IND vs WI | ರೋಹಿತ್–ರಾಹುಲ್ ದ್ವಿಶತಕ ಜೊತೆಯಾಟ: ವಿಂಡೀಸ್‌ಗೆ 388 ರನ್ ಗುರಿ
ಸುಲಭ ಚೇಸಿಂಗ್ ಲೆಕ್ಕಾಚಾರದಲ್ಲಿದ್ದ ವಿಂಡೀಸ್‌ಗೆ ಬೃಹತ್ ಸವಾಲು ಕೊಟ್ಟ ಭಾರತ
ವಿಶಾಖಪಟ್ಟಣ:ಇಲ್ಲಿನವೈ.ಎಸ್‌.ರಾಜಶೇಖರ ರೆಡ್ಡಿ ಕ್ರೀಡಾಂಗಣದಲ್ಲಿ ನಡೆಯುತ್ತಿರುವ ಎರಡನೇ ಏಕದಿನ ಪಂದ್ಯದಲ್ಲಿ ಭಾರತ ತಂಡ ನಿಗದಿತ 50 ಓವರ್‌ಗಳಲ್ಲಿ 5 ವಿಕೆಟ್‌ ಕಳೆದುಕೊಂಡು 387 ರನ್ ಕಲೆಹಾಕಿದೆ.
ಸರಣಿಯ ಮೊದಲ ಪಂದ್ಯದಲ್ಲಿ ಭಾರತ ನೀಡಿದ್ದ ಸವಾಲಿನ ಗುರಿಯನ್ನು ನಿರಾಯಾಸವಾಗಿ ಬೆನ್ನಟ್ಟಿದ್ದ ವೆಸ್ಟ್ ಇಂಡೀಸ್‌ ತಂಡ, ಎರಡನೇ ಪಂದ್ಯದಲ್ಲಿಯೂ ಚೇಸಿಂಗ್‌ನತ್ತ ಒಲವು ತೋರಿತ್ತು. ಹೀಗಾಗಿ ವಿಂಡೀಸ್‌ ತಂಡದ ನಾಯಕ ಕೀರನ್‌ಪೊಲಾರ್ಡ್‌ ಟಾಸ್‌ ಗೆದ್ದರೂ ಮೊದಲು ಬ್ಯಾಟಿಂಗ್‌ ಮಾಡುವ ಅವಕಾಶವನ್ನುಭಾರತಕ್ಕೆ ಬಿಟ್ಟುಕೊಟ್ಟರು.
ಆದರೆ ಪೊಲಾರ್ಡ್‌ ಲೆಕ್ಕಾಚಾರವನ್ನು ಉಲ್ಟಾ ಮಾಡುವಂತೆ ಬ್ಯಾಟ್ ಬೀಸಿದ ಕೆ.ಎಲ್‌. ರಾಹುಲ್ ಹಾಗೂ ರೋಹಿತ್ ಶರ್ಮಾ ಮೊದಲ ವಿಕೆಟ್‌ಗೆ 37 ಓವರ್‌ಗಳಲ್ಲಿ 227 ರನ್ ಜೊತೆಯಾಟ ನೀಡಿದರು. ರಾಹುಲ್ 104 ಎಸೆತಗಳಲ್ಲಿ ಮೂರು ಸಿಕ್ಸರ್‌ ಹಾಗು 8 ಬೌಂಡರಿ ಸಹಿತ 102 ರನ್ ಗಳಿಸಿದರೆ, 138 ಎಸೆತಗಳನ್ನು ಆಡಿದ ರೋಹಿತ್ 5 ಸಿಕ್ಸರ್‌ ಮತ್ತು 17 ಬೌಂಡರಿ ಸಹಿತ 159 ರನ್ ಕಲೆ ಹಾಕಿದರು.
