ಪಾಕ್ ಮೇಲೆ ಗೆದ್ದ ಭಾರತಕ್ಕೆ ಕಂಚು

ಜೊಹೋರ್ ಬಹ್ರು (ಮಲೇಷ್ಯಾ),: ಗೋಲ್‌ಕೀಪರ್‌ ಎಚ್‌.ಎಸ್‌.ಮೋಹಿತ್ ಅವರು ಪೆನಾಲ್ಟಿ ಶೂಟೌಟ್‌ನಲ್ಲಿ ನಿರ್ಣಾಯಕ ತಡೆ ಪ್ರದರ್ಶಿಸಿ ಭಾರತ ಜೂನಿಯರ್ ತಂಡ 6–5 ಗೋಲುಗಳಿಂದ ಬದ್ಧ ಎದುರಾಳಿ ಪಾಕಿಸ್ತಾನ ತಂಡವನ್ನು ಸೋಲಿಸುವಲ್ಲಿ ನೆರವಾದರು. ಭಾರತ ಈ ಗೆಲುವಿನೊಡನೆ ಕಂಚಿನ ಪದಕ ಪಡೆಯಿತು.

ನಿಗದಿ ಅವಧಿಯ ಆಟದಲ್ಲಿ ಸ್ಕೋರ್ 3–3 ಗೋಲುಗಳಿಂದ ಸಮನಾಗಿತ್ತು. ಅರುಣ್ ಸಹಾನಿ (11ನೇ ನಿಮಿಷ), ಪೂವಣ್ಣ ಸಿ.ಬಿ. (42ನೇ) ಮತ್ತು ನಾಯಕ ಉತ್ತಮ್‌ ಸಿಂಗ್ (52ನೇ) ಭಾರತದ ಪರ ಗೋಲು ಗಳಿಸಿದರು. ಪಾಕ್ ಪರ ಸುಫ್ಯಾನ್ ಖಾನ್ (33ನೇ), ಅಬ್ದುಲ್ ಖಯ್ಯೂಮ್ (50ನೇ) ಮತ್ತು ನಾಯಕ ಶಾಹಿದ್ ಹನ್ನನ್ (57ನೇ) ಚೆಂಡನ್ನು ಗುರಿಮುಟ್ಟಿಸಿದರು.

ಪೆನಾಲ್ಟಿ ಶೂಟೌಟ್‌ ‘ಸಡನ್‌ ಡೆತ್‌’ಗೂ ಬೆಳೆಯಿತು. ಈ ವೇಳೆ ಮೋಹಿತ್ ಅವರು ಹನ್ನನ್ ಯತ್ನವನ್ನು ಪರಿಪೂರ್ಣವಾಗಿ ತಡೆದು ಗೆಲುವಿಗೆ ಕಾರಣಕರ್ತರಾದರು.