ಕ್ರಿಕೆಟ್‌ಗೆ ನಮನ್ ಓಜಾ ವಿದಾಯ

ಭೋಪಾಲ್‌: ಭಾರತ ತಂಡದ ಮಾಜಿ ವಿಕೆಟ್ ಕೀಪರ್ ಬ್ಯಾಟ್ಸ್‌ಮನ್‌ ನಮನ್ ಓಜಾ ಅವರು ಸೋಮವಾರ ಎಲ್ಲಾ ಮಾದರಿಯ ಕ್ರಿಕೆಟ್‌ಗೆ ನಿವೃತ್ತಿ ಘೋಷಿಸಿದ್ದಾರೆ.

37ರ ಹರೆಯದ ಓಜಾ ಮಧ್ಯಪ್ರದೇಶದವರು. ಭಾರತ ಕ್ರಿಕೆಟ್‌ ತಂಡದ ಪರ ತಲಾ ಒಂದು ಟೆಸ್ಟ್, ಏಕದಿನ ಪಂದ್ಯ ಮತ್ತು ಎರಡು ಟಿ–20 ಪಂದ್ಯಗಳನ್ನು ಆಡಿದ್ದಾರೆ. 2010ರಲ್ಲಿ ಶ್ರೀಲಂಕಾ ವಿರುದ್ಧದ ಏಕದಿನ ಪಂದ್ಯದ ಮೂಲಕ ಅಂತರರಾಷ್ಟ್ರೀಯ ಕ್ರಿಕೆಟ್‌ಗೆ ಪದಾರ್ಪಣೆ ಮಾಡಿದ್ದರು.ಬಲಗೈ ಬ್ಯಾಟ್ಸ್‌ಮನ್‌ ಆಗಿದ್ದ ಓಜಾ 146 ಪ್ರಥಮ ದರ್ಜೆ ಪಂದ್ಯಗಳಿಂದ 41.67ರ ಸರಾಸರಿಯಲ್ಲಿ 9,753 ರನ್‌ ಕಲೆಹಾಕಿದ್ದಾರೆ. ಅದರಲ್ಲಿ 22 ಶತಕಗಳು ಸೇರಿವೆ.

‘ನಾನು ನಿವೃತ್ತಿ ಹೇಳಬಯಸುತ್ತೇನೆ. ವಿದಾಯ ಹೇಳಲು ಇದು ಸಕಾಲ. ಇದೊಂದು ಸುದೀರ್ಘ ಪಯಣ. ರಾಷ್ಟ್ರೀಯ ಹಾಗೂ ರಾಜ್ಯ ತಂಡವನ್ನು ಪ್ರತಿನಿಧಿಸುವ ಕನಸು ನನಸಾಗಿದೆ. ಇಂತಹ ಅವಕಾಶ ಸಿಕ್ಕಿದ್ದಕ್ಕೆ ಹೆಮ್ಮೆಯಿದೆ‘ ಎಂದು ಪತ್ರಿಕಾಗೋಷ್ಠಿಯಲ್ಲಿ ಓಜಾ ತಿಳಿಸಿದರು.