ವಿದೇಶಿ ರಾಯಭಾರಿ ಆದೇಶದಂತೆ ಇಬ್ರಾಹಿಂ ಆಡಳಿತ: ಮೊಯಿಜು ಆರೋಪ

ಮಾಲೆ: ಮಾಲ್ದೀವ್ಸ್‌ನ ಮಾಜಿ ಅಧ್ಯಕ್ಷ ಇಬ್ರಾಹಿಂ ಮೊಹಮದ್‌ ಸೊಲಿಹ್‌ ಅವರು ‘ವಿದೇಶಿ ರಾಯಭಾರಿ’ ಆದೇಶದಂತೆ ತಾವು ಕಾರ್ಯನಿರ್ವಹಿಸಿದ್ದಾರೆ ಎಂದು ಹಾಲಿ ಅಧ್ಯಕ್ಷ ಮೊಹಮದ್‌ ಮೊಯಿಜು ಆರೋ‍ಪಿಸಿದ್ದಾರೆ. ಆದರೆ ನಿರ್ದಿಷ್ಟವಾಗಿ ಯಾವ ದೇಶದ ರಾಯಭಾರಿ ಎಂಬುದನ್ನು ಅವರು ಉಲ್ಲೇಖಿಸಿಲ್ಲ. 

ಸಾರ್ವಜನಿಕ ಸೇವಾ ಮಾಧ್ಯಮ (ಪಿಎಸ್‌ಎಮ್‌) ಸಂದರ್ಶನದಲ್ಲಿ ಇತ್ತೀಚೆಗೆ ಮಿಲಿಟರಿ ಡ್ರೋನ್‌ಗಳ ಖರೀದಿಗೆ ಸಂಬಂಧಿಸಿದಂತೆ ಪ್ರತಿಪಕ್ಷಗಳ ಟೀಕೆಗಳ ಕುರಿತ ಪ್ರಶ್ನೆಗೆ ಪ್ರತಿಕ್ರಿಯಿಸಿದ ಮೊಯಿಜು ‘ವಿಪಕ್ಷ ಎಂಡಿಪಿ 2018ರಿಂದ 2023ರ ಅವಧಿಯಲ್ಲಿ ಅಧಿಕಾರಲ್ಲಿದ್ದಾಗ ಸಂಸತ್ತಿನಲ್ಲಿ ಬಹುಮತವನ್ನು ಹೊಂದಿತ್ತು. ಆದರೂ ಮಾಲ್ದೀವ್ಸ್‌ನ ಸ್ವಾತಂತ್ರ್ಯವನ್ನು ರಕ್ಷಿಸಲು ಪಕ್ಷವು ವಿಫಲವಾಗಿದೆ. ಅದನ್ನು ವಿದೇಶದ ಕೈಯಲ್ಲಿ ಬಿಟ್ಟಿತ್ತು. ಇಬ್ರಾಹಿಂ ಮೊಹಮದ್‌ ಸೊಲಿಹ್‌ ಅವರು ವಿದೇಶಿ ರಾಯಭಾರಿ ಆದೇಶದಂತೆ ಕಾರ್ಯನಿರ್ವಹಿಸಿದರು ಮತ್ತು ಇದರಿಂದ ದೇಶದ ವ್ಯಾಪಕ ಹಾನಿಗೆ ಕಾರಣವಾಯಿತು’ ಎಂದು ಆರೋಪಿಸಿದ್ದಾರೆ.