ನವದೆಹಲಿ: ಟರ್ಕಿಯಲ್ಲಿ ನಡೆದ ತರಬೇತಿ ಶಿಬಿರದಲ್ಲಿ ಪಾಲ್ಗೊಂಡು ವಾಪಸಾಗಿರುವ ಜಾವೆಲಿನ್ ಎಸೆತಗಾರ ನೀರಜ್ ಚೋಪ್ರಾ ಅವರಿಗೆ 14 ದಿನ ಪಟಿಯಾಲದ ರಾಷ್ಟ್ರೀಯ ಕ್ರೀಡಾಸಂಸ್ಥೆಯ (ಎನ್ಐಎಸ್) ಒಳಗೇ ಇರುವಂತೆ ಭಾರತ ಕ್ರೀಡಾ ಪ್ರಾಧಿಕಾರ (ಸಾಯ್) ಶುಕ್ರವಾರ ಸೂಚಿಸಿದೆ.
ಸಂಸ್ಥೆಯ ಆವರಣದಲ್ಲಿರುವ ವಸತಿನಿಲಯದ ಕೊಠಡಿಯಲ್ಲಿ ಅವರು ಸ್ವಯಂ ಪ್ರತ್ಯೇಕತಾವಾಸದಲ್ಲಿ ಇರಬೇಕು. ಯಾರೊಂದಿಗೂ ಬೆರೆಯಬಾರದು ಎಂದು ಸೂಚಿಸಲಾಗಿದೆ. ನೀರಜ್ ಚೋಪ್ರಾ ಟೋಕಿಯೊ ಒಲಿಂಪಿಕ್ಸ್ಗೆ ಈಗಾಗಲೇ ಅರ್ಹತೆ ಗಳಿಸಿದ್ದಾರೆ. ಬುಧವಾರ ಟರ್ಕಿಯಿಂದ ವಾಪಸಾಗಿದ್ದರು.
ಮನೆಯಲ್ಲೇ ಇರುವುದಾಗಿ ಹೇಳಿರುವ ಮತ್ತೊಬ್ಬ ಜಾವೆಲಿನ್ ಥ್ರೋ ಪಟು ಶಿವಪಾಲ್ ಸಿಂಗ್ ಎನ್ಐಎಸ್ ತೊರೆದಿದ್ದಾರೆ. ಅವರು ಕೂಡ ಒಲಿಂಪಿಕ್ಸ್ಗೆ ಅರ್ಹತೆ ಗಳಿಸಿದ್ದಾರೆ.
ಟರ್ಕಿಯಿಂದ ವಾಪಸಾಗಿರುವ ನೀರಜ್ ಮತ್ತು ರೋಹಿತ್ ಯಾದವ್ ಅವರಿಗೆ ಪ್ರತ್ಯೇಕ ಕೊಠಡಿಗಳನ್ನು ನೀಡಲಾಗಿದೆ. ಎನ್ಐಎಸ್ನಲ್ಲಿ ಇರಬೇಕಾದರೆ ಅವರು 14 ದಿನ ಕೊಠಡಿಯಿಂದ ಹೊರಬರುವಂತಿಲ್ಲ. ಕೊಠಡಿಯ ಸಮೀಪದಲ್ಲೇ ಇರುವ ಹಳೆಯ ಜಿಮ್ಅನ್ನುಅವರ ವ್ಯಾಯಾಮಕ್ಕಾಗಿ ಒದಗಿಸಲಾಗಿದೆ’ ಎಂದು ಎನ್ಐಎಸ್ ಅಧಿಕಾರಿಗಳು ಸುದ್ದಿಸಂಸ್ಥೆಗೆ ತಿಳಿಸಿದ್ದಾರೆ.
‘ನೀರಜ್ ಒಳಗೊಂಡಂತೆ ವಿದೇಶದಿಂದ ವಾಪಸಾಗಿರುವ ಕ್ರೀಡಾಪಟುಗಳನ್ನು ಇಂದಿರಾಗಾಂಧಿ ಅಂತರರಾಷ್ಟ್ರೀಯ ವಿಮಾನನಿಲ್ದಾಣದಲ್ಲಿ ತಪಾಸಣೆಗೆ ಒಳಪಡಿಸಲಾಗಿದೆ. ಆದರೂ ಅವರೆಲ್ಲರೂ 14 ದಿನ ಸ್ವಯಂ ಪ್ರತ್ಯೇಕತಾವಾಸದಲ್ಲಿ ಇರುವಂತೆ ಸೂಚಿಸಲಾಗಿದೆ’ ಎಂದು ಸಾಯ್ ಮೂಲಗಳು ವಿವರಿಸಿವೆ.
ತಾಜಾ ಸುದ್ದಿಗಾಗಿ ಪ್ರಜಾವಾಣಿ ಟೆಲಿಗ್ರಾಂ ಚಾನೆಲ್ ಸೇರಿಕೊಳ್ಳಿ | ಪ್ರಜಾವಾಣಿ ಆ್ಯಪ್ ಇಲ್ಲಿದೆ: ಆಂಡ್ರಾಯ್ಡ್ | ಐಒಎಸ್ | ನಮ್ಮ ಫೇಸ್ಬುಕ್ ಪುಟ ಫಾಲೋ ಮಾಡಿ.