ಸೌಂದರ್ಯ ಸ್ಪರ್ಧೆಯ ವೇಷಭೂಷಣ: ಜಗದೇಕ ಉಡುಪು; ಅತಿಲೋಕ ಸುಂದರಿ!

ಭಾರತ | ಮಣಿಕಾ ವಿಶ್ವಕರ್ಮ

ಭಾರತದಲ್ಲಿ ಬೌದ್ಧಧರ್ಮದ ಉಗಮವನ್ನು ಸಂಕೇತಿಸಿದ ಮಣಿಕಾ ವಿಶ್ವಕರ್ಮ ಅವರ ದಿರಿಸು ಭಾರಿ ಗಮನಸೆಳೆಯಿತು. ಬೌದ್ಧ ಧರ್ಮದ ಹುಟ್ಟು ಹಾಗೂ ಬುದ್ಧನಿಗೆ ಜ್ಞಾನೋದಯವಾದ ಕ್ಷಣಗಳನ್ನು ಈ ಪೋಷಾಕು ಸೂಚಿಸುತ್ತಿತ್ತು. ದೇಶದ ಪ್ರಾಚೀನ ದೇಗುಲಗಳ ವಾಸ್ತುಶಿಲ್ಪದ ಪ್ರೇರಣೆಯಿಂದ ವಿನ್ಯಾಸಗೊಂಡ ಈ ಉಡುಪಿನಲ್ಲಿನ ಮಿರುಗುವ ಬಂಗಾರ ಮತ್ತು ಕೇಸರಿ ಬಣ್ಣಗಳು ಪರಿಶುದ್ಧತೆ, ದಿವ್ಯತೆ ಹಾಗೂ ಜ್ಞಾನದ ಸೂಚಕವಾಗಿದ್ದವು. ಜೊತೆಗೆ, ಬೌದ್ಧರ ಪ್ರಸಿದ್ದ ಪವಿತ್ರ ಕ್ಷೇತ್ರಗಳಾದ ಸಾಂಚಿ ಮತ್ತು ಬೋಧಗಯಾದ ಸುವರ್ಣ ಶಿಖರಗಳು ಹಾಗೂ ಸ್ತೂಪಗಳನ್ನು ಹೋಲುವ ರೀತಿಯಲ್ಲಿ ಇದನ್ನು ವಿನ್ಯಾಸಗೊಳಿಸಲಾಗಿತ್ತು.

ಬುದ್ಧನು ನಿರ್ವಾಣ ಪಡೆದ ಸ್ಥಳವಾದ ಬೋಧಿವೃಕ್ಷದ ಎಲೆಗಳು, ಪೋಷಾಕಿನ ಮಧ್ಯಭಾಗದಲ್ಲಿದ್ದ ಧರ್ಮಚಕ್ರವು ಹುಟ್ಟು, ನೈತಿಕ ಮೌಲ್ಯಗಳು ಹಾಗೂ ಅಷ್ಟಾಂಗ ಮಾರ್ಗವನ್ನು ಪ್ರತಿನಿಧಿಸಿದವು. ಜೊತೆಗೆ, ಇದು ಬುದ್ಧನ ಬೋಧನೆಗಳು ಭಾರತದಿಂದ ಪ್ರಪಂಚದ ಬೇರೆಡೆಗಳಿಗೆ ಪಸರಿಸಿದ್ದನ್ನು ಸೂಚಿಸಿತು. ಪೋಷಾಕಿನ ಶಿರೋಧಾರಣೆಯು ದೇವಾಲಯಗಳ ಶಿಖರ ಹಾಗೂ ಅದರ ಶೃಂಗ ಭಾಗದಲ್ಲಿನ ತಾವರೆ ಹೂವಿನ ವಿನ್ಯಾಸವು ಪರಿಶುದ್ಧತೆಯ ಪ್ರತೀಕಗಳಾಗಿದ್ದವು.

