ಅಮೆರಿಕ: ಮುಂದಿನ 4 ವಾರಗಳಲ್ಲಿ ಕೋವಿಡ್‌ನಿಂದ 62,000 ಮಂದಿ ಸಾವು–ಸಿಡಿಸಿ

ವಾಷಿಂಗ್ಟನ್‌: ಕೋವಿಡ್‌–19 ಕಾರಣಗಳಿಂದಾಗಿ ಮುಂದಿನ ನಾಲ್ಕು ವಾರಗಳಲ್ಲಿ ಸುಮಾರು 62,000ಕ್ಕೂ ಹೆಚ್ಚು ಜನರು ಸಾವಿಗೀಡಾಗುವ ಸಾಧ್ಯತೆಯಿದೆ ಎಂದು ಅಮೆರಿಕದ ರೋಗ ನಿಯಂತ್ರಣ ಮತ್ತು ತಡೆ ಕೇಂದ್ರ (ಸಿಡಿಸಿ) ಮುನ್ಸೂಚನೆ ನೀಡಿದೆ.

ಅಮೆರಿಕದಲ್ಲಿ ಮುಂದಿನ ನಾಲ್ಕು ವಾರಗಳಲ್ಲಿ ಕೋವಿಡ್‌ ಸಂಬಂಧಿತ ಸಾವಿನ ಪ್ರಮಾಣ ಏರಿಕೆಯಾಗುವ ಸಾಧ್ಯತೆಯಿದ್ದು, ಫೆಬ್ರುವರಿ 5ಕ್ಕೆ ಕೊನೆಗೊಳ್ಳುವ ವಾರದಲ್ಲಿ 10,400ರಿಂದ 31,000 ಮಂದಿ ಸಾವಿಗೀಡಾಗಬಹುದು ಎಂದು ಅಂದಾಜಿಸಲಾಗಿದೆ.

ಮಂಗಳವಾರ 24 ಗಂಟೆಗಳ ಅಂತರದಲ್ಲಿ ಕೊರೊನಾ ವೈರಸ್‌ ಸೋಂಕಿನಿಂದ ಸುಮಾರು 3,000 ಮಂದಿ ಮೃತಪಟ್ಟಿದ್ದಾರೆ. ಕಳೆದ ವರ್ಷ ಫೆಬ್ರುವರಿಯಿಂದ ಒಂದೇ ದಿನದಲ್ಲಿ ದಾಖಲಾಗಿರುವ ಅತಿ ಹೆಚ್ಚು ಸಾವಿನ ಪ್ರಕರಣಗಳು ಇದಾಗಿದೆ ಎಂಬುದು ಸಿಡಿಸಿ ಮಾಹಿತಿಯಿಂದ ತಿಳಿದು ಬಂದಿದೆ.

ಕೋವಿಡ್‌ಗೆ ಸಂಬಂಧಿಸಿದಂತೆ ಪ್ರಸ್ತುತ ನಿತ್ಯ ಸರಾಸರಿ ಸಾವಿನ ಸಂಖ್ಯೆ 1,600ರಷ್ಟಿದೆ.

ಇದನ್ನೂ ಓದಿ: ಹರಡುವಿಕೆಯಲ್ಲಿ ಡೆಲ್ಟಾವನ್ನು ವೇಗವಾಗಿ ಹಿಂದಿಕ್ಕುತ್ತಿರುವ ಓಮೈಕ್ರಾನ್: WHO

ವರ್ಡೋಮೀಟರ್‌ ವೆಬ್‌ಸೈಟ್ ಪ್ರಕಾರ, ಜನವರಿ 12ರಂದು ಅಮೆರಿಕದಲ್ಲಿ ಕೋವಿಡ್‌ ದೃಢಪಟ್ಟ 8,13,885 ಹೊಸ ಪ್ರಕರಣಗಳು ದಾಖಲಾಗಿವೆ ಹಾಗೂ 2,268 ಮಂದಿ ಮೃತಪಟ್ಟಿದ್ದಾರೆ.