ಹೈದರಾಬಾದ್: ವಿದೇಶಿಯರ ನಿಯೋಗ ಭೇಟಿ

ಹೈದರಾಬಾದ್: ಹೈದರಾಬಾದ್‌ನಲ್ಲಿನ ಭಾರತ್ ಬಯೊಟೆಕ್ ಮತ್ತು ಬಯೊಲಾಜಿಕಲ್ ಇ ಲಿಮಿಟೆಡ್‌ನ ಲಸಿಕೆ ಅಭಿವೃದ್ಧಿ ಪ್ರಯೋಗಾಲಯಗಳಿಗೆ64 ದೇಶಗಳ 70ಕ್ಕೂ ಹೆಚ್ಚು ಪ್ರತಿನಿಧಿಗಳ ನಿಯೋಗವು ಭೇಟಿ ನೀಡಿದೆ. ಲಸಿಕೆ ಅಭಿವೃದ್ಧಿ ಮತ್ತು ಲಸಿಕೆ ತಯಾರಿಕೆ ಪ್ರಕ್ರಿಯೆ ಮತ್ತು ಸಾಮರ್ಥ್ಯವನ್ನು ಈ ನಿಯೋಗದ ಸದಸ್ಯರು ಪರಿಶೀಲಿಸಿದ್ದಾರೆ.

64 ದೇಶಗಳ ರಾಜತಾಂತ್ರಿಕ ಅಧಿಕಾರಿಗಳು ಮತ್ತು ತಜ್ಞರು ಈ ನಿಯೋಗದಲ್ಲಿ ಇದ್ದರು. ಭಾರತದ ವಿದೇಶಾಂಗ ವ್ಯವಹಾರಗಳ ಸಚಿವಾಲಯವು ಈ ಭೇಟಿಯನ್ನು ಆಯೋಜಿಸಿತ್ತು. ಭಾರತ್ ಬಯೊಟೆಕ್‌ ಕಂಪನಿಯು ತನ್ನ ಲಸಿಕೆ ತಯಾರಿಕಾ ಘಟಕಗಳ ಸಾಮರ್ಥ್ಯದ ಬಗ್ಗೆ ನಿಯೋಗದ ಸದಸ್ಯರಿಗೆ ಪ್ರಾತ್ಯಕ್ಷಿಕೆ ನೀಡಿದೆ.

ವಿಶ್ವದಲ್ಲಿ ತಯಾರಾಗುವ ಒಟ್ಟು ಲಸಿಕೆಗಳಲ್ಲಿ ಶೇ 30ರಷ್ಟು ಹೈದರಾಬಾದ್‌ನಲ್ಲೇ ತಯಾರಾಗುತ್ತಿವೆ ಎಂದು ತೆಲಂಗಾಣ ಆರೋಗ್ಯ ಇಲಾಖೆಯು ನಿಯೋಗಕ್ಕೆ ಮನವರಿಕೆ ಮಾಡಿಕೊಟ್ಟಿದೆ.