ಬೈಕ್, ಮೊಬೈಲ್ ಕಳ್ಳರ ಬಂಧನ

ಬೆಂಗಳೂರು: ದ್ವಿಚಕ್ರ ವಾಹನಗಳು ಹಾಗೂ ಮೊಬೈಲ್‌ಗಳನ್ನು ಕದ್ದು ಮಾರಾಟ ಮಾಡುತ್ತಿದ್ದ ಇಬ್ಬರು ಆರೋಪಿಗಳನ್ನು ಕಲಾಸಿಪಾಳ್ಯ ಪೊಲೀಸರು ಬಂಧಿಸಿದ್ದಾರೆ.

ಇಲಿಯಾಸ್ ನಗರದ ಸೈಫಾನ್ ಪಾಷಾ (20) ಹಾಗೂ ವಿ.ವಿ ಪುರದ ಇರ್ಷಾದ್ ಪಾಷಾ (19) ಬಂಧಿತರು.

ಆರೋಪಿಗಳು ಕಲಾಸಿಪಾಳ್ಯ ಠಾಣಾ ವ್ಯಾಪ್ತಿಯ ಎ.ಎಂ.ರಸ್ತೆಯಲ್ಲಿ ದ್ವಿಚಕ್ರ ವಾಹನಗಳು ಹಾಗೂ ಮೊಬೈಲ್‌ಗಳನ್ನು ಮಾರಾಟ ಮಾಡುತ್ತಿದ್ದರು. ಈ ಮಾಹಿತಿ ಆಧರಿಸಿ ಪೊಲೀಸರು ದಾಳಿ ನಡೆಸಿದಾಗ ಆರೋಪಿಗಳು ಸಿಕ್ಕಿಬಿದ್ದಿದ್ದಾರೆ.

‘ಆರೋಪಿಗಳು ಸಾರ್ವಜನಿಕರಿಂದ ಮೊಬೈಲ್ ಹಾಗೂ ಬೈಕ್‌ ಕದಿಯುತ್ತಿದ್ದರು. ಅವರನ್ನು ವಶಕ್ಕೆ ಪಡೆದು, ₹1.70 ಲಕ್ಷ ಬೆಲೆಬಾಳುವ ಎರಡು ದ್ವಿಚಕ್ರ ವಾಹನ ಹಾಗೂ 15 ಮೊಬೈಲ್‌ಗಳನ್ನು ಜಪ್ತಿ ಮಾಡಲಾಗಿದೆ’ ಎಂದು ಪೊಲೀಸರು ತಿಳಿಸಿದರು.