INDW vs AUSW | ಆಸ್ಟ್ರೇಲಿಯಾ ವಿರುದ್ಧ ಭಾರತಕ್ಕೆ ಸತ್ವಪರೀಕ್ಷೆ

ಬ್ರಿಸ್ಟೇನ್‌: ಬ್ಯಾಟಿಂಗ್ ಅಸ್ಥಿರತೆಗೆ ಪರಿಹಾರ ಕಂಡುಕೊಂಡು ಮುಂದಿನ ವಿಶ್ವಕಪ್‌ ವೇಳೆಗೆ ಕ್ರಮಾಂಕ ಸಂಯೋಜನೆ ಅಂತಿಮಗೊಳಿಸುವ ಗುರಿಯೊಡನೆ ಭಾರತ ತಂಡ, ಗುರುವಾರ ಆಸ್ಟ್ರೇಲಿಯಾ ವಿರುದ್ಧ ಮಹಿಳೆಯರ ಏಕದಿನ ಸರಣಿಯ ಮೊದಲ ಪಂದ್ಯವನ್ನು ಆಡಲಿದೆ.

ನ್ಯೂಜಿಲೆಂಡ್‌ ವಿರುದ್ಧ ತವರಿನಲ್ಲಿ 2–1 ಗೆಲುವು ಪಡೆದ ನಂತರ ಭಾರತ ತಂಡ ಈಗ ಆಸ್ಟ್ರೇಲಿಯಾಕ್ಕೆ ಬಂದಿಳಿದಿದೆ. ಆದರೆ ಭಾರತ ಬ್ಯಾಟಿಂಗ್ ವಿಭಾಗ ಸ್ಥಿರ ಪ್ರದರ್ಶನ ನೀಡುತ್ತಿಲ್ಲ ಎಂಬುದು ಕಳೆದ ಕೆಲವು ಪಂದ್ಯಗಳಲ್ಲಿ ವ್ಯಕ್ತವಾಗಿದೆ. ಹೀಗಾಗಿ ಲಯಕ್ಕೆ ಪರದಾಡುತ್ತಿರುವ ಆರಂಭ ಆಟಗಾರ್ತಿ ಶಫಾಲಿ ವರ್ಮಾ ಅವರನ್ನು ತಂಡದಿಂದ ಕೈಬಿಟ್ಟಿದೆ.

ಇತಿಹಾಸ ಗಮನಿಸಿದರೆ 50 ಓವರುಗಳ ಪಂದ್ಯದಲ್ಲಿ ಆಸ್ಟ್ರೇಲಿಯಾ, ಭಾರತದ ವಿರುದ್ಧ ಅತ್ಯುತ್ತಮ ದಾಖಲೆ ಹೊಂದಿದೆ. ಹೀಗಾಗಿ, ಆ ತಂಡದ ವಿರುದ್ಧ ಗೆಲುವು ಸುಲಭವಲ್ಲ ಎಂಬುದು ಹರ್ಮನ್‌ಪ್ರೀತ್ ಬಳಗಕ್ಕೆ ಗೊತ್ತಿಲ್ಲದ ವಿಷಯವೇನಲ್ಲ. ಆಸ್ಟ್ರೇಲಿಯಾ ನೆಲದಲ್ಲಂತೂ ಭಾರತದ ಪ್ರದರ್ಶನ ಕಳಪೆಯಾಗಿದೆ. ಕಾಂಗರೂ ನಾಡಿನಲ್ಲಿ ಆಡಿರುವ 16 ಏಕದಿನ ಪಂದ್ಯಗಳಲ್ಲಿ ಕೇವಲ ನಾಲ್ಕರಲ್ಲಷ್ಟೇ ಭಾರತ ಜಯಗಳಿಸಿದೆ. 2021ರಲ್ಲಿ ಆಸ್ಟ್ರೇಲಿಯಾ, ಪ್ರವಾಸಿ ತಂಡದ ವಿರುದ್ಧ 2–1 ರಿಂದ ಜಯಗಳಿಸಿತ್ತು.

