ಹೊಸ ಎತ್ತರದತ್ತ ಷೇರುಪೇಟೆ: 62,000 ಅಂಶ ದಾಟಿದ ಸೆನ್ಸೆಕ್ಸ್‌

ಬೆಂಗಳೂರು: ದೇಶದ ಷೇರುಪೇಟೆಗಳಲ್ಲಿ ಮಂಗಳವಾರವೂ ಸಕಾರಾತ್ಮಕ ವಹಿವಾಟು ಮುಂದುವರಿದಿದ್ದು, ಸೆನ್ಸೆಕ್ಸ್‌ ಹೊಸ ದಾಖಲೆಯಾದ 62,000 ಮಟ್ಟ ದಾಟಿದೆ. ಸೆಪ್ಟೆಂಬರ್‌ ತ್ರೈಮಾಸಿಕದಲ್ಲಿ ಉತ್ತಮ ಗಳಿಕೆಯ ನಿರೀಕ್ಷೆಯ ಕಾರಣಗಳಿಂದಾಗಿ ಐಟಿ ವಲಯದ ಷೇರುಗಳತ್ತ ಹೂಡಿಕೆದಾರರು ಮುಖಮಾಡಿದ್ದಾರೆ.

400 ಅಂಶಗಳಷ್ಟು ಏರಿಕೆ ದಾಖಲಿಸಿದ ಮುಂಬೈ ಷೇರುಪೇಟೆ ಸಂವೇದಿ ಸೂಚ್ಯಂಕ ಸೆನ್ಸೆಕ್ಸ್, ಕೆಲ ನಿಮಿಷಗಳು ಮಾರಾಟದ ಒತ್ತಡಕ್ಕೆ ಸಿಲುಕಿ ಅಲ್ಪ ಇಳಿಮುಖವಾಯಿತು. ಈಗ ವಹಿವಾಟು ಮತ್ತೆ ಏರುಗತಿಯಲ್ಲಿ ಸಾಗಿದೆ. ರಾಷ್ಟ್ರೀಯ ಷೇರುಪೇಟೆ ಸಂವೇದಿ ಸೂಚ್ಯಂಕ ನಿಫ್ಟಿ 98.80 ಅಂಶ ಹೆಚ್ಚಳವಾಗಿ 18,575.85 ಅಂಶಗಳಲ್ಲಿ ವಹಿವಾಟು ಮುಂದುವರಿದಿದೆ.

ಹಣದುಬ್ಬರ ಕಡಿಮೆಯಾಗಿರುವುದು, ಹಬ್ಬದ ಸಂದರ್ಭವಾಗಿರುವುದರಿಂದ ಬೇಡಿಕೆ ಮತ್ತು ಗಳಿಕೆಯಲ್ಲಿ ಹೆಚ್ಚಳವಾಗುವ ನಿರೀಕ್ಷೆಯಿಂದ ಹೂಡಿಕೆದಾರರು ಷೇರು ಖರೀದಿ ನಡೆಸಿದ್ದಾರೆ.

ನಿಫ್ಟಿ ಐಟಿ ಸೂಚ್ಯಂಕ ಶೇ 2.8ರಷ್ಟು ಏರಿಕೆಯಾಗಿದೆ. ಟಿಟಿಕೆ ಪ್ರೆಸ್ಟೀಜ್‌ ಷೇರು ಮುಖಬೆಲೆ ಸೀಳಿಕೆ (ಸ್ಟಾಕ್‌ ಸ್ಪ್ಲಿಟ್‌) ಸಾಧ್ಯತೆ ಇರುವುದರಿಂದ ಷೇರು ಶೇ 13ರಷ್ಟು ಹೆಚ್ಚಳವಾಗಿದೆ. ಎಲ್‌ಆ್ಯಂಡ್‌ಟಿ ಷೇರುಗಳು ಶೇ 14ರಷ್ಟು ಏರಿಕೆಯಾಗಿದೆ. ಆದರೆ, ಐಟಿಸಿ ಷೇರು ಬೆಲೆ ಶೇ 4ರಷ್ಟು ಕುಸಿದಿದೆ.

ಇದನ್ನೂ ಓದಿ–ಷೇರು ಮಾತು: ಸ್ಟಾಕ್ ಸ್ಪ್ಲಿಟ್ ಎಂದರೇನು?

ಸೋಮವಾರ ವಿದೇಶಿ ಸಾಂಸ್ಥಿಕ ಹೂಡಿಕೆದಾರರು ₹512.44 ಕೋಟಿ ಮೌಲ್ಯದ ಷೇರುಗಳನ್ನು ಖರೀದಿಸಿದ್ದಾರೆ.