ಮಸೀದಿಯಲ್ಲಿ ಹಿಂದೂ ಜೋಡಿ ಮದುವೆ

ಅಲೆಪ್ಪಿ (ಕೇರಳ): ಮಸೀದಿಯೊಂದರಲ್ಲಿ ಹಿಂದೂ ಜೋಡಿಯ ಮದುವೆಗೆ ಅವಕಾಶ ಕಲ್ಪಿಸುವ ಮೂಲಕ ಇಲ್ಲಿಗೆ ಸಮೀಪದ ಚೆರುವಲ್ಲಿಯ ಮುಸ್ಲಿಂ ಜಮಾತ್‌ ಸೌಹಾರ್ದ ಮೆರೆದಿದೆ.

ವಧು–ವರರಾದ ಅಂಜು ಮತ್ತು ಶರತ್‌ ಪರಸ್ಪರ ಹಾರ ಬದಲಾಯಿಸಿಕೊಂಡರಲ್ಲದೇ, ಹಿಂದೂ ಸಂಪ್ರದಾಯದಂತೆ ಎಲ್ಲ ಧಾರ್ಮಿಕ ವಿಧಿಗಳನ್ನು ನೆರವೇರಿಸಿ ಸಪ್ತಪದಿ ತುಳಿದರು. ಈ ಮದುವೆಗೆ ಅವರಿಬ್ಬರ ಬಂಧು–ಮಿತ್ರರಲ್ಲದೇ ಮುಸ್ಲಿಮರು ಸಹ ಸಾಕ್ಷಿಯಾದರು. ಮಸೀದಿ ಆವರಣದಲ್ಲಿಯೇ ಸಸ್ಯಾಹಾರಿ ಭೋಜನದ ವ್ಯವಸ್ಥೆಯನ್ನೂ ಮಾಡಲಾಗಿತ್ತು.

ನವಜೋಡಿಗೆ ಮಸೀದಿ ಆಡಳಿತ ಮಂಡಳಿ 8 ಸವರನ್‌ ಚಿನ್ನವನ್ನು ಉಡುಗೊರೆಯಾಗಿ ನೀಡಿದೆ.

‘ವಧು ಅಂಜು ಅವರ ಮನೆಯವರು ಮದುವೆಯ ಖರ್ಚು ಭರಿಸದಷ್ಟು ಬಡವರಾಗಿದ್ದಾರೆ. ಹೀಗಾಗಿ ಅವರ ಕಷ್ಟಕ್ಕೆ ಸ್ಪಂದಿಸಿ, ಈ ಮದುವೆಗೆ ವ್ಯವಸ್ಥೆ ಮಾಡಿರುವುದಾಗಿ’ ಮಸೀದಿಯ ಆಡಳಿತ ಮಂಡಳಿ ಹೇಳಿದೆ.