ಶಬರಿಮಲೆ: ಆಂಬುಲೆನ್ಸ್‌ನಲ್ಲೇ ಶವ ಸಾಗಿಸಲು ನಿರ್ದೇಶನ
ಕೊಚ್ಚಿ: ಶಬರಿಮಲೆ ಸನ್ನಿಧಾನಕ್ಕೆ ತೀರ್ಥಯಾತ್ರೆ ಮಾಡುವಾಗ ಸಾವನ್ನಪ್ಪಿದ ಭಕ್ತರ ಮೃತದೇಹಗಳನ್ನು ಸ್ಟ್ರೆಚರ್‌ಗಳ ಮೇಲೆ ಪಂಪಾಕ್ಕೆ ಸಾಗಿಸಿದ್ದಕ್ಕೆ ಕೇರಳ ಹೈಕೋರ್ಟ್‌ ಆಘಾತ ವ್ಯಕ್ತಪಡಿಸಿದೆ. ಈ ವ್ಯವಸ್ಥೆಯನ್ನು ತಕ್ಷಣವೇ ಸ್ಥಗಿತಗೊಳಿಸಿ ಸ್ಟ್ರೆಚರ್‌ ಬದಲು ಆಂಬುಲೆನ್ಸ್‌ಗಳನ್ನು ಬಳಸುವಂತೆ ನಿರ್ದೇಶನ ನೀಡಿದೆ.
ಚಾರಣ ಮಾರ್ಗದಲ್ಲಿ ಇತರ ಭಕ್ತರಿಗೆ ತೊಂದರೆಯಾಗದಂತೆ ಹಾಗೂ ಮೃತರ ಘನತೆ ಮತ್ತು ಗೌರವವನ್ನು ಖಚಿತಪಡಿಸಿಕೊಳ್ಳಲು ಆಂಬುಲೆನ್ಸ್‌ ಬಳಸಬೇಕೆಂದು ಪೀಠವು ಹೇಳಿದೆ.
ಯಾತ್ರೆಯ ಸಮಯದಲ್ಲಿ ಹೃದಯಾಘಾತದಿಂದ ಸಾವಿಗೀಡಾಗುವ ಭಕ್ತರ ಮೃತದೇಹಗಳನ್ನು ಸ್ಟ್ರೆಚರ್‌ ಮೂಲಕ ಪಂಪಾಕ್ಕೆ ಸಾಗಿಸಲಾಗುತ್ತದೆ. ಇದಕ್ಕೆ ಆಂಬುಲೆನ್ಸ್‌ಗಳ ಅಗತ್ಯತೆಯನ್ನು ಎತ್ತಿ ತೋರಿಸುವ, ಶಬರಿಮಲೆ ವಿಶೇಷ ಆಯುಕ್ತರ ವರದಿಯನ್ನು ಅನುಸರಿಸಿ ನ್ಯಾಯಮೂರ್ತಿಗಳಾದ ರಾಜಾ ವಿಜಯರಾಘವನ್‌. ವಿ ಹಾಗೂ ಕೆ.ವಿ. ಜಯಕುಮಾರ್ ಅವರಿದ್ದ ಪೀಠವು ಈ ನಿರ್ದೇಶನ ನೀಡಿತು.
ಸ್ಟ್ರೆಚರ್‌ ಬಳಸುವ ಅಭ್ಯಾಸವು ಮೃತರ ಸಂಬಂಧಿಗಳು ಹಾಗೂ ಇತರ ಯಾತ್ರಿಕರ ಮೇಲೆ ನಕಾರಾತ್ಮಕ ಪರಿಣಾಮ ಬೀರುತ್ತದೆ. ಪಂಪಾದಲ್ಲಿ ಹಳೆಯ ಆಂಬುಲೆನ್ಸ್‌ಗಳಿದ್ದು, ಅವನ್ನು ಬಳಸಬಹುದು ಎಂದೂ ಆಯುಕ್ತರು ಪೀಠಕ್ಕೆ ತಿಳಿಸಿದರು.
ಪ್ರಜಾವಾಣಿ ಆ್ಯಪ್ ಇಲ್ಲಿದೆ: ಆಂಡ್ರಾಯ್ಡ್ | ಐಒಎಸ್ | ವಾಟ್ಸ್ಆ್ಯಪ್, ಎಕ್ಸ್, ಫೇಸ್‌ಬುಕ್ ಮತ್ತು ಇನ್‌ಸ್ಟಾಗ್ರಾಂನಲ್ಲಿ ಪ್ರಜಾವಾಣಿ ಫಾಲೋ ಮಾಡಿ.