ಕೊನೆಗೆ, ಅಂಜಲಿ ಮುದ್ರೆಯೊಂದಿಗೆ ಮಣಿಕಾ ಪ್ರಣಾಮಗಳನ್ನು ಸಲ್ಲಿಸಿದ್ದು ಶಾಂತಿ, ಗೌರವ ಹಾಗೂ ಏಕತೆಯ ಸಂಕೇತವಾಗಿತ್ತು. ಭಾರತವು ಬೌದ್ಧಧರ್ಮ ಉಗಮಿಸಿದ ನಾಡು ಮಾತ್ರವಲ್ಲ, ಪ್ರಪಂಚದೆಲ್ಲೆಡೆಗೆ ಆಧ್ಯಾತ್ಮಿಕ ಚಿಂತನೆಯನ್ನು ಪ್ರೇರೇಪಿಸಿದ ನಾಡು ಎಂಬುದನ್ನೂ ಸೂಚಿಸಿತು.

ರಾಜಸ್ಥಾನ ಮೂಲದ ಮಣಿಕಾ, ಪ್ರಸ್ತುತ ದೆಹಲಿಯಲ್ಲಿ ಪದವಿ ಅಂತಿಮ ವರ್ಷದಲ್ಲಿ ಓದುತ್ತಿದ್ದು, ನೃತ್ಯಪಟು ಸಹ ಆಗಿದ್ದಾರೆ.

ಶ್ರೀಲಂಕಾ | ಲಿಹಾಶಾ ಲಿಂಡ್ಸೆ ವೈಟ್‌

ಹಬೆ ಉಕ್ಕಿಸುತ್ತಿದ್ದ ಹಿತ್ತಾಳೆ ವರ್ಣದ ಬೃಹತ್‌ ಟೀ ಕೆಟಲ್‌ ಮಾದರಿಯ ಗಾಡಿಯನ್ನು, ಮುಗುಳ್ನಗುತ್ತಾ ನಾಜೂಕಿನಿಂದ ತಳ್ಳಿಕೊಂಡು ಬಂದವರು ಶ್ರೀಲಂಕಾದ ಬೆಡಗಿ ಲಿಹಾಶಾ ಲಿಂಡ್ಸೆ ವೈಟ್‌. ತಮ್ಮ ದೇಶದ ಆದರಾತಿಥ್ಯದ ರುಚಿಯನ್ನು ತಮ್ಮ ಹಾವಭಾವಗಳಲ್ಲೇ ಪ್ರೇಕ್ಷಕರಿಗೆ ಉಣಬಡಿಸುವಲ್ಲಿ ಅವರು ಸಫಲರಾದರು.

ಜಗತ್ತಿನ ಅತಿ ದೊಡ್ಡ ಟೀ ಉತ್ಪಾದಕ ರಾಷ್ಟ್ರಗಳಲ್ಲಿ ಒಂದಾಗಿರುವ ಶ್ರೀಲಂಕಾದ ‘ಸಿಲೋನ್‌ ಟೀ’ ಜಗತ್ಪ್ರಸಿದ್ಧವಾಗಿದೆ. ಲಿಹಾಶಾ ವೇದಿಕೆಗೆ ತಂದು ನಿಲ್ಲಿಸಿದ ಈ ಕೆಟಲ್‌, ಮೇಲ್ನೋಟಕ್ಕೆ ಸಾಧಾರಣವಾಗಿ ಕಂಡರೂ ಮಹತ್ವದ ಉದ್ದೇಶಗಳನ್ನೇ ಧ್ವನಿಸುವಂತಿತ್ತು.

ಬಿಸಿ ಬಿಸಿ ಚಹಾ ನೀಡಿ ಪ್ರವಾಸಿಗರನ್ನು ತಮ್ಮ ದೇಶಕ್ಕೆ ಸ್ವಾಗತಿಸುವ ಮತ್ತು ಹಾಗೆ ಬಂದವರಿಗೆ ತಮ್ಮಲ್ಲಿ ಸಿಗುವ ಅತಿಥಿ ಸತ್ಕಾರದ ಸವಿರುಚಿಯನ್ನು ಮನವರಿಕೆ ಮಾಡಿಕೊಡುವ ರಾಯಭಾರಿಯಂತೆ ಲಿಹಾಶಾ ಕಂಡರು. ಅಂದಹಾಗೆ, ಈ ವಸ್ತ್ರವಿನ್ಯಾಸವನ್ನು ರೂಪಿಸಿದವರು ರಮೇಶ ಓಶನಿ.

