IPLಗೆ ವಿದಾಯ ಹೇಳಿದ ಆ್ಯಂಡ್ರೆ ರಸೆಲ್: ಮುಂದಿನ ಆವೃತ್ತಿಯಿಂದ KKR 'ಪವರ್‌ ಕೋಚ್'
ಕೋಲ್ಕತ್ತ: ವೆಸ್ಟ್‌ ಇಂಡೀಸ್‌ ಮೂಲದ ಆಲ್‌ರೌಂಡರ್‌ ಆ್ಯಂಡ್ರೆ ರಸೆಲ್ ಅವರು ಇಂಡಿಯನ್‌ ಪ್ರೀಮಿಯರ್‌ ಲೀಗ್‌ಗೆ (ಐಪಿಎಲ್‌) ಭಾನುವಾರ ನಿವೃತ್ತಿ ಘೋಷಿಸಿದ್ದಾರೆ.
ಐಪಿಎಲ್‌ನಲ್ಲಿ 12 ಆವೃತ್ತಿ ಆಡಿರುವ 37 ವರ್ಷದ ರಸೆಲ್, ಡಿ.16ರಂದು ನಡೆಯುವ ಐಪಿಎಲ್‌ 19ನೇ ಆವೃತ್ತಿಯ ಮಿನಿ ಹರಾಜಿಗೂ ಮುನ್ನವೇ ನಿವೃತ್ತಿ ಘೋಷಿಸಿದ್ದಾರೆ.
ನಾನು ಐಪಿಎಲ್‌ಗೆ ನಿವೃತ್ತಿ ಘೋಷಿಸಿದ್ದು ಮುಂದಿನ ಆವೃತ್ತಿಯಲ್ಲಿ ಕೆಕೆಆರ್‌ ತಂಡದ ‘ಪವರ್‌ ಕೋಚ್’ (ಸಹಾಯಕ ಸಿಬ್ಬಂದಿ) ಆಗಿ ಮುಂದುವರಿಯುತ್ತೇನೆ ಎಂದು ರಸೆಲ್ ತಿಳಿಸಿದ್ದಾರೆ.
ಐಪಿಎಲ್‌ ಹೊರತುಪಡಿಸಿ ಬೇರೆ ಬೇರೆ ಲೀಗ್‌ನಲ್ಲಿ ಮುಂದುವರೆಯುತ್ತೇನೆ. ಬೇರೆ ಕೆಕೆಆರ್‌ ಫ್ರಾಂಚೈಸಿ ಪರವಾಗಿಯೂ ಕಣಕ್ಕಿಳಿಯಲಿದ್ದೇನೆ ಎಂದು ತಿಳಿಸಿದ್ದಾರೆ.
ಐಪಿಎಲ್‌ನಲ್ಲಿ ಕೆಕೆಆರ್‌ ತಂಡವನ್ನು ಬಿಟ್ಟು ಬೇರೆ ತಂಡದ ಪರ ಆಡಲು ನನಗೆ ಸಾಧ್ಯವಿಲ್ಲ. ತಂಡದ ಮ್ಯಾನೇಜ್‌ಮೆಂಟ್ ಜೊತೆ ಮಾತನಾಡಿದ್ದು, ಮುಂದಿನ ಆವೃತ್ತಿಯಿಂದ ಪವರ್‌ ಕೋಚ್ ಆಗಿ ಮುಂದುವರೆಯಲಿದ್ದೇನೆ. ಬ್ಯಾಟಿಂಗ್, ಬೌಲಿಂಗ್ ಸೇರಿದಂತೆ ಎಲ್ಲಾ ವಿಭಾಗಗಳಲ್ಲೂ ತಂಡಕ್ಕೆ ನೆರವಾಗಲಿದ್ದೇನೆ ಎಂದು ಹೇಳಿದ್ದಾರೆ.
2012ರಲ್ಲಿ ಐಪಿಎಲ್‌ಗೆ ಕಾಲಿಟ್ಟ ರಸೆಲ್, ಎರಡು ಆವೃತ್ತಿಯಲ್ಲಿ ಡೆಲ್ಲಿ ಡೇರ್‌ಡೆವಿಲ್ಸ್‌ ತಂಡದವನ್ನು ಪ್ರತಿನಿಧಿಸಿದ್ದರು. ನಂತರ 2014ರಿಂದ ಕೆಕೆಆರ್‌ ಪರ ಕಣಕ್ಕಿಳಿಯುತ್ತಿದ್ದರು.
ಐಪಿಎಲ್‌ನಲ್ಲಿ 140 ಪಂದ್ಯಗಳಲ್ಲಿ 174.18 ಸ್ಟ್ರೈಕ್‌ ರೇಟ್‌ನಲ್ಲಿ 2,651 ರನ್‌ಗಳಿಸಿದ್ದು, ಇದರಲ್ಲಿ 12 ಅರ್ಧಶತಕಗಳಿವೆ. 123 ವಿಕೆಟ್‌ ಕೂಡ ಕಬಳಿಸಿದ್ದಾರೆ.
ಈ ಬಾರಿ ಕೆಕೆಆರ್‌ ತಂಡವು ರಸೆಲ್ ಅವರನ್ನು ರಿಟೇನ್‌ ಮಾಡಿಕೊಂಡಿರಲಿಲ್ಲ.
ಆ್ಯಂಡ್ರೆ ರಸೆಲ್ ಅವರು ಅಂತರರಾಷ್ಟ್ರೀಯ ಕ್ರಿಕೆಟ್‌ಗೂ ಕೂಡ ನಿವೃತ್ತಿ ಘೋಷಿಸಿದ್ದಾರೆ.
ಪ್ರಜಾವಾಣಿ ಆ್ಯಪ್ ಇಲ್ಲಿದೆ: ಆಂಡ್ರಾಯ್ಡ್ | ಐಒಎಸ್ | ವಾಟ್ಸ್ಆ್ಯಪ್, ಎಕ್ಸ್, ಫೇಸ್‌ಬುಕ್ ಮತ್ತು ಇನ್‌ಸ್ಟಾಗ್ರಾಂನಲ್ಲಿ ಪ್ರಜಾವಾಣಿ ಫಾಲೋ ಮಾಡಿ.