ADVERTISEMENT

ಶ್ರೀಲಂಕಾ ಪ್ರಧಾನಿಯಾಗಿ ಮಹಿಂದಾ ರಾಜಪಕ್ಸ ಅಧಿಕಾರ ಸ್ವೀಕಾರ

ಪಿಟಿಐ
Published 9 ಆಗಸ್ಟ್ 2020, 6:48 IST
Last Updated 9 ಆಗಸ್ಟ್ 2020, 6:48 IST
ಶ್ರೀಲಂಕಾದ ನೂತನ ಪ್ರಧಾನಿಯಾಗಿ ಭಾನುವಾರ ಅಧಿಕಾರ ಸ್ವೀಕರಿಸಿದ ಮಹಿಂದಾ ರಾಜಪಕ್ಸ (ಎಡಬದಿ) ಹಾಗೂ ಅವರಿಗೆ ಪ್ರತಿಜ್ಞಾವಿಧಿ ಬೋಧಿಸಿದ ಅಧ್ಯಕ್ಷ ಗೋಟಬಯ ರಾಜಪಕ್ಸ ಅವರು ಪರಸ್ಪರ ನಮಸ್ಕರಿಸಿದರು 
ಶ್ರೀಲಂಕಾದ ನೂತನ ಪ್ರಧಾನಿಯಾಗಿ ಭಾನುವಾರ ಅಧಿಕಾರ ಸ್ವೀಕರಿಸಿದ ಮಹಿಂದಾ ರಾಜಪಕ್ಸ (ಎಡಬದಿ) ಹಾಗೂ ಅವರಿಗೆ ಪ್ರತಿಜ್ಞಾವಿಧಿ ಬೋಧಿಸಿದ ಅಧ್ಯಕ್ಷ ಗೋಟಬಯ ರಾಜಪಕ್ಸ ಅವರು ಪರಸ್ಪರ ನಮಸ್ಕರಿಸಿದರು    

ಕೊಲಂಬೊ: ಶ್ರೀಲಂಕಾದ ಪ್ರಧಾನಿಯಾಗಿ ಪುನರಾಯ್ಕೆಯಾದ 74 ವರ್ಷದ ಮಹಿಂದಾ ರಾಜಪಕ್ಸ ಭಾನುವಾರ ಇಲ್ಲಿನ ಐತಿಹಾಸಿಕ ಬೌದ್ಧ ದೇಗುಲದಲ್ಲಿ ಪ್ರಮಾಣವಚನ ಸ್ವೀಕರಿಸಿದರು. ಇವರ ಸಹೋದರರೇ ಆಗಿರುವ ಅಧ್ಯಕ್ಷ ಗೋಟಬಯ ರಾಜಪಕ್ಸ ಅವರು ಪ್ರತಿಜ್ಞಾವಿಧಿ ಬೋಧಿಸಿದರು.

ಮಾಜಿ ಅಧ್ಯಕ್ಷರೂ ಆದ ಮಹಿಂದಾ ನೇತೃತ್ವದ ಶ್ರೀಲಂಕನ್ ಪೀಪಲ್ಸ್ ಪಾರ್ಟಿ (ಎಸ್.ಎಲ್.ಪಿ.ಪಿ) ದೇಶದ 9ನೇ ಸಂಸತ್ತಿಗೆ ಈಚೆಗೆ ನಡೆದಿದ್ದ ಸಾರ್ವತ್ರಿಕ ಚುನಾವಣೆಯಲ್ಲಿ ಸ್ಪಷ್ಟ ಬಹುಮತ ಪಡೆದಿತ್ತು. ಸಂಸತ್ತಿನ ಸದಸ್ಯ ಬಲ 225 ಆಗಿದ್ದು, ಎಸ್.ಎಲ್.ಪಿ.ಪಿ 145 ಸ್ಥಾನ ಗೆದ್ದುಕೊಂಡಿದೆ. ಮೈತ್ರಿ ಪಕ್ಷಗಳು 5 ಸ್ಥಾನ ಗೆದ್ದುಕೊಂಡಿದ್ದವು.