ಇಂಟರ್‌ನ್ಯಾಷನಲ್‌ ಬಿಸಿನೆಸ್‌ ಮ್ಯಾನೇಜ್‌ಮೆಂಟ್‌ನಲ್ಲಿ ಪದವಿ ಪಡೆದಿರುವ 27 ವರ್ಷದ ಲಿಹಾಶಾ, ತಮ್ಮ ಕುಟುಂಬದ ಕಂಪನಿಯಲ್ಲಿ ಆಪರೇಷನ್ಸ್‌ ಮ್ಯಾನೇಜರ್‌ ಆಗಿ ಕಾರ್ಯ ನಿರ್ವಹಿಸುತ್ತಿದ್ದಾರೆ.

ಅರ್ಜೆಂಟಿನಾ | ಅಲ್ದಾನಾ ಮಸೆಟ್‌

20ನೇ ಶತಮಾನದ ಅತ್ಯಂತ ಪ್ರಮುಖ ಜನಪದ ಗಾಯಕರಲ್ಲಿ ಒಬ್ಬರಾದ, ಅರ್ಜೆಂಟಿನಾದ ದಿ. ಅತವಲ್ಪ ಯುಪಾಂಖಿ ಅವರ ಗೌರವಾರ್ಥವಾಗಿ ಈ ವೇಷಭೂಷಣವನ್ನು ಸಿದ್ಧಪಡಿಸಲಾಗಿತ್ತು.

ಬೆನ್ನಿನ ಮೇಲೆ ಬಿಗಿಯಾಗಿ ನಿಲ್ಲಿಸಲಾಗಿದ್ದ ಎರಡು ಗಿಟಾರ್‌ಗಳು, ಈಜುಡುಗೆ ಮಾದರಿಯ ಚಿನ್ನದ ಬಣ್ಣದ ಉಡುಪು, ಶಿಖೆಯನ್ನು ಅಲಂಕರಿಸಿದ್ದ ಕೆಂಪು, ಕೇಸರಿ ವರ್ಣದ ಗರಿಗಳ ತುರಾಯಿ, ಮಂಡಿಯವರೆಗೆ ಲಕಲಕಿಸುತ್ತಿದ್ದ ಬೂಟ್ಸುಗಳು, ಇಳಿಬಿದ್ದಿದ್ದ ಉದ್ದನೆಯ ಮೇಲಂಗಿಯನ್ನು ಕೈಯಲ್ಲಿ ಹಿಡಿದು ಹಾಡುತ್ತಾ ಬಂದ ಅಲ್ದಾನಾ ಧರೆಗಿಳಿದ ಅಪ್ಸರೆಯಂತೆ ಕಂಗೊಳಿಸಿದರು. ಸ್ವತಃ ಮೂರು ವಾದ್ಯಗಳನ್ನು ನುಡಿಸಬಲ್ಲ 25 ವರ್ಷದ ಅಲ್ದಾನಾ, ಅರ್ಜೆಂಟಿನಾ ಸಂಸ್ಕೃತಿಯ ಪ್ರತೀಕದಂತಿದ್ದ ಗೀತರಚನೆಕಾರ, ಗಿಟಾರ್‌ ವಾದಕ ಯುಪಾಂಖಿ ಅವರ ಕಲೆಗೆ ನಮನ ಸಲ್ಲಿಸಿದ ಪರಿ ಹೀಗಿತ್ತು.

ಬಾಂಗ್ಲಾದೇಶ | ತಾಂಗಿಯಾ ಜಮಾನ್‌ ಮೆಥಿಲಾ

ಮಿರಿಮಿರಿ ಮಿರುಗುತ್ತಿದ್ದ ರತ್ನವರ್ಣದ ಜರಿಯ ಬೃಹತ್‌ ತಾವರೆಯನ್ನು ಬೆನ್ನಿಗಾನಿಸಿಕೊಂಡು, ಶ್ವೇತವಸ್ತ್ರಧಾರಿಯೊಬ್ಬಳು ಸೊಂಟ ಬಳುಕಿಸುತ್ತಾ ಬಂದು ತಮ್ಮೆದುರು ನಿಂತಾಗ, ‍ಪ್ರೇಕ್ಷಕರು ಅದರಲ್ಲೂ ಭಾರತೀಯರು ನಿಬ್ಬೆರಗಾದರು. ಮನಮೋಹಕ ತಾವರೆಯ ಹೂವೊಂದು ಸದ್ದಿಲ್ಲದೇ ಅರಳಿ ನಿಂತಂತೆ, ಅದರೊಳಗಿಂದ ಸಾಕ್ಷಾತ್‌ ಸರಸ್ವತಿಯೇ ಎದ್ದು ಬಂದಂತೆ ಭಾಸವಾಗುತ್ತಿದ್ದರೂ ಆಕೆ ಪ್ರತಿನಿಧಿಸುತ್ತಿದ್ದುದು ಬಾಂಗ್ಲಾದೇಶವನ್ನು ಎಂಬುದು ತಿಳಿದಾಗ ಅಚ್ಚರಿಗೆ ಒಳಗಾದರು.

