ನಾರಿಯರಿಗೆ ನಗದು ಯೋಜನೆ; ರಾಜ್ಯಗಳ ಬೊಕ್ಕಸಕ್ಕೆ ಹೊರೆ: PRS ವರದಿ

ನವದೆಹಲಿ: ‘ಮಹಿಳೆಯರಿಗೆ ಪ್ರತಿ ತಿಂಗಳು ಅವರ ಖಾತೆಗಳಿಗೆ ನೇರ ನಗದು ವರ್ಗಾವಣೆ ಮಾಡುವ ಯೋಜನೆಗಾಗಿ ದೇಶದ 12 ರಾಜ್ಯಗಳು 2025–26ನೇ ಆರ್ಥಿಕ ವರ್ಷದಲ್ಲಿ ಒಟ್ಟು ₹1.68 ಲಕ್ಷ ಕೋಟಿ ಖರ್ಚು ಮಾಡಲಿವೆ. ಇದರಿಂದ ಕರ್ನಾಟಕವೂ ಸೇರಿ 6 ರಾಜ್ಯಗಳಲ್ಲಿ ಆದಾಯ ಕೊರತೆ ತಲೆದೋರಲಿದೆ’ ಎಂದು ಪಿಆರ್‌ಎಸ್‌ ಲೆಜಿಸ್ಲೇಟಿವ್‌ ರಿಸರ್ಚ್‌ ತನ್ನ ಅಧ್ಯಯನ ವರದಿಯಲ್ಲಿ ಅಂದಾಜಿಸಿದೆ.

‘2021–22ನೇ ಆರ್ಥಿಕ ವರ್ಷದಲ್ಲಿ ಮಹಿಳೆಯರ ಖಾತೆಗಳಿಗೆ ಹಣ ವರ್ಗಾವಣೆ ಮಾಡುತ್ತಿದ್ದ ರಾಜ್ಯಗಳ ಸಂಖ್ಯೆ 2 ಇತ್ತು. ಈಗ ಈ ಸಂಖ್ಯೆ 12ಕ್ಕೆ ಏರಿಕೆ. ಮಹಿಳೆಯರಿಗೆ ಹಣ ನೀಡುತ್ತಿರುವುದರಿಂದ ರಾಜ್ಯಗಳ ಮೇಲೆ ಹಣಕಾಸಿನ ಒತ್ತಡ ನಿರ್ಮಾಣವಾಗಿದೆ. ಮಹಿಳೆಯರಿಗೆ ಹಣ ನೀಡುವುದನ್ನು ಕಡಿತ ಮಾಡಿದ ರಾಜ್ಯಗಳಲ್ಲಿ ವಿತ್ತೀಯ ಆರೋಗ್ಯ ಸೂಚಕಗಳಲ್ಲಿ ಸುಧಾರಣೆ ಕಂಡುಬಂದಿದೆ’ ಎಂದು ವರದಿಯಲ್ಲಿ ಹೇಳಲಾಗಿದೆ.

‘ಮಹಿಳೆಯರಿಗೆ ಹಣ ನೀಡುವುದಕ್ಕೂ ಮೊದಲು ಕರ್ನಾಟಕದಲ್ಲಿ ಶೇ 0.3ರಷ್ಟು ಮಿಗತೆ ವರಮಾನ. ಈಗ ಶೇ 0.6ರಷ್ಟು ಆದಾಯ ಕೊರತೆಗೆ ಬಂದು ನಿಂತಿದೆ. ಮಧ್ಯ ಪ್ರದೇಶದಲ್ಲಿಯೂ ಹೀಗೆಯೇ ಆಗಿದೆ. ಈ ರಾಜ್ಯದಲ್ಲಿ ಶೇ 1.1ರಷ್ಟು ಮಿಗತೆ ವರಮಾನವಿತ್ತು. ಈಗ ಶೇ 0.4ರಷ್ಟು ಆದಾಯ ಕೊರತೆಯನ್ನು ಎದುರಿಸುತ್ತಿದೆ’ ಎಂದಿದೆ.