ಕೇಂದ್ರದ ಜನ ಗಣತಿಗೆ ಕಾನೂನು ಮಾನ್ಯತೆ: ರಾಧಾ ಮೋಹನದಾಸ್‌ ಅಗರವಾಲ್‌

ಬೆಂಗಳೂರು: ‘ರಾಜ್ಯ ಸರ್ಕಾರಗಳು ಜಾತಿ ಗಣತಿ ನಡೆಸಿದರೆ, ಅದಕ್ಕೆ ಕಾನೂನಿನ ಮಾನ್ಯತೆ ಇಲ್ಲ. ಕೇಂದ್ರ ಸರ್ಕಾರ ನಡೆಸುವ ಗಣತಿಯೇ ಅಧಿಕೃತ ಮತ್ತು ಅದಕ್ಕೆ ಕಾನೂನಿನ ಮಾನ್ಯತೆ ಇದೆ ’ ಎಂದು ಬಿಜೆಪಿ ರಾಜ್ಯ ಘಟಕದ ಉಸ್ತುವಾರಿ ರಾಧಾ ಮೋಹನದಾಸ್‌ ಅಗರವಾಲ್‌ ಅವರು ಹೇಳಿದ್ದಾರೆ.

‘ಹೀಗಾಗಿ ರಾಜ್ಯ ಸರ್ಕಾರಗಳು ಜಾತಿ ಗಣತಿ ಮಾಡಿಸಿ ವರದಿ ಪಡೆಯುವುದರಿಂದ ಏನು ಮಾಡಲು ಸಾಧ್ಯವಿಲ್ಲ ಎಂಬುದು ಜನರಿಗೂ ಗೊತ್ತಿದೆ’ ಎಂದು ಅವರು ಸುದ್ದಿಗಾರರ ಪ್ರಶ್ನೆಗೆ ಪ್ರತಿಕ್ರಿಯಿಸಿದರು.

‘ಆದ ಕಾರಣ ಜನಗಣತಿಯೊಂದಿಗೆ ಜಾತಿ ಗಣತಿ ನಡೆಸಲು ಕೇಂದ್ರ ಸರ್ಕಾರ ನಿರ್ಧರಿಸಿದೆ. ಕೇಂದ್ರ ನಡೆಸುವ ಗಣತಿಯೇ ಎಲ್ಲದಕ್ಕೂ ಪರಿಹಾರ. ಕಾನೂನು ಪ್ರಕಾರ ಮಾನ್ಯತೆಯೂ ಇದೆ. ಕೇಂದ್ರ ನಡೆಸುವ ಗಣತಿ ಹಾಲು ಇದ್ದಂತೆ, ರಾಜ್ಯಗಳು ನಡೆಸುವ ಗಣತಿ ನೀರು ಇದ್ದಂತೆ. ಹಾಲಿನದು ಹಾಲಿಗೆ, ನೀರಿನದು ನೀರಿಗೆ ಆಗಿ ಹೋಗಲಿ’ ಎಂದು ಅವರು ಸ್ಪಷ್ಟಪಡಿಸಿದರು.