ಕೊರೊನಾ ನಿಯಮ ಉಲ್ಲಂಘನೆ: ₹2.85 ಕೋಟಿ ದಂಡ ಸಂಗ್ರಹ

ಬೆಂಗಳೂರು: ಅಂತರ ಕಾಯ್ದುಕೊಳ್ಳದಿರುವುದು ಹಾಗೂ ಮಾಸ್ಕ್‌ ಧರಿಸದವರ ವಿರುದ್ಧಏ.1ರಿಂದ ಮೇ 4ರವರೆಗೆ ನಗರ ಪೊಲೀಸರು ನಡೆಸಿದ ಕಾರ್ಯಾಚರಣೆ ವೇಳೆ ಒಟ್ಟು ₹2.85 ಕೋಟಿ ದಂಡ ಸಂಗ್ರಹವಾಗಿದೆ.

ಈ ಅವಧಿಯಲ್ಲಿ ಮಾಸ್ಕ್‌ ಧರಿಸದವರ ವಿರುದ್ಧ ಒಟ್ಟು 1,07,272 ಪ್ರಕರಣಗಳು ಹಾಗೂ ಅಂತರ ಕಾಯ್ದುಕೊಳ್ಳುವ ನಿಯಮ ಉಲ್ಲಂಘಿಸಿದವರ ವಿರುದ್ಧ 11,107 ಪ್ರಕರಣ ಸೇರಿದಂತೆ ಒಟ್ಟು 1,18,379 ಪ್ರಕರಣಗಳು ದಾಖಲಾಗಿವೆ.

ಮಾಸ್ಕ್‌ ಧರಿಸದವರಿಂದ ₹2,59,50,013 ಹಾಗೂ ಅಂತರ ಕಾಯ್ದುಕೊಳ್ಳದವರಿಂದ ₹25,75,283 ಸೇರಿದಂತೆ ಒಟ್ಟು ₹2,85,25,297 ದಂಡ ಸಂಗ್ರಹಿಸಲಾಗಿದೆ ಎಂದು ಪ್ರಕಟಣೆ ತಿಳಿಸಿದೆ.

577 ವಾಹನ ಜಪ್ತಿ: ಕೊರೊನಾ ಕರ್ಫ್ಯೂ ವೇಳೆ ಅನಗತ್ಯವಾಗಿ ಸಂಚರಿಸುತ್ತಿದ್ದ 577 ವಾಹನಗಳನ್ನು ಪೊಲೀಸರು ಬುಧವಾರ ಜಪ್ತಿ ಮಾಡಿದ್ದಾರೆ. 546 ದ್ವಿಚಕ್ರ ವಾಹನ, 16 ತ್ರಿಚಕ್ರ ವಾಹನ, 15 ನಾಲ್ಕು ಚಕ್ರದ ವಾಹನಗಳನ್ನು ಜಪ್ತಿ ಮಾಡಲಾಗಿದೆ. ಎನ್‌ಡಿಎಂಎ ಕಾಯ್ದೆಯಡಿ ಏಳು ಪ್ರಕರಣಗಳು ದಾಖಲಾಗಿವೆ.