರು!

ಮುಂಬೈ: ಮುಂಬೈಯ ಮಲಾಡ್ ನಿವಾಸಿಯೊಬ್ಬರು ರದ್ದು ಮಾಡಿದ ನೋಟುಗಳನ್ನು ಬದಲಿಸುವುದಕ್ಕಾಗಿ ಗೂಗಲಿಸಿ ಸಿಕ್ಕಿದ ರಿಸರ್ವ್ ಬ್ಯಾಂಕ್ ಆಫ್ ಇಂಡಿಯಾ ಸಹಾಯವಾಣಿಗೆ ಕರೆ ಮಾಡಿ ₹48,000 ಕಳೆದುಕೊಂಡ ಘಟನೆ ವರದಿಯಾಗಿದೆ.

ಕಳೆದ ತಿಂಗಳು ಮುಂಬೈನಲ್ಲಿ ವಿಜಯ್ ಕುಮಾರ್ ಮರ್ವಾ (74) ಎಂಬ ವ್ಯಕ್ತಿ ಮನೆ ಸ್ವಚ್ಛಗೊಳಿಸುವಾಗ₹7,000 ಮೌಲ್ಯದ ರದ್ದಾದ ನೋಟುಗಳು ಸಿಕ್ಕಿದ್ದವು.ಈ ನೋಟುಗಳನ್ನು ಬದಲಿಸುವುದಕ್ಕಾಗಿ ಮರ್ವಾ ಆರ್‌ಬಿಐ ಸಹಾಯವಾಣಿಗಾಗಿ ಗೂಗಲಿಸಿ, ಅಲ್ಲಿ ಸಿಕ್ಕಿದ ನಂಬರ್‌ಗೆ ಕರೆ ಮಾಡಿದ್ದಾರೆ.

ಆ ಕಡೆಯಿಂದ ಕರೆ ಸ್ವೀಕರಿಸಿದ ವ್ಯಕ್ತಿ ರದ್ದಾದ ನೋಟುಗಳನ್ನು ಆರ್‌ಬಿಐ ಕಚೇರಿಗೆ ತಲುಪಿಸುವುದಾಗಿ ಹೇಳಿ, ಮರ್ವಾ ಅವರ ಬ್ಯಾಂಕ್ ಮಾಹಿತಿ ಕೇಳಿದ್ದಾರೆ.ರದ್ದಾದ ನೋಟುಗಳನ್ನು ಬದಲಿಸಿ ಆ ಹಣವನ್ನು ನಿಮ್ಮ ಖಾತೆಯಲ್ಲಿ ನಿಕ್ಷೇಪ ಮಾಡಲು ಬ್ಯಾಂಕ್ ಮಾಹಿತಿ ನೀಡಿ ಎಂದು ಹೇಳಿ ಕ್ರೆಡಿಟ್ ಕಾರ್ಡ್ ವಿವರಗಳನ್ನು ಕೇಳಿದ್ದಾರೆ.ಅಷ್ಟೇ ಅಲ್ಲದೆ ಕ್ರೆಡಿಟ್ ಕಾರ್ಡ್ ನ OTP ಕೂಡಾ ಕೇಳಿ ಪಡೆದುಕೊಂಡ ಆ ವ್ಯಕ್ತಿ ಕ್ಷಣ ಮಾತ್ರದಲ್ಲಿ ಮರ್ವಾ ಅವರ ಬ್ಯಾಂಕ್ ಖಾತೆಯಿಂದ ₹48,000 ಹಣ ವಿತ್ ಡ್ರಾ ಮಾಡಿದ್ದಾರೆ.

ತಾನು ಮೋಸ ಹೋಗಿದ್ದು ತಿಳಿದ ಕೂಡಲೇ ಮರ್ವಾ ಅವರು ಮಲಾಡ್ ಪೊಲೀಸರನ್ನು ಸಂಪರ್ಕಿಸಿದ್ದಾರೆ. ಜನವರಿ 6 ರಂದು ಈ ಪ್ರಕರಣ ಬಗ್ಗೆ ಎಫ್‍ಐಆರ್ ದಾಖಲಿಸಲಾಗಿದೆ.

ಕೆಲವು ಮೋಸಗಾರರು ಹಣಕಾಸು ಸಂಸ್ಥೆಯ ಹೆಸರಿನಲ್ಲಿ ತಮ್ಮ ನಂಬರ್‍‍ಗಳನ್ನು ನೀಡಿ ಜನರನ್ನು ಮೋಸ ಮಾಡುತ್ತಿದ್ದಾರೆ ಎಂದು ತಜ್ಞರು ಹೇಳಿದ್ದಾರೆ.

ಈ ಪ್ರಕರಣ ಬಗ್ಗೆ ಪ್ರತಿಕ್ರಿಯಿಸಿದ ಮಹರಾಷ್ಟ್ರದ ಪೊಲೀಸ್ ಅಧಿಕಾರಿ (ಸೈಬರ್ ವಿಭಾಗ) ಬಾಲ್‍ಸಿಂಗ್, ಸೈಬರ್ ವಂಚಕರು ಈ ರೀತಿಯ ಮೋಸ ಮಾಡುತ್ತಿದ್ದಾರೆ. ಸಹಾಯವಾಣಿ ಸಂಖ್ಯೆ ಪ್ರಕಟಿಸುವಾಗ ಅದು ನಿಜವಾದುದು ಹೌದೋ ಅಲ್ಲವೋ ಎಂಬುದನ್ನು ಸರ್ಚ್ ಇಂಜಿನ್‍ಗಳು ದೃಢೀಕರಿಸಬೇಕು.ಈ ರೀತಿಯ ಫಿಶಿಂಗ್, ವಿಶಿಂಗ್ ಮತ್ತು ಸ್ಪಾಮ್ ಪ್ರಕರಣಗಳನ್ನು ತಡೆಯಲು ಫಿಶಿಂಗ್ ನಿಗ್ರಹ ತಂಡವನ್ನು ರೂಪಿಸಲು ನಾವು ಚಿಂತಿಸಿದ್ದೇವೆ ಎಂದಿದ್ದಾರೆ.