ಉಕ್ರೇನ್–ರಷ್ಯಾ ಸೇನಾ ಸಾಮರ್ಥ್ಯ

ಉಕ್ರೇನ್ ಮೇಲೆ ಹಿಡಿತ ಸಾಧಿಸುವ ಪಣ ತೊಟ್ಟಿರುವ ರಷ್ಯಾ, ನಿರೀಕ್ಷೆಯಂತೆ ಸಂಪೂರ್ಣ ಮಿಲಿಟರಿಯೊಂದಿಗೆ ಉಕ್ರೇನ್ ಮೇಲೆರಗಿದೆ. ಈ ವಿದ್ಯಮಾನ ಮೂರನೇ ಮಹಾಯುದ್ಧಕ್ಕೆ ಕಾರಣವಾಗಿಬಿಡಬಹುದೇ? ಎಂದು ವಿಶ್ವ ಸಮುದಾಯ ಕಳವಳಪಡುತ್ತಿದೆ.

ರಷ್ಯಾ ಅಧ್ಯಕ್ಷ ಪುಟಿನ್ ಆದೇಶದಂತೆ ಸುಮಾರು 1 ಲಕ್ಷಕ್ಕೂ ಹೆಚ್ಚು ರಷ್ಯಾ ಸೈನಿಕರುಗುರುವಾರ ಬೆಳಗಿನ ಜಾವ ಉಕ್ರೇನ್ ಗಡಿಗೆ ಮುತ್ತಿಗೆ ಹಾಕಿದ್ದಾರೆ. ಈಗಾಗಲೇ ಉಕ್ರೇನ್‌ನ ಪ್ರಮುಖ ನಗರಗಳ ಮೇಲೆ (ಕೀವ್, ಖಾರ್‌ಕೀವ್) ಕ್ಷಿಪಣಿ ದಾಳಿಯನ್ನು ರಷ್ಯಾ ನಡೆಸಿದೆ. ಸಾವು–ನೋವು ಆಗಿದ್ದು, ಆಸ್ತಿ–ಪಾಸ್ತಿ ನಷ್ಟವಾಗಿದೆ.

ಈ ಎರಡೂ ದೇಶಗಳ ಸೇನಾ ಬಲ ಹೋಲಿಸಿ ನೋಡುವುದಾದರೆ ರಷ್ಯಾ ಮತ್ತು ಉಕ್ರೇನ್ ನಡುವೆ ಅಜಗಜಾಂತರ ವ್ಯತ್ಯಾಸ ಇದೆ. ಅದಾಗ್ಯೂ ರಷ್ಯಾ ವಿರುದ್ಧ ಉಕ್ರೇನ್ ಪ್ರಬಲ ಪ್ರತಿರೋಧ ತೋರುತ್ತಿದೆ.

ಇನ್ನೊಂದೆಡೆ ಯುರೋಪ್‌ ಒಕ್ಕೂಟ ಉಕ್ರೇನ್ ಬೆನ್ನಿಗೆ ನಿಲ್ಲುವುದಾಗಿ ಘೋಷಿಸಿದೆ. ಆದರೆ, ರಷ್ಯಾದ ಸೇನಾ ಬಲದ ಮುಂದೆ ಯುರೋಪ್‌ ಒಕ್ಕೂಟ ರಾಷ್ಟ್ರಗಳ ಸೇನಾ ಬಲವೂ ಕಡಿಮೆಯೇ ಎನ್ನುವುದು ತಜ್ಞರ ವಿಶ್ಲೇಷಣೆ.