ವೆನಿಜುವೆಲಾ: ಜೈಲಿನಲ್ಲಿ ಗಲಭೆ, 40ಕ್ಕೂ ಹೆಚ್ಚು ಮಂದಿ ಸಾವು 

ಕಾರಕಾಸ್: ವೆನಿಜುವೆಲಾದ ಕಾರಾಗೃಹದಲ್ಲಿ ಶುಕ್ರವಾರ ನಡೆದ ಹಿಂಸಾಚಾರದಲ್ಲಿ 40ಕ್ಕೂ ಹೆಚ್ಚು ಮಂದಿ ಸಾವನ್ನಪ್ಪಿದ್ದು, 50ಕ್ಕೂ ಹೆಚ್ಚು ಜನರು ಗಾಯಗೊಂಡಿದ್ದಾರೆ.

ಹಿಂಸಾಚಾರದಲ್ಲಿ ಕಾರಾಗೃಹದ ವಾರ್ಡನ್ ಮತ್ತು ರಾಷ್ಟ್ರೀಯ ಗಾರ್ಡ್ ಅಧಿಕಾರಿಯೂ ಸೇರಿದಂತೆ ಕಾರಾಗೃಹದ ಇತರ ಸಿಬ್ಬಂದಿಗೂ ಗಾಯಗಳಾಗಿವೆ ಎಂದು ಜೈಲಿನ ಅಧಿಕಾರಿಯೊಬ್ಬರು ಮಾಹಿತಿ ನೀಡಿದ್ದಾರೆ.

ವೆನಿಜುವೆಲಾದ ರಾಜಧಾನಿ ಕಾರಕಾಸ್‌ನ‌ ಲಾನೊಸ್‌ ಪೆನಿಟೆನ್‌ಟಿಯರಿ ಕೇಂದ್ರದಲ್ಲಿ ಕೈದಿಗಳು ತಮ್ಮ ಕುಟುಂಬದವರಿಂದ ಆಹಾರ ಪೂರೈಸಲು ಅನುಮತಿ ನೀಡಬೇಕೆಂದು ಒತ್ತಾಯಿಸಿ ನಡೆಸುತ್ತಿದ್ದ ಪ್ರತಿಭಟನೆ ವಿಕೋಪಕ್ಕೆ ತಿರುಗಿ ಹಿಂಸಾಚಾರ ನಡೆದಿದೆ ಎಂದು ಇಲ್ಲಿನ ಜನಪ್ರತಿನಿಧಿ ಮರಿಯಾ ಬೀಟ್ರೈಜ್ ಮಾರ್ಟಿನೆಜ್ ಮಾಧ್ಯಮಕ್ಕೆ ತಿಳಿಸಿದ್ದಾರೆ.