ತಾಂಗಿಯಾ ಜಮಾನ್‌ ಮೆಥಿಲಾ ತೊಟ್ಟಿದ್ದುದು ಬಾಂಗ್ಲಾದೇಶದ ಜಗತ್ಪ್ರಸಿದ್ಧ ಜಾಮದಾನಿ ಸೀರೆಯನ್ನು, ಜೊತೆಗೆ ಆಕೆಯ ಬೆನ್ನಿಗಿದ್ದುದು ಆ ದೇಶದ ರಾಷ್ಟ್ರೀಯ ಪುಷ್ಪವಾದ ವಾಟರ್‌ಲಿಲ್ಲಿ. ಆದರೆ ನೋಡಿದ ಕೂಡಲೇ ಕಮಲದಂತೆ ತೋರುವ ವಾಟರ್‌ಲಿಲ್ಲಿ ಮತ್ತು ಹಿಂದೂ ದೇವತೆಯನ್ನು ಹೋಲುವ ವಸ್ತ್ರಾಭರಣ ನಂತರ ಸಾಮಾಜಿಕ ಮಾಧ್ಯಮದಲ್ಲಿ ಭಾರಿ ಸದ್ದು ಮಾಡಿದವು. ಈ ಸೀರೆಯನ್ನು ನೇಯಲು ನಿಪುಣ ನೇಕಾರರಿಗೆ 120 ದಿನಗಳೇ ಬೇಕಾಗಿದ್ದವು. ‘17ನೇ ಶತಮಾನದ ಮೊಘಲರ ಸಾಮ್ರಾಜ್ಯದಲ್ಲಿ ರಾಣಿಯರು ಮತ್ತು ರಾಜಮನೆತನಕ್ಕೆ ಸೇರಿದವರು ಧರಿಸುತ್ತಿದ್ದ ರೀತಿಯ ದಿರಿಸಿದು ಎನ್ನುತ್ತೀರಿ, ಆದರೆ ನಿಮ್ಮ ಈ ಸೀರೆ, ಕಮಲ, ಒಡವೆ ಎಲ್ಲವೂ ನಮ್ಮ ಹಿಂದೂ ದೇವತೆ ಸರಸ್ವತಿಯ ಪ್ರತಿರೂಪದಂತಿವೆ’ಎಂದು ಭಾರತೀಯ ನೆಟ್ಟಿಗರು ಅವರ ಕಾಲೆಳೆಯದೇ ಬಿಡಲಿಲ್ಲ.

2020ರಲ್ಲಿ ‘ಮಿಸ್‌ ಯೂನಿವರ್ಸ್‌ ಬಾಂಗ್ಲಾದೇಶ್‌’ ಆಗುವ ಮೂಲಕ ಭುವನ ಸುಂದರಿ ಸ್ಪರ್ಧೆಯಲ್ಲಿ ಪಾಲ್ಗೊಳ್ಳಲು ಮೆಥಿಲಾ ಆಯ್ಕೆಯಾಗಿದ್ದರು. ಆದರೆ ಕೋವಿಡ್‌ನಿಂದಾಗಿ ದೇಶದ ಮೇಲೆ ಹೇರಿದ್ದ ಹಲವು ನಿರ್ಬಂಧಗಳ ಕಾರಣದಿಂದ ಪಾಲ್ಗೊಳ್ಳಲು ಅವರಿಗೆ ಸಾಧ್ಯವಾಗಿರಲಿಲ್ಲ. 5 ವರ್ಷಗಳ ಬಳಿಕ ಮತ್ತೆ ಆಕೆಗೆ ಕಿರೀಟ ತೊಡಿಸಿ ಸ್ಪರ್ಧೆಗೆ ಕಳುಹಿಸಲಾಗಿತ್ತು. ಬಾಲಿವುಡ್‌ ಚಿತ್ರ ‘ರೋಹಿಂಗ್ಯಾ’ದಲ್ಲಿ 33 ವರ್ಷದ ಮೆಥಿಲಾ ಪ್ರಮುಖ ಪಾತ್ರದಲ್ಲಿ ನಟಿಸಿದ್ದಾರೆ.

