ಚಳಿಗಾಲದಲ್ಲಿ ಮುಖದ ಕಾಂತಿಗೆ ಈ ಅಂಶಗಳನ್ನು ಪಾಲಿಸಿರಿ

‌‌ಚಳಿಗಾಲದಲ್ಲಿ ಚರ್ಮದ ಸಮಸ್ಯೆ ಕಾಡುವುದು ಸಾಮಾನ್ಯ. ಅದಕ್ಕೆ ಕಾರಣ ಅತಿಯಾದ ಶೀತ ಗಾಳಿ ಮತ್ತು ತಣ್ಣನೆಯ ವಾತಾವರಣ.

ಶೀತ ವಾತಾವರಣದ ಬದಲಾವಣೆಯಿಂದಾಗಿ ದೇಹದಲ್ಲಿನ ಉಷ್ಣತೆ ಹೆಚ್ಚುತ್ತದೆ. ಇದರಿಂದ ಜಠರದ ಕೆಲಸ ತೀವ್ರಗೊಳ್ಳುತ್ತದೆ. ಈ ವೇಳೆ ಜಠರಕ್ಕೆ ಸಮರ್ಪಕ ಆಹಾರ ದೊರಕದಿದ್ದಾಗ ದೇಹದಲ್ಲಿ ತೇವಾಂಶ ಕಡಿಮೆಯಾಗಿ ಚರ್ಮ ಒರಟಾದಂತೆ ಕಾಣಿಸುತ್ತದೆ. ಪರಿಣಾಮ ತ್ವಚೆ ಹೊಳಪನ್ನು ಕಳೆದುಕೊಳ್ಳುತ್ತದೆ.

ಕಾಂತಿಯುತ ತ್ವಚೆಗೆ ಈ ಆಹಾರ ಸೇವಿಸಿ

ಸಾಮಾನ್ಯವಾಗಿ ಬಾಯಲ್ಲಿ ನೀರೂರಿಸುವ (ಆದರೆ ಮನೆಯಲ್ಲೇ ತಯಾರಿಸಿದ), ಎಣ್ಣೆಯಲ್ಲಿ ಕರಿದ ಪದಾರ್ಥಗಳನ್ನು ಈ ಸಮಯದಲ್ಲಿ ಸೇವಿಸಬಹುದು. ಹಾಗೆಯೇ ಕೊಬ್ಬಿನಾಂಶ ಹೆಚ್ಚಿರುವ, ಜೀರ್ಣಕ್ರಿಯೆಗೆ ಕಠಿಣವಾದ ಆಹಾರಗಳನ್ನು ಕೂಡ ಈ ಸಮಯದಲ್ಲಿ ತಿನ್ನಬಹುದು. ಉತ್ತಮ ಮಾಂಸಾಹಾರವನ್ನು ಕೂಡ ಸೇವಿಸಬಹುದು. ಗೋಧಿ ಹಾಗೂ ಉದ್ದಿನಿಂದ ತಯಾರಿಸಿದ ಆಹಾರ ಪದಾರ್ಥಗಳು, ಉಪ್ಪು, ಸಿಹಿ, ಹುಳಿ ರುಚಿಯುಳ್ಳ ಪದಾರ್ಥ, ಕೊಬ್ಬಿನಾಂಶ ಹೆಚ್ಚಾಗಿರುವ ಆಹಾರ ಪದಾರ್ಥ, ಹಾಲು ಹಾಗೂ ಅದರ ಉತ್ಪನ್ನಗಳನ್ನು ಕೂಡ ಈ ಸಮಯದಲ್ಲಿ ಸೇವಿಸಬಹುದು.

ಹಸಿವನ್ನು ತಣಿಸುವಷ್ಟು ಆಹಾರ ಪದಾರ್ಥಗಳನ್ನು ಸೇವಿಸಿದಾಗ, ತೀಕ್ಷ್ಣವಾದ ಅಗ್ನಿಯು ಸರಿಯಾದ ರೀತಿಯಲ್ಲಿ ಉಪಯೋಗಿಸಲ್ಪಟ್ಟು, ದೇಹದಲ್ಲಿ ಪಚನ ಕ್ರಿಯೆ ಚೆನ್ನಾಗಿ ನಡೆದು, ತ್ವಚೆಗೆ ಉತ್ತಮ ಕಾಂತಿ ಹಾಗೂ ಹೊಳಪನ್ನು ನೀಡುವಲ್ಲಿ ಸಹಕರಿಸುತ್ತದೆ.

ಮುಖದ ಕಾಂತಿಗಾಗಿ ಅನುಸರಿಸಬಹುದಾದ ಕ್ರಮಗಳು

• ಪ್ರತಿ ದಿನ ಸಂಜೆ ಎಣ್ಣೆಯಿಂದ ಮಸಾಜಾ ಮಾಡಿಕೊಳ್ಳಿ

• ಕಡಲೆ ಹಿಟ್ಟು, ಮೃದು ಗುಣವುಳ್ಳ ಸೋಪು ಅಥವಾ ಫೇಸ್ ವಾಶ್‌ನಿಂದ ಮುಖವನ್ನು ತೊಳೆದುಕೊಳ್ಳಿ

• ಹಾಲಿನ ಕೆನೆಯಿಂದ ಅಥವಾ ಬೆಣ್ಣೆಯಿಂದ ಮುಖಕ್ಕೆ ಮಾಲೀಶು ಮಾಡಿ

• ಉತ್ತಮ ಗುಣಮಟ್ಟದ, ವೈದ್ಯರಿಂದ ಸೂಚಿಸಲ್ಪಟ್ಟ ಮಾಯಿಶ್ಚರೈಸರ್‌ಗಳ ಬಳಕೆ ಮಾಡಿ

• ಚಿಟಿಕೆ ಅರಿಶಿನ, ಶ್ರೀಗಂಧ, ಕಡಲೆಹಿಟ್ಟಿನ ಜೊತೆ ಹಾಲನ್ನು ಬೆರೆಸಿ ಮುಖಕ್ಕೆ ಲೇಪವನ್ನು ಕೂಡ ಹಚ್ಚಬಹುದು.

• ತುಟಿಗಳಿಗೆ ಬೆಣ್ಣೆ ಅಥವಾ ಕೊಬ್ಬರಿ ಎಣ್ಣೆಯನ್ನು ಆಗಾಗ ಹಚ್ಚಬಹುದು ಅಥವಾ ಲಿಪ್ ಬಾಮ್‌ಗಳ ಬಳಕೆಯೂ ಒಳ್ಳೆಯದು.

ಲೇಖಕರು: ಡಾ. ರಶ್ಮಿ ಪ್ರಸಾದ್, ವೈದ್ಯಾಧಿಕಾರಿಗಳು, ಶೃಂಗಾರ ಸೌಂದರ್ಯ ಚಿಕಿತ್ಸಾ ವಿಭಾಗ.