ಮಹಿಂದಾ ರಾಜಪಕ್ಸ ಅವರು ಕಳೆದ ತಿಂಗಳಷ್ಟೇ ರಾಷ್ಟ್ರ ರಾಜಕಾರಣದಲ್ಲಿ 50 ವರ್ಷ ಪೂರೈಸಿದ್ದರು. 1970ಲ್ಲಿ ಮೊದಲ ಬಾರಿ, 24ನೇ ವಯಸ್ಸಿನಲ್ಲಿಯೇ ಸಂಸತ್ತಿಗೆ ಚುನಾಯಿತರಾಗಿದ್ದರು. ನಂತರದ ವರ್ಷಗಳಲ್ಲಿ ಎರಡು ಬಾರಿ ಅಧ್ಯಕ್ಷರಾಗಿ, ಮೂರು ಬಾರಿ ಪ್ರಧಾನಿಯಾಗಿ ಕಾರ್ಯನಿರ್ವಹಿಸಿದ್ದಾರೆ.

ADVERTISEMENT

ನಾಲ್ಕು ದಿನಗಳ ಹಿಂದೆ ಸಾರ್ವತ್ರಿಕ ಚುನಾವಣೆ ನಡೆದಿತ್ತು. ಶ್ರೀಲಂಕನ್ ಪೀಪಲ್ಸ್ ಪಾರ್ಟಿಯು ಮೂರನೇ ಎರಡರಷ್ಟು ಸ್ಥಾನಗಳನ್ನು ಗೆದ್ದುಕೊಂಡಿತ್ತು. ಮಹಿಂದಾ ರಾಜಪಕ್ಸ ಅವರಿಗೆ 5 ಲಕ್ಷ ವೈಯಕ್ತಿಕ ಪ್ರಾಶಸ್ತ್ಯ ಮತಗಳು ಲಭಿಸಿದ್ದವು. ಇದು, ಶ್ರೀಲಂಕಾದ ಚುನಾವಣೆಗಳಲ್ಲಿ ಯಾವುದೇ ಅಭ್ಯರ್ಥಿ ಪಡೆದಿರುವ ಗರಿಷ್ಠ ಸಂಖ್ಯೆಯ ಮತಗಳಾಗಿವೆ.

ಮಹಿಂದಾ ರಾಜಪಕ್ಸ, ಅಧ್ಯಕ್ಷ ಗೋಟಬಯ ರಾಜಪಕ್ಸ ಮತ್ತು ಪಕ್ಷದ ರಾಷ್ಟ್ರೀಯ ಸಂಘಟಕರೂ ಆಗಿರುವ ಕಿರಿಯ ಸಹೋದರ ಬಸಿಲ್ ರಾಜಪಕ್ಸ ಅವರನ್ನು ಒಳಗೊಂಡ ಕುಟುಂಬವು ಕಳೆದ ಎರಡು ದಶಕಗಳಿಂದ ಶ್ರೀಲಂಕಾದ ರಾಜಕಾರಣದ ಮೇಲೆ ತನ್ನ ಪ್ರಾಬಲ್ಯ ಸಾಧಿಸಿದೆ.

ಯುನೈಟೆಡ್ ನ್ಯಾಷನಲ್ ಪಕ್ಷದ (ಯು.ಎನ್.ಪಿ) ಮುಖಂಡ, ನಾಲ್ಕು ಬಾರಿ ಪ್ರಧಾನಮಂತ್ರಿಯಾಗಿದ್ದ ರನಿಲ್‌ ವಿಕ್ರಮಸಿಂಘೆ ಅವರು 1997ರಲ್ಲಿ ಚುನಾವಣಾ ರಂಗಕ್ಕಿಳಿದ ಬಳಿಕ ಇದೇ ಮೊದಲ ಬಾರಿ ಪರಾಭವಗೊಂಡಿದ್ದಾರೆ. ಅವರ ಪಕ್ಷ ಒಂದೂ ಸ್ಥಾನ ಗೆಲ್ಲಲು ಸಾಧ್ಯವಾಗಿಲ್ಲ.

ತಾಜಾ ಸುದ್ದಿಗಾಗಿ ಪ್ರಜಾವಾಣಿ ಟೆಲಿಗ್ರಾಂ ಚಾನೆಲ್ ಸೇರಿಕೊಳ್ಳಿ | ಪ್ರಜಾವಾಣಿ ಆ್ಯಪ್ ಇಲ್ಲಿದೆ: ಆಂಡ್ರಾಯ್ಡ್ | ಐಒಎಸ್ | ನಮ್ಮ ಫೇಸ್‌ಬುಕ್ ಪುಟ ಫಾಲೋ ಮಾಡಿ.