ಚೀನಾದಲ್ಲಿ ಸೇತುವೆ ಕುಸಿತ: 12 ಕಾರ್ಮಿಕರು ಸಾವು

ಬೀಜಿಂಗ್‌: ಚೀನಾದ ಪ್ರಮುಖ ನದಿಯೊಂದರಲ್ಲಿ ನಿರ್ಮಿಸಲಾಗುತ್ತಿದ್ದ ರೈಲ್ವೆ ಮೇಲುಸೇತುವೆ ಕುಸಿದು 12 ಕಾರ್ಮಿಕರು ಮೃತಪಟ್ಟಿದ್ದಾರೆ ಮತ್ತು ನಾಲ್ವರು ಕಾಣೆಯಾಗಿದ್ದಾರೆ ಎಂದು ಸರ್ಕಾರಿ ಒಡೆತನದ ಮಾಧ್ಯಮ ಷಿನ್‌ಹುವಾ ವರದಿ ಮಾಡಿದೆ.

ವಾಯವ್ಯ ಚೀನಾದ ಕಿಂಘೈ ಪ್ರಾಂತ್ಯದಲ್ಲಿ ಮುಂಜಾನೆ 3 ಗಂಟೆ ವೇಳೆಗೆ ಸೇತುವೆ ಮುರಿದುಬಿದ್ದಿದೆ. ಈ ವೇಳೆ 16 ಕಾರ್ಮಿಕರು ಸೇತುವೆ ಮೇಲೆ ಇದ್ದರು. ನಾಪತ್ತೆಯಾದವರು ಪತ್ತೆಗಾಗಿ ದೋಣಿ, ಹೆಲಿಕಾಪ್ಟರ್‌, ರೋಬೋಟ್‌ ಬಳಸಿ ಶೋಧ ಕಾರ್ಯಾಚರಣೆ ನಡೆಸಲಾಗುತ್ತಿದೆ.

ಸೇತುವೆಯು 1.6 ಕಿ.ಮೀ ಉದ್ದವಿದ್ದು, ನೀರಿನ ಮಟ್ಟದಿಂದ 55 ಮೀಟರ್‌ ಎತ್ತರದಲ್ಲಿದೆ ಎಂದು ಪತ್ರಿಕೆ ವರದಿ ಮಾಡಿದೆ.