ಫಿಲಿಪ್ಪೀನ್ಸ್‌ | ಅಥೀಸಾ ಮನಾಲೊ

ವೇದಿಕೆಯಲ್ಲಿ ನವಿಲೊಂದು ಬಣ್ಣದ ಬಟ್ಟೆ ತೊಟ್ಟು ನರ್ತಿಸುತ್ತಿರುವಂತೆ ಬೆರಗು ಹುಟ್ಟಿಸಿದ್ದು, ‘ಭುವನ ಸುಂದರಿ’ ಸ್ಪರ್ಧೆಯಲ್ಲಿ ಮೂರನೇ ರನ್ನರ್‌ ಅಪ್‌ ಆಗುವಲ್ಲಿ ಯಶಸ್ವಿಯಾದ ಅಥೀಸಾ ಮನಾಲೊ ಅವರ ವೇಷಭೂಷಣ. ಅಥೀಸಾ ಅವರೇ ಖುದ್ದು ಕರೆ ಮಾಡಿ, ಸ್ಪರ್ಧೆಗಾಗಿ ರಾಷ್ಟ್ರೀಯ ವೇಷಭೂಷಣ ರೂಪಿಸಿಕೊಡುವಂತೆ ಕೋರಿದಾಗ, ವಸ್ತ್ರ ವಿನ್ಯಾಸಕ ಮಾಕ್‌ ತುಮಾಂಗ್‌ ಅವರಿಗೆ ಸ್ವರ್ಗಕ್ಕೆ ಮೂರೇ ಗೇಣು ಎಂಬಂತಾಯಿತು. ಗೌನ್‌ಗಳು ಮತ್ತು ಸಂಜೆ ಪಾರ್ಟಿಯ ಉಡುಗೆಗಳನ್ನು ತಯಾರಿಸುವುದರಲ್ಲಿ ಸಿದ್ಧಹಸ್ತರಾಗಿದ್ದ ಮಾಕ್‌ಗೆ ಇಂಥದ್ದೊಂದು ಹೊಸ ಬೇಡಿಕೆ ಇಟ್ಟ ಅಥೀಸಾ ಆಗ ಹೇಳಿದ್ದು ಒಂದೇ ಮಾತು ‘ನಾನು ಹಬ್ಬಗಳ ರಾಣಿಯಂತೆ ಕಂಗೊಳಿಸಬೇಕು’.

ಫಿಲಿಪ್ಪೀನ್ಸ್‌ ಹೇಳಿಕೇಳಿ ಧಾರ್ಮಿಕ– ಸಾಂಸ್ಕೃತಿಕ ಹಬ್ಬಗಳ ನೆಲೆವೀಡು. ದೇಶದ ಸಾಂಪ್ರದಾಯಿಕ ಉಡುಪನ್ನು ಮೂಲವಾಗಿಟ್ಟು, ಖ್ಯಾತ ಚಿತ್ರನಟಿ ಮರಿಯಾ ಕ್ಲಾರಾ ಅವರ ಪಾತ್ರವೊಂದರಿಂದ ಸ್ಫೂರ್ತಿ ಪಡೆದು, ಕಣ್ತಣಿಸುವ ದಿರಿಸನ್ನು ಸಿದ್ಧಪಡಿಸಿಯೇಬಿಟ್ಟರು ಮಾಕ್‌. ದೀಪಗಳ ವೈಭವ, ಸಮೃದ್ಧ ಫಸಲು ಹಾಗೂ ಹೂವುಗಳ ನವೋಲ್ಲಾಸವನ್ನು ಸಂಭ್ರಮಿಸುವ ಫಿಲಿಪ್ಪೀನ್ಸ್‌ನ ಮೂರು ಪ್ರಮುಖ ಹಬ್ಬಗಳನ್ನು ಪ್ರತಿನಿಧಿಸುವ ಈ ಸುಂದರ ದಿರಿಸು, ಅಥೀಸಾ ಅವರ ಅಂದದ ಕಾಯವನ್ನು ಅಲಂಕರಿಸಿಯೇಬಿಟ್ಟಿತು.

