ಉಕ್ರೇನ್‌ನ ಉಷ್ಣ ವಿದ್ಯುತ್‌ ಸ್ಥಾವರದ ಮೇಲೆ ರಷ್ಯಾ ದಾಳಿ

ಕೀವ್‌: ಉಷ್ಣ ವಿದ್ಯುತ್‌ ಸ್ಥಾವರವನ್ನು ಗುರಿಯಾಗಿಸಿಕೊಂಡು ರಷ್ಯಾ ನಡೆಸಿದ ದಾಳಿಯಲ್ಲಿ ಭಾರಿ ಹಾನಿಯಾಗಿದೆ ಎಂದು ಉಕ್ರೇನ್‌ ಬುಧವಾರ ಹೇಳಿದೆ.

ದಾಳಿಯಿಂದಾಗಿ ಇಬ್ಬರು ಕಾರ್ಮಿಕರು ಗಾಯಗೊಂಡಿದ್ದಾರೆ ಎಂದು ವಿದ್ಯುತ್‌ ನಿರ್ವಹಣೆಯ ಹೊಣೆ ಹೊತ್ತಿರುವ ಡಿಟೆಕ್‌ ಸಂಸ್ಥೆ ತಿಳಿಸಿದೆ.

ಚಳಿಗಾಲ ಸಮೀಪಿಸಿದ ಬೆನ್ನಿಗೆ, ಉಕ್ರೇನಿಯನ್ನರಿಗೆ ಹರಿಯುವ ನೀರು, ಬೆಳಕು, ಶಾಖವನ್ನು ನಿರಾಕರಿಸುವ ಅಭಿಯಾನವನ್ನು ಮಾಸ್ಕೊ ಮುಂದುವರಿಸಿದೆ ಎಂದು ದೂರಿದೆ.

ಯುದ್ಧ ಆರಂಭವಾದಾಗಿನಿಂದಲೂ ಚಳಿಗಾಲದ ಆರಂಭದ ಹೊಸ್ತಿಲಲ್ಲೇ ರಷ್ಯಾವು ಉಕ್ರೇನ್‌ನ ವಿದ್ಯುತ್‌ ಉತ್ಪಾದನೆ, ಪೂರೈಕೆಯ ಜಾಲವನ್ನು ದುರ್ಬಲಗೊಳಿಸಲು ಯತ್ನಿಸುತ್ತದೆ ಎಂದು ಆರೋಪಿಸಿದೆ.

ರಷ್ಯಾದ ಒಂಬತ್ತು ಪ್ರದೇಶಗಳಲ್ಲಿ ಉಕ್ರೇನ್‌ನ 53 ಡ್ರೋನ್‌ಗಳನ್ನು ತಡೆಯಲಾಗಿದೆ ಎಂದು ರಷ್ಯಾ ರಕ್ಷಣಾ ಸಚಿವಾಲಯ ತಿಳಿಸಿದೆ.