ನೇಪಾಳದಲ್ಲಿ ಮಕ್ಕಳ ಅಪಹರಣ: ಭಾರತೀಯ ಯುವಕನ ಬಂಧನ

ಕಠ್ಮಂಡು: ದಕ್ಷಿಣ ನೇಪಾಳದ ಬಾರಾ ಜಿಲ್ಲೆಯಲ್ಲಿ ಇಬ್ಬರು ಮಕ್ಕಳನ್ನು ಅಪಹರಿಸಿ ಗೋಣಿಚೀಲದಲ್ಲಿ ಭಾರತಕ್ಕೆ ಸಾಗಿಸಲು ಯತ್ನಿಸಿದ ಆರೋಪದ ಮೇಲೆ 22 ವರ್ಷದ ಭಾರತೀಯ ಯುವಕನನ್ನು ಬಂಧಿಸಲಾಗಿದೆ ಎಂದು ಸೋಮವಾರ ಪೊಲೀಸರು ತಿಳಿಸಿದ್ದಾರೆ.

ಬಿಹಾರದ ನಿವಾಸಿ ತಬ್ರೇಜ್‌ ಆಲಂ ಎಂಬಾತ, ನೇಪಾಳ–ಭಾರತ ಗಡಿಯಲ್ಲಿರುವ ಬಾರಾ ಜಿಲ್ಲೆಯ ಅಮ್ವಾ ಗ್ರಾಮದಿಂದ ಒಂಬತ್ತು ತಿಂಗಳ ಹೆಣ್ಣು ಮಗು ಮತ್ತು ಎರಡು ವರ್ಷದ ಗಂಡು ಮಗುವನ್ನು ಗೋಣಿಚೀಲದಲ್ಲಿ ತುಂಬಿಕೊಂಡು ಹೋಗುತ್ತಿದ್ದ ವೇಳೆ ಭಾನುವಾರ ಬಂಧಿಸಲಾಗಿದೆ ಎಂದು ಸಶಸ್ತ್ರ ಪೊಲೀಸ್ ಪಡೆಯ ಹಿರಿಯ ಪೊಲೀಸ್ ವರಿಷ್ಠಾಧಿಕಾರಿ ರಾಜೇಂದ್ರ ಖಡ್ಕಾ ತಿಳಿಸಿದ್ದಾರೆ.

ಗೋಣಿಚೀಲದ ಒಳಗಿಂದ ಮಕ್ಕಳು ಅಳುತ್ತಿದ್ದದ್ದನ್ನು ಕೇಳಿಸಿಕೊಂಡ ನಂತರ ಅರೆಸೇನಾಪಡೆಯ ತಂಡವು ಆಲಂನನ್ನು ಬಂಧಿಸಿತು. ಮಕ್ಕಳನ್ನು ರಕ್ಷಿಸಿ, ಅವರನ್ನು ಕುಟುಂಬದವರಿಗೆ ಹಸ್ತಾಂತರಿಸಲಾಗಿದೆ ಎಂದು ಖಡ್ಕಾ ತಿಳಿಸಿದ್ದಾರೆ.