ಮಿನುಗುವ ವಸ್ತ್ರದಿಂದ ಹೊಲಿದಿರುವ 65,000 ಹೂವಿನ ಪಕಳೆಗಳು ಈ ದಿರಿಸಿಗೆ ವಿಶೇಷ ಶೋಭೆ ತಂದಿವೆ. ದೇಶದ ಪ್ರಮುಖ ಆಹಾರ ಮೂಲವಾದ ಅಕ್ಕಿಯನ್ನು ಬಳಸಿ ಮಾಡಿದ ಕುಸುರಿಕಲೆಯ ತೋಳಿನ ಬಟ್ಟೆ, ಹೂವು, ಎಲೆಗಳಿಂದ ಅಲಂಕರಿಸಿದ ಅರೆ ವೃತ್ತಾಕಾರದ ಹೊನ್ನಿನ ಬಣ್ಣದ ಬಾಚಣಿಗೆಯನ್ನು ನಾಜೂಕಾಗಿ ತಲೆಗೆ ಸಿಕ್ಕಿಸಿ ‘ಹಬ್ಬಗಳ ರಾಣಿ’ಯ ಅಲಂಕಾರವನ್ನು ಸಂಪನ್ನಗೊಳಿಸಿದ ಮಾಕ್‌ ಅವರ ಶ್ರಮ ಕಡೆಗೂ ವ್ಯರ್ಥವಾಗಲಿಲ್ಲ. ‘ಉತ್ತಮ ರಾಷ್ಟ್ರೀಯ ಪೋಷಾಕು ’ ಪ್ರಶಸ್ತಿಯನ್ನು ಅಥೀಸಾ ಅವರಿಗೆ ಅದು ತಂದುಕೊಟ್ಟಿತು. ಅಷ್ಟೇಅಲ್ಲ, ಇದು ಭುವನ ಸುಂದರಿ ಸ್ಪರ್ಧೆಯಲ್ಲಿ ಫಿಲಿಪ್ಪೀನ್ಸ್‌ ನಿರಂತರವಾಗಿ ಪಡೆಯುತ್ತಿರುವ ಮೂರನೇ ಉತ್ತಮ ರಾಷ್ಟ್ರೀಯ ಪೋಷಾಕು ಎನ್ನಿಸಿಕೊಂಡು, ದೇಶಕ್ಕೆ ಹ್ಯಾಟ್ರಿಕ್‌ ಗರಿ ಸಿಕ್ಕಿಸಿತು.

28 ವರ್ಷದ ಅಥೀಸಾ ಕಡುಬಡತನದಿಂದ ಬಂದವರು. ತಮ್ಮ ಶಾಲಾ ಶುಲ್ಕ ಕಟ್ಟಲು 10 ವರ್ಷದವರಿದ್ದಾಗಲೇ ಮಕ್ಕಳಿಗಾಗಿ ಏರ್ಪಡಿಸಿದ್ದ ಸೌಂದರ್ಯ ಸ್ಪರ್ಧೆಯಲ್ಲಿ ಗೆದ್ದು ಬೀಗಿದ್ದವರು. ಆಕೆಯಲ್ಲಿ ಭುವನ ಸುಂದರಿ ಪಟ್ಟದ ಕನಸು ಬಿತ್ತಿದವರು ಆಕೆಯ ಅಜ್ಜಿ. ಆದರೆ ಅಥೀಸಾ ಆ ವೇದಿಕೆ ಹತ್ತುವ ಮುನ್ನವೇ ಆಕೆ ಇಹಲೋಕ ತ್ಯಜಿಸಿದ್ದರಿಂದ, ತಮಗೆ ಸಿಕ್ಕಿದ ಆ ಅವಕಾಶವನ್ನು ಅಥೀಸಾ ತಮ್ಮ ಅಜ್ಜಿಗೇ ಅರ್ಪಿಸಿದ್ದಾರೆ.