ಸದವಕಾಶ:

ಮುಂದಿನ ವರ್ಷ ತವರಿನಲ್ಲಿ ನಡೆಯುವ ವಿಶ್ವಕಪ್‌ಗೆ ಸಿದ್ಧತೆ ನಡೆಸಲು ಈ ಪ್ರವಾಸವು ನಾಯಕಿ ಹರ್ಮನ್‌ಪ್ರೀತ್ ಮತ್ತು ಕೋಚ್‌ ಅಮೋಲ್ ಮಜುಂದಾರ್ ಅವರಿಗೆ ಪರಿಪೂರ್ಣ ಅವಕಾಶ ಒದಗಿಸಿದೆ

ಆಸ್ಟ್ರೇಲಿಯಾ ತಂಡವು, ಪೂರ್ಣಾವಧಿ ನಾಯಕಿ ಅಲಿಸಾ ಹೀಲಿ ಅವರಿಲ್ಲದೇ ಆಡಬೇಕಾಗಿದೆ. ಅಲಿಸಾ ಮೊಣಗಂಟಿನ ನೋವಿನಿಂದ ಬಳಲುತ್ತಿದ್ದಾರೆ. ತಾಹಿಲಾ ಮೆಕ್‌ಗ್ರಾತ್‌ ತಂಡವನ್ನು ಮುನ್ನಡೆಸುತ್ತಿದ್ದಾರೆ. ಮಾರ್ಚ್‌ ನಂತರ ಆತಿಥೇಯರು ಈ ಮಾದರಿಯಲ್ಲಿ ಆಡಿಲ್ಲ. ಈಗ ಮೈಕೊಡವಿಕೊಳ್ಳಲು ಅವಕಾಶ.

ಅನುಭವಿ ಸ್ಮೃತಿ ಮಂದಾನ ಅವರಿಗೆ ಭಾರತ ತಂಡಕ್ಕೆ ಉತ್ತಮ ಆರಂಭ ಒದಗಿಸುವ ಹೊಣೆಯಿದೆ. ಈ  ವರ್ಷ ಮಂದಾನ ಲಯಕ್ಕೆ ಮರಳಿದ್ದು ಕೊನೆಯ ಆರು ಏಕದಿನ ಪಂದ್ಯಗಳಲ್ಲಿ ಸುಮಾರು 75ರ ಸರಾಸರಿಯಲ್ಲಿ 448 ರನ್ ಗಳಿಸಿದ್ದಾರೆ.

ಆದರೆ ಚಿಂತೆಯ ವಿಷಯವೆಂದರೆ ನಾಯಕಿ ಕೌರ್ ಅವರು ಲಯದಲ್ಲಿ ಇಲ್ಲದಿರುವುದು. ಜೆಮಿಮಾ ರಾಡ್ರಿಗಸ್ ಮತ್ತು ದೀಪ್ತಿ ಶರ್ಮಾ ಕೂಡ ದೊಡ್ಡ ಮೊತ್ತ ಗಳಿಸಲು ಕಾತರರಾಗಿದ್ದಾರೆ.

ಬಿಗ್‌ಬ್ಯಾಷ್ ಲೀಗ್ ವೇಳೆ ಮಣಿಕಟ್ಟಿಗೆ ಗಾಯಮಾಡಿಕೊಂಡ ವಿಕೆಟ್‌ಕೀಪರ್ ಯಷ್ಟಿಕಾ ಭಾಟಿಯಾ ಬದಲು ಉಮಾ ಚೆಟ್ರಿ ಸ್ಥಾನ ಪಡೆದಿದ್ದಾರೆ. ಅನುಭವಿ ರಿಚಾ ಘೋಷ್, ಹರ್ಲಿನ್ ದೆವೊಲ್, ತಿತಾಸ್ ಸಾಧು ಮತ್ತು ಮಿನ್ನುಮಣಿ ಉಪಯುಕ್ತ ಆಟವಾಡಬಲ್ಲರು. ದೀಪ್ತಿ ಬೌಲಿಂಗ್‌ನಲ್ಲಿ ನ್ಯೂಜಿಲೆಂಡ್ ಎದುರು ಉತ್ತಮ ಪ್ರದರ್ಶನ ನೀಡಿದ್ದರು. ರಾಧಾ ಯಾದವ್ ಕೂಡ ನಿರಾಸೆ ಮೂಡಿಸಿರಲಿಲ್ಲ.