ಬ್ರೋಕರೇಜ್ ಮಾತು: ಯುಟಿಐ ಎಎಂಸಿ ಬಗ್ಗೆ ಮೋತಿಲಾಲ್ ಓಸ್ವಾಲ್ ಹೇಳಿದ್ದೇನು?

ದೇಶದಲ್ಲಿ ಮ್ಯೂಚುವಲ್‌ ಫಂಡ್‌ಗಳ ಸೇವೆ ಒದಗಿಸುವ ಪ್ರಮುಖ ಕಂಪನಿಗಳ ಪೈಕಿ ಒಂದಾಗಿರುವ ಯುಟಿಐ ಎಎಂಸಿ ಷೇರು ಮೌಲ್ಯವು ₹1,550ಕ್ಕೆ ತಲುಪಬಹುದು ಎಂದು ಬ್ರೋಕರೇಜ್ ಸಂಸ್ಥೆ ಮೋತಿಲಾಲ್ ಓಸ್ವಾಲ್ ಹೇಳಿದೆ.

ಕ್ವಾಂಟ್‌ ಫಂಡ್‌ ಹಾಗೂ ಮಲ್ಟಿ–ಕ್ಯಾಫ್‌ ಫಂಡ್‌ ಆರಂಭಿಸುವ ಮೂಲಕ ಯುಟಿಐ ಎಎಂಸಿ ಕಂಪನಿಯು ತನ್ನಲ್ಲಿ ಲಭ್ಯವಿರುವ ಹಣಕಾಸು ಉತ್ಪನ್ನಗಳ ಸಂಖ್ಯೆಯನ್ನು ಹೆಚ್ಚಿಸಿದೆ. ಈ ಫಂಡ್‌ಗಳಲ್ಲದೆ ಇತರ ಫಂಡ್‌ಗಳ ಆಯ್ಕೆಯನ್ನೂ ಕಂಪನಿಯು ಹೂಡಿಕೆದಾರರಿಗೆ ನೀಡುತ್ತಿದೆ. ಕಂಪನಿಯ ತ್ರೈಮಾಸಿಕ ಸರಾಸರಿ ಆಸ್ತಿ ನಿರ್ವಹಣಾ ಪ್ರಮಾಣವು ಶೇ 17ರಷ್ಟು ಬೆಳವಣಿಗೆ ಸಾಧಿಸಿದೆ. ಎಸ್‌ಐಪಿ ಹೆಚ್ಚಳ ಹಾಗೂ ಪ್ಯಾಸಿವ್ ಹೂಡಿಕೆಗಳ ಏರಿಕೆಯು ಇದಕ್ಕೆ ಒಂದು ಕಾರಣ ಎಂದು ಬ್ರೋಕರೇಜ್ ಸಂಸ್ಥೆ ವಿವರಿಸಿದೆ. 

ಕಂಪನಿಯು ದೇಶದ ಟಾಪ್‌–30 ನಗರಗಳ ಆಚೆಗಿನ ಪ್ರಮುಖ ಮೂವತ್ತು ನಗರ–ಪಟ್ಟಣಗಳಲ್ಲಿ ವಿಸ್ತರಣೆ ಕಾಣುವುದನ್ನು ಮುಂದುವರಿಸಿದೆ ಎಂದು ಮೋತಿಲಾಲ್ ಓಸ್ವಾಲ್ ಹೇಳಿದೆ. ಬುಧವಾರದ ವಹಿವಾಟಿನ ಅಂತ್ಯಕ್ಕೆ ಯುಟಿಐ ಎಎಂಸಿ ಷೇರು ಮೌಲ್ಯವು ₹1,255.30 ಆಗಿತ್ತು.

(ಬ್ರೋಕರೇಜ್ ಸಂಸ್ಥೆಗಳು ನೀಡುವ ಮಾಹಿತಿ, ವಿವರಕ್ಕೆ ಪತ್ರಿಕೆ ಹೊಣೆಯಲ್ಲ)