ಹಳ್ಳಿ ಮನೆ ಹೊಸ ಗೋಡೆ ಕ್ಯಾಲೆಂಡರ್ 2021: ‘ಏನಯ್ಯಾ, ಹಿಂಗೆ ಸಪ್ಪೆ ಮೋರೆ ಹಾಕ್ಕೊಂಡಿದೀಯಾ. ಹೇಗಿತ್ತು ಕಳೆದ ವರ್ಷ?’
ಹಳೆ ಕ್ಯಾಲೆಂಡರ್ 2020: ‘ಮೊನ್ನೆಗೇ ನನ್ನ ಅವಧಿ ಮುಗೀತು. ನಿಂಗೆ ಚಾರ್ಜ್ ಕೊಟ್ಟು ಹೋಗ್ತೀನಿ. ವರ್ಷ ಮುಗಿದ್ರೆ ಸಾಕಪ್ಪಾಂತ ಕಾಯ್ತಿದ್ದೆ’.
‘ಯಾಕೋ?’
‘ಮಿತಿಮೀರಿದ ಶತ್ರು ಕಾಟ’.
‘ಪಾಕಿಸ್ತಾನ, ಚೀನಾ ಹಳೇ ಶತ್ರುಗಳ ಕಾಟ ಇದ್ದದ್ದೇ. ಅದ್ರಲ್ಲೇನಿದೆ ಹೊಸದು?’
‘ಹಳೆ ವೈರಿಯ ಹೊಸ ವೈರಾಣುವಿನಿಂದ ಜಗತ್ತೇ ಹೈರಾಣಾಯ್ತಲ್ಲೋ...’
‘ಈಗದರ ಹಾವಳಿ ತಗ್ಗುತ್ತಾ ಇದೆ’.
‘ನಿನ್ನ ಕಾಲ್ದಲ್ಲಿ ಹೊಸ ಅವತಾರದಲ್ಲಿ ಬರ್ತಾ ಇದೆ, ಹುಷಾರು!’
‘ಆದ್ರೆ, ಅದನ್ನ ಮಟ್ಟ ಹಾಕೋಕೆ ತಯಾರಾ
ಗಿದೆಯಲ್ಲ ರಾಮಬಾಣ!’
‘ನೂರಾಮೂವ್ವತ್ತೆಂಟು ಕೋಟಿ ಜನ್ರಿಗೆ ಅದು ತಲುಪೋದು ಯಾವ ರಾಯನ ಕಾಲಕ್ಕೋ’.
‘ಇದೇನು ನಿನ್ನ ಮುಖದ ತುಂಬ ಇಷ್ಟೊಂದು ಹಣೆಬೊಟ್ಟುಗಳು!’
‘ಹೆಣ್ಮಕ್ಕಳು ಸ್ನಾನಕ್ಕೆ ಹೋಗುವಾಗ ಅಂಟಿಸಿದವು’.
‘ಮಗ್ಗುಲಲ್ಲಿರೋದು?’
‘ಹುಡುಗ್ರ ಕ್ರಿಕೆಟ್ ಮ್ಯಾಚ್ ಡೈರಿ!
‘ಮೈತುಂಬ ಅಂಕೆಗಳಿಗೆ ಗುಂಡು ಸುತ್ತಿರೋದು?’
‘ತಾತನ ಔಷಧಿಗಳ ಪ್ರಾರಂಭ, ಹುಣ್ಣಿಮೆ, ಅಮಾವಾಸ್ಯೆ, ಸಂಕಷ್ಟಿ ಗುರ್ತಿಸೋಕೆ’.
‘ಮೇಲೆಲ್ಲಾ ಅರಿಶಿನ ಕುಂಕುಮ, ಚುಚ್ಚಿದ ಸೂಜಿ ದಾರ!’
‘ನನ್ನಲ್ಲಿರೋ ದೇವರ ಚಿತ್ರಕ್ಕೆ ಅಜ್ಜಿಯ ಪೂಜೆ, ತಾತನ ಅಂಗಿಗೆ ಗುಂಡಿ ಹಾಕೋಕೆ ಕಣ್ಣೆದುರಿಗೆ ಸಲಕರಣೆಗಳು!’
‘ವರ್ಷದ ಮೊದ್ಲು ಜೊತೆಗೆ ಹನ್ನೊಂದು ಜನ ಇದ್ರು. ಈಗ ಏಕಾಂಗಿ! ಅವ್ರೆಲ್ಲಯ್ಯ?’
‘ಮಕ್ಕಳು, ಅಮ್ಮಾವ್ರು ಕಿತ್ಕೊಂಡೋದ್ರು. ಪುಸ್ತಕಕ್ಕೆ ರಟ್ಟು ಹಾಕ್ಕೊಳ್ಳೋಕೆ. ಸಣ್ಣ ಮಕ್ಳ...’
‘ಹ್ಹಹ್ಹ, ಛೀ ಛೀ...’
‘ನಗ್ಬೇಡಯ್ಯಾ, ನಿಂಗೂ ಕಾದಿರೋದು ಇದೇ ಸ್ಥಿತಿ! ...ಹೊಸ ವರ್ಷದ ಶುಭಾಶಯಗಳು. ನಾನಿನ್ನು ಬರ್ತೀನಿ’. ಹಳೆಯ ಕ್ಯಾಲೆಂಡರ್ ಹೇಳಿದ ಭವಿಷ್ಯ ನೆನೆದು ಹೊಸ ಕ್ಯಾಲೆಂಡರ್ ಸುಸ್ತು!
ತಾಜಾ ಸುದ್ದಿಗಾಗಿ ಪ್ರಜಾವಾಣಿ ಟೆಲಿಗ್ರಾಂ ಚಾನೆಲ್ ಸೇರಿಕೊಳ್ಳಿ | ಪ್ರಜಾವಾಣಿ ಆ್ಯಪ್ ಇಲ್ಲಿದೆ: ಆಂಡ್ರಾಯ್ಡ್ | ಐಒಎಸ್ | ನಮ್ಮ ಫೇಸ್ಬುಕ್ ಪುಟ ಫಾಲೋ ಮಾಡಿ.