ಅಮೆರಿಕ ಸುಂಕ ಹೇರಿಕೆ | ರಫ್ತುದಾರರಿಗೆ ಪ್ಯಾಕೇಜ್‌ ನೀಡಲು ಚಿಂತನೆ: ನಿರ್ಮಲಾ

ನವದೆಹಲಿ: ಭಾರತದಿಂದ ತಾನು ಆಮದು ಮಾಡಿಕೊಳ್ಳುವ ಸರಕುಗಳ ಮೇಲೆ ಅಮೆರಿಕ ವಿಧಿಸಿರುವ ಅಧಿಕ ಸುಂಕದಿಂದ ಸಂಕಷ್ಟ ಎದುರಿಸುವ ಉದ್ಯಮಗಳು ಹಾಗೂ ರಫ್ತುದಾರರಿಗೆ ಕೇಂದ್ರ ಸರ್ಕಾರವು ಶೀಘ್ರವೇ ಪರಿಹಾರ ಪ್ಯಾಕೇಜ್‌ ಘೋಷಿಸುವ ಸಾಧ್ಯತೆ ಇದೆ.

ಉದ್ಯಮಗಳ ದುಡಿಯುವ ಬಂಡವಾಳದ ಮೇಲಿನ ಒತ್ತಡ ತಗ್ಗಿಸಲು ಹಾಗೂ ರಫ್ತುದಾರರು ಪರ್ಯಾಯ ಮಾರುಕಟ್ಟೆಗಳನ್ನು ಹುಡುಕಿಕೊಳ್ಳಲು ನೆರವು ದೊರಕಿಸಿಕೊಡಲು ಕೆಲ ಕ್ರಮಗಳನ್ನು ಈ ಉದ್ದೇಶಿತ ಪ್ಯಾಕೇಜ್‌ ಒಳಗೊಂಡಿರಲಿದೆ ಎಂದು ಮೂಲಗಳು ಹೇಳಿವೆ.

ಜವಳಿ, ಸಿದ್ಧ ಉಡುಪುಗಳು, ಜುವೆಲರಿ, ಚರ್ಮ ಮತ್ತು ಪಾದರಕ್ಷೆ, ಕೃಷಿ ಮತ್ತು ಮೀನುಗಾರಿಕೆಯಂತಹ ಉದ್ಯಮಗಳು ಅಮೆರಿಕ ವಿಧಿಸಿರುವ ಶೇ 50ರಷ್ಟು ಸುಂಕದಿಂದ ಸಂಕಷ್ಟ ಎದುರಿಸುತ್ತಿದ್ದು, ಇವುಗಳನ್ನು ಕೇಂದ್ರೀಕರಿಸಿದ ಕ್ರಮಗಳನ್ನು ಸರ್ಕಾರ ಪ್ರಕಟಿಸುವ ಸಾಧ್ಯತೆ ಇದೆ ಎಂದು ಹೇಳಿವೆ. 

ಭಾರತದ ರಫ್ತು ಕ್ಷೇತ್ರಕ್ಕೆ ಪ್ರೋತ್ಸಾಹ ನೀಡುವ ಸಲುವಾಗಿ ‘ರಫ್ತು ಉತ್ತೇಜನ ಕಾರ್ಯಕ್ರಮ’ ಆರಂಭಿಸುವುದಾಗಿ ಕೇಂದ್ರ ಹಣಕಾಸು ಸಚಿವೆ ನಿರ್ಮಲಾ ಸೀತಾರಾಮನ್‌ ಅವರು ಫೆಬ್ರುವರಿಯಲ್ಲಿ ಮಂಡಿಸಿದ್ದ ಬಜೆಟ್‌ನಲ್ಲಿ ಘೋಷಿಸಿದ್ದರು. ಹೀಗಾಗಿ, ಉದ್ದೇಶಿತ ಪ್ರೋತ್ಸಾಹದಾಯಕ ಕ್ರಮಗಳು ಈ ರಫ್ತು ಉತ್ತೇಜನ ಕಾರ್ಯಕ್ರಮವನ್ನು ಕೂಡ ಒಳಗೊಂಡರಲಿದೆ ಎಂದು ಇವೇ ಮೂಲಗಳು ಹೇಳಿವೆ.