65 ವರ್ಷಗಳ ಕಾಲ ಒಂದೇ ಕಂಪನಿಯಲ್ಲಿ ಕೆಲಸ ಮಾಡಿ ಗಿನ್ನಿಸ್‌ ದಾಖಲೆ ಬರೆದ ಮಹಿಳೆ !

ಸಾಮಾನ್ಯವಾಗಿ 60 ವರ್ಷ ಆದಮೇಲೆ ಸರ್ಕಾರಿ ಕೆಲಸದಿಂದ ನಿವೃತ್ತಿಯನ್ನು ಪಡೆಯುತ್ತೇವೆ. ಇದು ಸರ್ಕಾರದ ನಿಯಮವೂ ಆಗಿದೆ. ಒಂದು ವೇಳೆ ಖಾಸಗಿ ಕೆಲಸದಲ್ಲಿದ್ದರೂ ಹೆಚ್ಚೆಂದರೆ, ಐದಾರು ವರ್ಷ ಸ್ವ–ಆಸಕ್ತಿಯಿಂದ ಕೆಲಸ ಮಾಡಬಹುದು. ಕೆಲವೊಮ್ಮೆ ಕಂಪನಿಯನ್ನು ಬದಲಿಸುತ್ತೇವೆ. ಆದರೆ 90 ವರ್ಷವಾದರೂ ಒಂದೇ ಕಚೇರಿಯ ವ್ಯವಸ್ಥಾಪಕಿಯಾಗಿ ಕಾರ್ಯನಿರ್ವಹಿಸಿದ ಜಪಾನಿನ ತಮಕಿ ಎನ್ನುವ ಮಹಿಳೆಯ ವೃತ್ತಿ ಜೀವನದ ಕಥೆ ನಿಜಕ್ಕೂ ಸ್ಪೂರ್ತಿದಾಯಕವಾಗಿದೆ.

ತಮಕಿ ಅವರು ಒಸಾಕಾದಲ್ಲಿರುವ ‘ಸನ್‌ಕೊ ಇಂಡಸ್ಟ್ರೀಸ್‌’ನಲ್ಲಿ 65 ವರ್ಷಗಳಿಗೂ ಹೆಚ್ಚು ಕಾಲ ಕೆಲಸ ಮಾಡಿದ್ದಾರೆ. ತಮ್ಮ 26ನೇ ವಯಸ್ಸಿನಲ್ಲಿ ಈ ಕಂಪನಿಯಲ್ಲಿ ಕೆಲಸ ಆರಂಭಿಸಿ 91ನೇ ವಯಸ್ಸಿನವರೆಗೂ ಕೆಲಸ ಮಾಡಿದ್ದಾರೆ. ಅವರು ಪ್ರತಿದಿನ ಬೆಳಿಗ್ಗೆ 5:30ರಿಂದ ಸಂಜೆ 5:30ರ ವರೆಗೆ ಕೆಲಸ ಮಾಡುತ್ತಿದ್ದರು. 

ಗಿನ್ನೆಸ್‌ನ ವರದಿಯಂತೆ, ‘ತಮಕಿ ಅವರಿಗೆ ನಿವೃತ್ತಿ ಹೊಂದುವ ಬಗ್ಗೆ ಯೋಜನೆ ಇಲ್ಲ. ಅವರು ಸನ್‌ಕೋ ಇಂಡಸ್ಟ್ರೀಸ್‌ನಲ್ಲಿ ವಾರದಲ್ಲಿ ಐದು ದಿನ ಕೆಲಸ ಮಾಡುತ್ತಾರೆ. ಪ್ರತಿದಿನ 7.5 ಗಂಟೆ ಕೆಲಸ ಮಾಡುತ್ತಾರೆ. ಅವರು ತಮ್ಮ ಸಹೋದ್ಯೋಗಿಗಳಿಗೆ ‘ನೀವು ಈ ದಿನವನ್ನು ವ್ಯರ್ಥ ಮಾಡಿದರೆ, ನಾಳೆ ಇರುವುದಿಲ್ಲ’ ಎಂದು ಸಲಹೆ ನೀಡುತ್ತಾರೆ.

