ರಾಷ್ಟ್ರೀಯ ಸೀನಿಯರ್ ಬ್ಯಾಸ್ಕೆಟ್‌ಬಾಲ್: ಅರವಿಂದ್ ಚುರುಕಿನ ಆಟಕ್ಕೆ ಒಲಿದ ಜಯ

ಚೆನ್ನೈ: ಕರ್ನಾಟಕ ತಂಡವು ಇಲ್ಲಿ ನಡೆಯುತ್ತಿರುವ 71ನೇ ರಾಷ್ಟ್ರೀಯ ಸೀನಿಯರ್ ಬ್ಯಾಸ್ಕೆಟ್‌ಬಾಲ್ ಚಾಂಪಿಯನ್‌ಷಿಪ್‌ನ ಪುರುಷರ ವಿಬಾಗದಲ್ಲಿ ಬಿ ಗುಂಪಿನಲ್ಲಿ ಎರಡನೇ ಜಯ ದಾಖಲಿಸಿತು. ಆದರೆ, ಕರ್ನಾಟಕ ಮಹಿಳೆಯರ ತಂಡವು ಸೋತಿತು.

ಸೋಮವಾರ ನೆಹರು ಕ್ರೀಡಾಂಗಣದ ಒಳಾಂಗಣದಲ್ಲಿ ನಡೆದ ಪುರುಷರ ವಿಭಾಗದ ಪಂದ್ಯದಲ್ಲಿ ಕರ್ನಾಟಕ ತಂಡವು 86–56 ರಿಂದ ಉತ್ತರ ಪ್ರದೇಶದ ವಿರುದ್ಧ ಗೆದ್ದು ಎರಡನೇ ಸುತ್ತಿಗೆ ಸಾಗಿತು. ಕರ್ನಾಟಕ ತಂಡದ ಅರವಿಂದ್ (20), ಅನಿಲ್ ಕುಮಾರ್ (18), ಅಭಿಷೇಕ್ ಗೌಡ (14), ಪ್ರತ್ಯಾಂಶು ತೋಮರ್ (11) ಮಿಂಚಿದರು. ಉತ್ತರ ಪ್ರದೇಶ ತಂಡದ ಹರ್ಷ ಡಾಗರ್ 13 ಮತ್ತು ವಿಶಾಲ್ ಎಂ ಕುಮಾರ್ 10 ಅಂಕಗಳನ್ನು ಗಳಿಸಿದರು.

ಕರ್ನಾಟಕ ತಂಡವು ಮಂಗಳವಾರ ಗುಂಪು ಹಂತದ ಕೊನೆಯ ಪಂದ್ಯದಲ್ಲಿ ರಾಜಸ್ಥಾನ ತಂಡವನ್ನು ಎದುರಿಸಲಿದೆ.

ಇನ್ನುಳಿದ ಪಂದ್ಯಗಳಲ್ಲಿ ಪಂಜಾಬ್ ತಂಡವು 90 –50ರಿಂದ ಕೇರಳ ವಿರುದ್ಧ; ತಮಿಳುನಾಡು 90–50ರಿಂದ ಮಿಜೋರಾಂ ವಿರುದ್ಧ; ಇಂಡಿಯನ್ ರೇಲ್ವೆಸ್ 81–70ರಿಂದ ಹರಿಯಾಣ ಎದುರು; ಸರ್ವಿಸಸ್ 100–73ರಿಂದ ರಾಜಸ್ಥಾನ ಎದುರು ಗೆಲುವು ಸಾಧಿಸಿದವು.

ಮಹಿಳೆಯರ ವಿಭಾಗದಲ್ಲಿ ಕರ್ನಾಟಕ ತಂಡವು ಎರಡನೇ ಪಂದ್ಯದಲ್ಲಿ 72–79ರಿಂದ ಪಂಜಾಬ್ ವಿರುದ್ಧ ಸೋತಿತು. ಪಂಜಾಬ್ ತಂಡದ ಕಾವ್ಯಾ ಸಿಂಘಾಲ 21, ಕನಿಷ್ಕಾ ಧೀರ್ 25 ಮತ್ತು ರಿತಿಕಾ 13 ಅಂಕಗಳನ್ನು ಗಳಿಸಿದರು. ಕರ್ನಾಟಕದ ವರ್ಷಾ ನಂದಿನಿ 32 ಮತ್ತು ಲೋಪಮುದ್ರಾ 19 ಅಂಕಗಳನ್ನು ಗಳಿಸಿದರು.

ಕೇರಳ ತಂಡವು 56–34ರಿಂದ ಮಧ್ಯಪ್ರದೇಶ ಎದುರು ಜಯಿಸಿತು.