110 ಕಿ.ಮೀ ವರ್ಷಾಸನ ಮಾದರಿ ರಸ್ತೆಗೆ ಅನುಮೋದನೆ

ಬೆಂಗಳೂರು: ದೇವನಹಳ್ಳಿಯಿಂದ ತಮಿಳುನಾಡು ಗಡಿವರೆಗೆ 110.40 ಕಿ.ಮೀ ಹೈಬ್ರಿಡ್‌ ವರ್ಷಾಸನ ಮಾದರಿಯಲ್ಲಿ (ಎಚ್‌ಎಎಂ) ರಸ್ತೆ ಅಭಿವೃದ್ಧಿಪಡಿಸಲು ಸಚಿವ ಸಂಪುಟ ಸಭೆ ಒಪ್ಪಿಗೆ ನೀಡಿದ್ದು, ಇದಕ್ಕೆ ₹3,190 ಕೋಟಿ ವೆಚ್ಚವಾಗಲಿದೆ.

ಕಾನೂನು ಸಚಿವ ಎಚ್‌.ಕೆ.ಪಾಟೀಲ ಅವರು ಸುದ್ದಿಗೋಷ್ಠಿಯಲ್ಲಿ ಈ ಕುರಿತು ವಿವರ ನೀಡಿದರು.‌

ರಸ್ತೆಯು ದೇವನಹಳ್ಳಿ, ವಿಜಯಪುರ,ಎಚ್‌.ಕ್ರಾಸ್‌, ವೇಮಗಲ್‌, ಮಾಲೂರು ಮೂಲಕ ತಮಿಳುನಾಡು ಗಡಿಯನ್ನು ಸಂಪರ್ಕಿಸಲಿದೆ.  ಈ ಪ್ರಸ್ತಾವಕ್ಕೆ ಆಡಳಿತಾತ್ಮಕ ಅನುಮೋದನೆ ನೀಡಲಾಗಿದೆ ಎಂದರು.

ಪ್ಯಾಕೇಜ್‌ 1– ವೇಮಗಲ್‌, ಮಾಲೂರು ಮತ್ತು ಕೈಗಾರಿಕಾ ಪ್ರದೇಶದಿಂದ ತಮಿಳುನಾಡು ಗಡಿವರೆಗೆ, ₹958 ಕೋಟಿ (ಕೆಶಿಪ್‌)

ಪ್ಯಾಕೇಜ್‌ 2– ಹೊಸಕೋಟೆ–ಮಾಲೂರು, ಮಾಲೂರಿನಲ್ಲಿ ಎಲಿವೇಟೆಡ್‌ ಕಾರಿಡಾರ್‌ ಸೇರಿ ಮಾಲೂರು ಕೈಗಾರಿಕಾ ಪ್ರದೇಶ ಒಳಗೊಂಡಿದೆ, ಇದರ ವೆಚ್ಚ ₹1054 ಕೋಟಿ (ಕೆಶಿಪ್)

ಪ್ಯಾಕೇಜ್‌ 3– ದೇವನಹಳ್ಳಿ– ವೇಮಗಲ್‌–ಕೋಲಾರ. ಇದರ ವೆಚ್ಚ ₹1178 ಕೋಟಿ (ಕೆಆರ್‌ಡಿಸಿಎಲ್‌)

ಪೊಲೀಸ್ ಭವನ ನಿರ್ಮಾಣ:

ಬೆಂಗಳೂರಿನ ಜನರಲ್‌ ಕೆ.ಎಸ್‌.ತಿಮ್ಮಯ್ಯ ರಸ್ತೆಯಲ್ಲಿನ ಕೆಎಸ್‌ಆರ್‌ಪಿ 1ನೇ ಪಡೆಯ ಆವರಣದಲ್ಲಿ ಪೊಲೀಸ್‌ ಇಲಾಖೆ ಸೆಂಟ್ರಲ್‌ ಕಮಾಂಡ್‌ ಸೆಂಟರ್‌ ಒಳಗೊಂಡಂತೆ ಪೊಲೀಸ್‌ ಭವನ ನಿರ್ಮಾಣಕ್ಕೆ ₹102.80 ಕೋಟಿ ಪರಿಷ್ಕೃತ ಅಂದಾಜು ವೆಚ್ಚಕ್ಕೆ ಒಪ್ಪಿಗೆ ನೀಡಲಾಗಿದೆ.

ಈಕ್ವಿಟಿ ಷೇರು ಹೆಚ್ಚಳ:

ಬೆಂಗಳೂರು ಘನತ್ಯಾಜ್ಯ ನಿರ್ವಹಣಾ ನಿಯಮಿತದಲ್ಲಿ ರಾಜ್ಯ ಸರ್ಕಾರದ ಈಕ್ವಿಟಿ ಷೇರುಗಳ ಪ್ರಮಾಣವನ್ನು ಶೇ 49 ರಿಂದ ಶೇ 90 ಕ್ಕೆ ಹೆಚ್ಚಿಸಲು ಅನುಮೋದನೆ ನೀಡಲಾಗಿದೆ.

ಅಭಿಯೋಜಕರ ನೇಮಕಾತಿ:

ಲೋಕಾಯುಕ್ತಕ್ಕೆ 12 ಮಂದಿ ನಿವೃತ್ತ ಅಧಿಕಾರಿಗಳನ್ನು ಗುತ್ತಿಗೆ ಆಧಾರದ ಮೇಲೆ ನೇಮಕ ಮಾಡಲು ನಿರ್ಧರಿಸಲಾಗಿದೆ.