ವಿಶ್ವ ಶೂಟಿಂಗ್‌: ಗುರ್‌ಪ್ರೀತ್‌ ಸಿಂಗ್‌ಗೆ ಬೆಳ್ಳಿ

ಕೈರೊ: ಒಲಿಂಪಿಯನ್‌ ಗುರ್‌ಪ್ರೀತ್‌ ಸಿಂಗ್‌ ಅವರು ಸೋಮವಾರ ಮುಕ್ತಾಯಗೊಂಡ ಐಎಸ್‌ಎಸ್‌ಎಫ್‌ ಶೂಟಿಂಗ್‌ ವಿಶ್ವ ಚಾಂಪಿಯನ್‌ಷಿಪ್ಸ್‌ನ ಪುರುಷರ 25 ಮೀ. ಸೆಂಟರ್‌ ಫೈರ್‌ ಪಿಸ್ತೂಲ್‌ ಸ್ಪರ್ಧೆಯಲ್ಲಿ ಬೆಳ್ಳಿ ಪದಕ ಜಯಿಸಿದರು.

ಅದರೊಂದಿಗೆ, 13 ಪದಕಗಳನ್ನು (3 ಚಿನ್ನ, 6 ಬೆಳ್ಳಿ, 4 ಕಂಚು) ಗೆದ್ದ ಭಾರತ ತಂಡವು ಪದಕಪಟ್ಟಿಯಲ್ಲಿ ಮೂರನೇ ಸ್ಥಾನದೊಂದಿಗೆ ಅಭಿಯಾನ ಮುಗಿಸಿತು. 21 ಪದಕ (12 ಚಿನ್ನ, 7 ಬೆಳ್ಳಿ, 2 ಕಂಚು) ಗೆದ್ದ ಚೀನಾ ಅಗ್ರಸ್ಥಾನ ಗಳಿಸಿದರೆ, ಕೊರಿಯಾ 14 ಪದಕಗಳೊಂದಿಗೆ (7 ಚಿನ್ನ, 3 ಬೆಳ್ಳಿ, 4 ಕಂಚು) ಎರಡನೇ ಸ್ಥಾನ ತನ್ನದಾಗಿಸಿಕೊಂಡಿತು.

ಗುರ್‌ಪ್ರೀತ್‌ ಅವರು ತೀವ್ರ ಪೈಪೋಟಿಯಿಂದ ಕೂಡಿದ್ದ ಫೈನಲ್‌ನಲ್ಲಿ 584 ಪಾಯಿಂಟ್ಸ್‌ (ಪ್ರಿಸಿಷನ್‌: 288, ರ್‍ಯಾಪಿಡ್‌: 296) ಸಂಪಾದಿಸಿದರು. ಇಷ್ಟೇ ಅಂಕ (ಪ್ರಿಸಿಷನ್‌: 291, ರ್‍ಯಾಪಿಡ್‌: 293) ಪಡೆದಿದ್ದ ಉಕ್ರೇನ್‌ನ ಪಾವ್ಲೊ ಕರೊಸ್ಟಿಲೊವ್‌ ಸ್ವರ್ಣ ತಮ್ಮದಾಗಿಸಿಕೊಂಡರು.

ಫ್ರಾನ್ಸ್‌ನ ಫ್ರೆಡ್ರಿಕಿ ಯಾನ್‌ ಪಿಯರ್‌ ಲೂಯಿಸ್‌ (583 ಪಾಯಿಂಟ್ಸ್‌) ಕಂಚು ಗೆದ್ದರು.

ಸ್ಪರ್ಧೆಯಲ್ಲಿದ್ದ ಭಾರತದ ಮತ್ತೊಬ್ಬ ಶೂಟರ್‌ ಹರ್‌ಪ್ರೀತ್‌ ಸಿಂಗ್‌ (577 ಪಾಯಿಂಟ್ಸ್‌) ಒಂಬತ್ತನೇ ಸ್ಥಾನ ಪಡೆಯುವುದರೊಂದಿಗೆ ಪದಕ ತಪ್ಪಿಸಿಕೊಂಡರು.