ಐವರಿ ಕೋಸ್ಟ್‌ | ಅಲೀವಿಯಾ ಯಾಸೆ

‘ಭುವನ ಸುಂದರಿ’ ಸ್ಪರ್ಧೆಯ ನಾಲ್ಕನೇ ರನ್ನರ್‌ ಅಪ್‌ ಆದ ಶ್ಯಾಮಲ ಸುಂದರಿ ಅಲೀವಿಯಾ ಯಾಸೆ, ಆಫ್ರಿಕಾದ ಶ್ರೀಮಂತ ಪರಂಪರೆಯಾದ ‘ಅಕಾನ್‌’ ಬಟ್ಟೆಯನ್ನು ಧರಿಸಿದ್ದರು. ಐವರಿ ಕೋಸ್ಟ್‌ ಹಾಗೂ ಘಾನಾ ದೇಶಗಳಲ್ಲಿ ಹೆಚ್ಚು ಪ್ರಭಾವ ಹೊಂದಿರುವ ಅಕಾನ್‌ ಜನಾಂಗವನ್ನು ಈ ದಿರಿಸು ಪ್ರತಿನಿಧಿಸುತ್ತಿತ್ತು. ಕೆಂಪು ಹಾಗೂ ಹೊನ್ನಿನ ವರ್ಣದ ಮಿನಿಸ್ಕರ್ಟ್‌, ಅದೇ ಬಣ್ಣದ ಹೈ ಹೀಲ್ಸ್‌ ಬೂಟುಗಳನ್ನು ಧರಿಸಿ ನಡೆದುಬಂದ ಅವರು ಕಪ್ಪುದೇವತೆಯಂತೆ ಕಂಗೊಳಿಸಿದರು. ರೇಷ್ಮೆ ಹಾಗೂ ಹತ್ತಿ ದಾರಗಳಿಂದ ನೇಯ್ದ ಈ ಬಟ್ಟೆಯನ್ನು ನೂರಾರು ಚಿನ್ನದ ಮಣಿಗಳನ್ನು ಬಳಸಿ ಮಾಡಲಾಗಿತ್ತು. ಇದು ಆಫ್ರಿಕಾ ನೆಲದ ಕರಕುಶಲತೆಯನ್ನು ಬಿಂಬಿಸುವಂತಿತ್ತು.

ಐವರಿ ಕೋಸ್ಟ್‌ ದೇಶದ ರಾಷ್ಟ್ರೀಯ ಪ್ರಾಣಿ ಆನೆಯ ಮುಖದಾಕೃತಿಯಂತಿದ್ದ ಬಟ್ಟೆಯಿಂದ ಯಾಸೆ ತಮ್ಮ ಎದೆಭಾಗವನ್ನು ಮುಚ್ಚಿದ್ದರು. ಬೃಹತ್‌ ಕಿರೀಟ ಧರಿಸಿ, ಮಿರುಗುತ್ತಿದ್ದ ರೆಕ್ಕೆಗಳನ್ನು ಕಟ್ಟಿಕೊಂಡು ಬಂದ ಯಾಸೆ, ಬಲು ಹಮ್ಮಿನ ನಡಿಗೆಯ ಮೂಲಕ ನಿಂತ ನಿಲುವಿನಲ್ಲಿಯೇ ಅಪಾರ ಆತ್ಮವಿಶ್ವಾಸವನ್ನು ಪ್ರಕಟಿಸಿದರು. ಮೈಬಣ್ಣದ ಕಾರಣಕ್ಕೆ ನಿರ್ಲಕ್ಷ್ಯಕ್ಕೆ ಒಳಗಾದವರ ನಿಲುವು ಹೇಗಿರಬೇಕು ಎಂಬುದನ್ನು ಇದು ಸಾರಿ ಹೇಳುವಂತಿತ್ತು.

‘ಸೆಲ್ಫ್‌ ಲವ್‌’ ಬೆಳೆಸಿಕೊಳ್ಳುವಂತೆ, ನಂತರ ನಡೆದ ಸಂದರ್ಶನದಲ್ಲಿ ಅವರು ಯುವಜನರಿಗೆ ಕಿವಿಮಾತು ಹೇಳಿದರು.