ಪ್ರೊ ಕಬಡ್ಡಿ: ದಬಾಂಗ್‌ ಅಜೇಯ ಓಟಕ್ಕೆ ಪಟ್ನಾ ತಡೆ

ಜೈಪುರ: ಅಂಕಿತ್ ಕುಮಾರ್ ರಾಣಾ ಅವರ ಅಮೋಘ ರೇಡಿಂಗ್‌ ಬಲದಿಂದ ಪಟ್ನಾ ಪೈರೇಟ್ಸ್‌ ತಂಡವು ಶನಿವಾರ ಪ್ರೊ ಕಬಡ್ಡಿ ಲೀಗ್‌ನಲ್ಲಿ 3 ಅಂಕಗಳಿಂದ ಡೆಲ್ಲಿ ಡಬಂಗ್‌ ತಂಡವನ್ನು ಮಣಿಸಿತು. ಇದರೊಂದಿಗೆ ದಬಂಗ್‌ ತಂಡದ ಅಜೇಯ ಓಟಕ್ಕೂ ತಡೆಬಿತ್ತು.

ಸವಾಯಿ ಮಾನ್‌ಸಿಂಗ್‌ ಕ್ರೀಡಾಂಗಣದಲ್ಲಿ ನಡೆಯುತ್ತಿರುವ ‘ಸಾಂಪ್ರದಾಯಿಕ ಎದುರಾಳಿಗಳ ಸಪ್ತಾಹ’ದ (ರೈವಲರಿ ವೀಕ್‌) ಹಣಾಹಣಿಯಲ್ಲಿ ಪಟ್ನಾ ತಂಡವು 33–30ರಿಂದ ದಬಂಗ್‌ ತಂಡವನ್ನು ಸದೆಬಡಿಯಿತು.

ಪಂದ್ಯದ ಮೊದಲಾರ್ಧದಲ್ಲಿ 9 ಅಂಕಗಳಿಂದ (10–19) ಹಿನ್ನಡೆಯಲ್ಲಿದ್ದ ಪಟ್ನಾ ತಂಡವು ದ್ವಿತೀಯಾರ್ಧದಲ್ಲಿ ಮರುಹೋರಾಟ ಸಂಘಟಿಸಿ ಗೆಲುವು ಸಾಧಿಸಿತು. ಅಂಕಿತ್ 12 ಅಂಕ ಗಳಿಸಿ ಮಿಂಚಿದರು. ದಬಾಂಗ್‌ ಪರ ನೀರಜ್‌ ನರ್ವಾಲ್‌ 8 ಅಂಕ ಕಲೆ ಹಾಕಿದರು.

ಏಳು ಪಂದ್ಯಗಳಲ್ಲಿ ಪಟ್ನಾ ತಂಡಕ್ಕೆ ಇದು ಎರಡನೇ ಗೆಲುವಾಗಿದೆ. ಸತತ ಆರು ಪಂದ್ಯ ಗೆದ್ದ ದಬಂಗ್‌ ತಂಡಕ್ಕೆ ಇದು ಮೊದಲ ಸೋಲಾಗಿದೆ.

ದಿನದ ಮತ್ತೊಂದು ಪಂದ್ಯದಲ್ಲಿ ಹರಿಯಾಣ ಸ್ಟೀಲರ್ಸ್‌ ತಂಡವು ತಮಿಳು ತಲೈವಾಸ್‌ ತಂಡವನ್ನು ಸೋಲಿಸಿ ಸತತ ನಾಲ್ಕನೇ ಗೆಲುವು ದಾಖಲಿಸಿತು.