ವಿಶ್ವಸಂಸ್ಥೆ:ವಿಶ್ವಸಂಸ್ಥೆಯ ಸಾಮಾನ್ಯಸಭೆ 76ನೇ ಅಧಿವೇಶನದ ಅಧ್ಯಕ್ಷ ಅಬ್ದುಲ್ಲಾ ಶಾಹಿದ್ ಅವರು, ತಾವು ಭಾರತದಲ್ಲಿ ತಯಾರಾದ ಕೋವಿಶೀಲ್ಡ್ ಲಸಿಕೆಯ ಎರಡು ಡೋಸ್ ಪಡೆದಿದ್ದೇನೆ ಎಂದು ಶುಕ್ರವಾರ ಹೇಳಿದರು.
ವಿಶ್ವದಾದ್ಯಂತ ಇತರ ದೇಶಗಳೂ ಈ ಲಸಿಕೆಯನ್ನು ದೊಡ್ಡ ಪ್ರಮಾಣದಲ್ಲಿ ಬಳಸುತ್ತಿವೆ. ಬ್ರಿಟಿಷ್–ಸ್ವೀಡಿಷ್ನ ಔಷಧ ಕಂಪನಿ ಅಸ್ಟ್ರಾಜೆನೆಕಾ ಅಭಿವೃದ್ಧಿಪಡಿಸಿದ ಈ ಲಸಿಕೆಯನ್ನು ಭಾರತದಲ್ಲಿ ಪುಣೆ ಮೂಲದ ಸೀರಂ ಸಂಸ್ಥೆ ತಯಾರಿಸಿದೆ.
‘ನಾನು ಕೋವಿಶೀಲ್ಡ್ ಪಡೆದಿದ್ದೇನೆ. ಭಾರತದಲ್ಲಿ ತಯಾರಾದ ಈ ಲಸಿಕೆ ಸ್ವೀಕಾರಾರ್ಹ ಅಥವಾ ಇಲ್ಲ ಎಂದು ಎಷ್ಟು ದೇಶಗಳು ಒಪ್ಪಿವೆ ಎಂದು ತಿಳಿದಿಲ್ಲ. ಹೆಚ್ಚಿನ ದೇಶಗಳಿಗೆ ಕೋವಿಶೀಲ್ಡ್ ತಲುಪಿದೆ’ ಎಂದು ಅವರು ಮಾಧ್ಯಮಗೋಷ್ಠಿಯಲ್ಲಿ ಹೇಳಿದರು.
ಕೋವಿಡ್ ಲಸಿಕೆಗೆ ವಿಶ್ವ ಆರೋಗ್ಯ ಸಂಸ್ಥೆ ಅಥವಾ ಇನ್ನಾವುದೇ ಸಂಸ್ಥೆ ಮಾನ್ಯತೆ ನೀಡಬೇಕೇ ಎಂಬ ಪ್ರಶ್ನೆಗೆ, ‘ಲಸಿಕೆ ಪಡೆದು ನಾನು ಬದುಕಿದ್ದೇನೆ. ಅನ್ಯರ ಬಗ್ಗೆ ತಿಳಿದಿಲ್ಲ. ಇದಕ್ಕೆ ವೈದ್ಯಕೀಯ ಪರಿಣತರು ಉತ್ತರಿಸಬೇಕು. ನಾನಲ್ಲ’ ಎಂದು ಹೇಳಿದರು.
ಭಾರತ ಸುಮಾರು 100 ದೇಶಗಳಿಗೆ 6.6 ಕೋಟಿ ಡೋಸ್ ಲಸಿಕೆಗಳನ್ನು ರಫ್ತು ಮಾಡಿದೆ. ಶಾಹಿದ್ ಅವರ ತಾಯ್ನಾಡು ಮಾಲ್ಡೀವ್ಸ್ಗೆ ಜನವರಿಯಲ್ಲಿ 1 ಲಕ್ಷ ಡೋಸ್ ಲಸಿಕೆ ರಫ್ತಾಗಿದ್ದು, ಇದು ಲಸಿಕೆ ಪಡೆದ ಮೊದಲ ರಾಷ್ಟ್ರವಾಗಿದೆ.
ತಾಜಾ ಸುದ್ದಿಗಾಗಿ ಪ್ರಜಾವಾಣಿ ಟೆಲಿಗ್ರಾಂ ಚಾನೆಲ್ ಸೇರಿಕೊಳ್ಳಿ | ಪ್ರಜಾವಾಣಿ ಆ್ಯಪ್ ಇಲ್ಲಿದೆ: ಆಂಡ್ರಾಯ್ಡ್ | ಐಒಎಸ್ | ನಮ್ಮ ಫೇಸ್ಬುಕ್ ಪುಟ ಫಾಲೋ ಮಾಡಿ.