ಈ ಶತಕದೊಂದಿಗೆಏಕದಿನ ಕ್ರಿಕೆಟ್‌ನಲ್ಲಿರೋಹಿತ್‌ಗಳಿಸಿದಶತಕಗಳ ಸಂಖ್ಯೆ 28ಕ್ಕೆ ಏರಿದೆ. ಜೊತೆಗೆ ಏಕದಿನ ಕ್ರಿಕೆಟ್‌ನಲ್ಲಿ ಹೆಚ್ಚು ಶತಕ ಗಳಿಸಿದವರ ಪಟ್ಟಿಯಲ್ಲಿ ನಾಲ್ಕನೇ ಸ್ಥಾನಕ್ಕೇರಿದ್ದಾರೆ. ಸಚಿನ್‌ ತೆಂಡೂಲ್ಕರ್‌ (49), ವಿರಾಟ್‌ ಕೊಹ್ಲಿ (43) ಹಾಗೂ ರಿಕಿ ಪಾಂಟಿಂಗ್‌ (30) ಮೊದಲ ಮೂರು ಸ್ಥಾನಗಳಲ್ಲಿದ್ದಾರೆ.
ಅಂತರರಾಷ್ಟ್ರೀಯ ಕ್ರಿಕೆಟ್‌ನಲ್ಲಿ 400ನೇ ಪಂದ್ಯವಾಡಿದ ನಾಯಕ ವಿರಾಟ್‌ ಕೊಹ್ಲಿ ಸೊನ್ನೆ ಸುತ್ತಿದರು. ಮೊದಲ ಪಂದ್ಯದಲ್ಲಿ ಭಾರತಕ್ಕೆ ಆಸರೆಯಾಗಿದ್ದ ಶ್ರೇಯಸ್‌ ಅಯ್ಯರ್‌ ಹಾಗೂ ರಿಷಭ್‌ ಪಂತ್‌ ಮತ್ತೊಮ್ಮೆ ಉತ್ತಮ ಬ್ಯಾಟಿಂಗ್‌ ಮಾಡಿದರು. ಕೊನೆಯಲ್ಲಿ ಅಕ್ಷರಶಃ ಅಬ್ಬರಿಸಿದ ಈ ಜೊಡಿ ಕೇವಲ 24 ಎಸೆತಗಳಲ್ಲಿ 73ಗಳಿಸಿ ತಂಡದ ಮೊತ್ತವನ್ನು 360ರ ಗಡಿ ದಾಟಿಸಿತು.
ಕೇವಲ 16 ಎಸೆತಗಳನ್ನು ಎದುರಿಸಿದ ಪಂತ್‌ 4 ಸಿಕ್ಸರ್‌ ಹಾಗೂ 3 ಬೌಂಡರಿ ಸಹಿತ 39ರನ್ ದೋಚಿದರು. ಅಯ್ಯರ್‌ ಕೇವಲ 32 ಎಸೆತಗಳಲ್ಲಿ 53 ರನ್ ಗಳಿಸಿದರು. ಅಂತಿಮವಾಗಿ ಭಾರತ 387ಕಲೆಹಾಕಿತು.
ವಿಂಡೀಸ್‌ ಪರ ಶೆಲ್ಡನ್‌ ಕಾಟ್ರೆಲ್‌ 2, ಹಾಗೂ ನಾಯಕ ಪೊಲಾರ್ಡ್‌, ಕಿಮೊ ಪಾಲ್‌ಮತ್ತು ಅಲಜಾರಿ ಜೋಸೆಫ್‌ ತಲಾ ಒಂದೊಂದು ವಿಕೆಟ್‌ ಪಡೆದರು.
ತಾಜಾ ಸುದ್ದಿಗಾಗಿ ಪ್ರಜಾವಾಣಿ ಟೆಲಿಗ್ರಾಂ ಚಾನೆಲ್ ಸೇರಿಕೊಳ್ಳಿ | ಪ್ರಜಾವಾಣಿ ಆ್ಯಪ್ ಇಲ್ಲಿದೆ: ಆಂಡ್ರಾಯ್ಡ್ | ಐಒಎಸ್ | ನಮ್ಮ ಫೇಸ್‌ಬುಕ್ ಪುಟ ಫಾಲೋ ಮಾಡಿ.