ಉಕ್ರೇನ್ ನಾಗರಿಕರು ಕೀವ್‌ನಿಂದ ಮುಕ್ತವಾಗಿ ತೆರಳಬಹುದು: ರಷ್ಯಾ ಸೇನೆ
ಕೀವ್: ಉಕ್ರೇನ್ ನಾಗರಿಕರು ದೇಶದ ರಾಜಧಾನಿ ಕೀವ್‌ನಿಂದ 'ಮುಕ್ತವಾಗಿ' ಹೊರಹೋಗಬಹುದು ಎಂದು ರಷ್ಯಾದ ಸೇನೆ ಸೋಮವಾರ ಹೇಳಿದೆ. ಅಲ್ಲದೆ, ತನ್ನ ಆಕ್ರಮಣವು ಐದನೇ ದಿನಕ್ಕೆ ಕಾಲಿಟ್ಟಿದ್ದು, ರಷ್ಯಾ ವಾಯುಪಡೆಯು ಉಕ್ರೇನ್‌ನ ವಾಯುಮಾರ್ಗದಲ್ಲಿ ಪ್ರಾಬಲ್ಯ ಹೊಂದಿದೆ ಎಂದು ಹೇಳಿದೆ.
'ನಗರದಲ್ಲಿರುವ ಎಲ್ಲ ನಾಗರಿಕರು ಉಕ್ರೇನ್ ರಾಜಧಾನಿಯಿಂದ ಕೀವ್-ವಾಸಿಲ್ಕಿವ್ ಹೆದ್ದಾರಿ ಮೂಲಕ ಹೊರಹೋಗಬಹುದು. ಈ ದಿಕ್ಕು ಮುಕ್ತ ಮತ್ತು ಸುರಕ್ಷಿತವಾಗಿದೆ' ಎಂದು ರಷ್ಯಾದ ರಕ್ಷಣಾ ಸಚಿವಾಲಯದ ವಕ್ತಾರ ಇಗೊರ್ ಕೊನಾಶೆಂಕೋವ್ ದೂರದರ್ಶನದ ಹೇಳಿಕೆಯಲ್ಲಿ ತಿಳಿಸಿದ್ದಾರೆ.
ವಾಸಿಲ್ಕಿವ್ ಕೀವ್‌ನ ನೈಋತ್ಯ ಭಾಗದಲ್ಲಿದೆ.
ಉಕ್ರೇನ್ ಪಡೆಗಳು ನಾಗರಿಕರನ್ನು ಮಾನವ ಗುರಾಣಿಗಳಾಗಿ ಬಳಸಿಕೊಳ್ಳುತ್ತಿವೆ ಎಂದು ಆರೋಪಿಸಿದ ಕೊನಾಶೆಂಕೋವ್, ರಷ್ಯಾ ಕೀವ್‌ನ ನಾಗರಿಕ ಪ್ರದೇಶಗಳನ್ನು ಗುರಿಯಾಗಿಸಿ ದಾಳಿ ನಡೆಸಲು ಸಿದ್ಧತೆ ನಡೆಸುತ್ತಿದೆ ಎಂದು ಸುಳಿವು ನೀಡಿದ್ದಾರೆ.
ಕೀವ್‌ನ ನಾಗರಿಕರಿಗೆ ಮನೆಯಲ್ಲಿಯೇ ಇರಲು ಮತ್ತು ರಾತ್ರಿ ಕರ್ಫ್ಯೂವನ್ನು ವೀಕ್ಷಿಸಲು ಉಕ್ರೇನ್ ನೀಡಿದ ಸಲಹೆಯನ್ನು ಉಲ್ಲೇಖಿಸಿದ ಅವರು, ವಸತಿ ಪ್ರದೇಶಗಳಲ್ಲಿ ಫಿರಂಗಿ ಮತ್ತು ಮಿಲಿಟರಿ ಉಪಕರಣಗಳನ್ನು ಇರಿಸಿರುವ ರಾಷ್ಟ್ರೀಯವಾದಿಗಳನ್ನು ರಕ್ಷಿಸಿಕೊಳ್ಳಲು ನಾಗರಿಕರನ್ನು ಬಳಸಲಾಗುತ್ತಿದೆ ಎಂದು ಆರೋಪಿಸಿದರು.
'ರಷ್ಯಾದ ವಾಯುಯಾನವು 'ಉಕ್ರೇನ್‌ನ ಸಂಪೂರ್ಣ ಭೂಪ್ರದೇಶ'ದ ಮೇಲೆ ದಾಳಿ ಮಾಡುವ ಉನ್ನತ ಮಟ್ಟದ ವಾಯು ಶಕ್ತಿಯನ್ನು ಹೊಂದಿದೆ. ಉಕ್ರೇನ್‌ನ ಆಗ್ನೇಯ ಭಾಗದಲ್ಲಿ ರಷ್ಯಾದ ಪಡೆಗಳು ಬಂದರು ನಗರವಾದ ಬರ್ಡಿಯಾನ್‌ ಮತ್ತು ದೊಡ್ಡ ಪರಮಾಣು ವಿದ್ಯುತ್ ಸ್ಥಾವರವನ್ನು ಹೊಂದಿರುವ ಎನರ್ಗೋಡರ್ ನಗರವನ್ನು ನಿಯಂತ್ರಣಕ್ಕೆ ತೆಗೆದುಕೊಂಡಿವೆ' ಎಂದು ಕೊನಾಶೆಂಕೋವ್ ಹೇಳಿದರು.
ರಷ್ಯಾದ ಪಡೆಗಳು ಜಪೋರಿಝಿಯಾ ಪರಮಾಣು ಶಕ್ತಿ ಕೇಂದ್ರವನ್ನು ಕಾವಲು ಕಾಯುತ್ತಿವೆ, ಇದು ಕಾರ್ಯಾಚರಣೆಯನ್ನು ಮುಂದುವರೆಸಿದೆ ಮತ್ತು ವಿಕಿರಣ ಮಟ್ಟವು ಸಾಮಾನ್ಯವಾಗಿದೆ ಎಂದು ಮಿಲಿಟರಿ ವಕ್ತಾರರು ತಿಳಿಸಿದ್ದಾರೆ.
ತಾಜಾ ಸುದ್ದಿಗಾಗಿ ಪ್ರಜಾವಾಣಿ ಟೆಲಿಗ್ರಾಂ ಚಾನೆಲ್ ಸೇರಿಕೊಳ್ಳಿ | ಪ್ರಜಾವಾಣಿ ಆ್ಯಪ್ ಇಲ್ಲಿದೆ: ಆಂಡ್ರಾಯ್ಡ್ | ಐಒಎಸ್ | ನಮ್ಮ ಫೇಸ್‌ಬುಕ್ ಪುಟ ಫಾಲೋ ಮಾಡಿ.