ವರದಿಗಳ ಪ್ರಕಾರ ತಮಕಿ ತಮ್ಮ ಅಧಿಕಾರವಧಿಯಲ್ಲಿ ತಮ್ಮ ಸಹೋದ್ಯೋಗಿಗಳ ಹಿತವನ್ನು ಬಯಸುತ್ತಿದ್ದರು. ಸಾಧ್ಯವಾದಷ್ಟು ಎಲ್ಲರೊಂದಿಗೆ ಸಮಯ ಕಳೆಯುತ್ತಿದ್ದರು. ಅಲ್ಲದೇ ಅವರನ್ನು ಖುಷಿ ಪಡಿಸುತ್ತಿದ್ದರು. ಇದು ಅವರ ಜೀವಮಾನದ ಗುರಿಯಾಗಿದೆ. ‘ಒಂದು ವರ್ಷ ಮುಗಿದ ನಂತರ ಇನ್ನೊಂದು ವರ್ಷ ಆರಂಭವಾಗುತ್ತದೆ. ಹಾಗೆಯೇ ನಾನು ನನ್ನ ಕೆಲಸವನ್ನು ಮುಂದುವರಿಸಲು ಬಯಸುತ್ತೇನೆ’ ಎಂದು ಅವರು ಹೇಳುತ್ತಿದ್ದರು.

ತಮಕಿ ಅವರು ಕಚೇರಿಯ ಲೆಕ್ಕಪತ್ರ, ಉದ್ಯೋಗಿಗಳ ಸಂಬಳ, ಬೋನಸ್‌ ಮತ್ತು ತೆರಿಗೆ ಕಡಿತಗಳಿಗೆ ಸಂಬಂಧಿಸಿದ ಲೆಕ್ಕಾಚಾರಗಳನ್ನು ನಿರ್ವಹಿಸುತ್ತಿದ್ದರು. ಅವರಿಗೆ ಸ್ಪ್ರೆಡ್‌ಶೀಟ್‌ ಹಾಗೂ ಅಪ್ಲಿಕೇಶನ್‌ಗಳ ಬಳಕೆಯ ಪರಿಚಯವಿತ್ತು. 

ಈ ಕುರಿತು ಸಾಮಾಜಿಕ ಮಾಧ್ಯಮದಲ್ಲಿ ವಿಡಿಯೊವೊಂದನ್ನು ಹಂಚಿಕೊಳ್ಳಲಾಗಿದ್ದು, ಹಲವರು ಪ್ರತಿಕ್ರಿಯೆ ನೀಡಿದ್ದಾರೆ. ‘ಒಂದೇ ಕುರ್ಚಿಯಲ್ಲಿ 65 ವರ್ಷಗಳು, ಒಂದೇ ಸಮಯ, ಒಂದೇ ಕಂಪನಿ. ಇದು ಸಮರ್ಪಣೆಯಲ್ಲ, ದಾಖಲೆಯ ವೇಷದಲ್ಲಿರುವ ಜೀವಾವಧಿ ಶಿಕ್ಷೆ’, ‘ನಿಮ್ಮ ಕೆಲಸ ಪ್ರೀತಿಸುವುದು ಒಂದು ವಿಷಯ. ಆದರೆ ಬಡ್ತಿ ಅಥವಾ ಬದಲಾವಣೆಗಳಿಲ್ಲದೆ ದಶಕಗಳ ಕಾಲ ಒಂದೇ ಸ್ಥಾನದಲ್ಲಿ ಉಳಿಯುವುದು ಕಠಿಣ ವ್ಯವಸ್ಥೆಯನ್ನು ಸೂಚಿಸುತ್ತದೆ’ ಎಂದು ಬರೆದಿದ್ದಾರೆ.