ಮಡಿಕೇರಿ: ಸಮಗ್ರ ಕೃಷಿಯಲ್ಲಿ ಯಶಸ್ಸು ಕಂಡ ಎಂಬಿಎ ಪದವೀಧರ

ಮಡಿಕೇರಿ: ಕೊಡಗು ಜಿಲ್ಲೆಯ ಪೊನ್ನಂಪೇಟೆ ತಾಲ್ಲೂಕಿನ ಮಾಯಾಮುಡಿಯಲ್ಲಿ ಮಾಯದಂತಹ ಲೋಕ ನಿರ್ಮಿಸಿದವರು ಚೆಪ್ಪುಡೀರ ಸುಬ್ಬಯ್ಯ. ಇವರ ಬಳಿ ಬಗೆಬಗೆ ತಳಿಯ ಆರ್ಕಿಡ್ ಸಸ್ಯಗಳಿವೆ.  ಸ್ವತಃ ಬೆಳೆದು ಸಸಿಗಳನ್ನು ಮಾರಾಟ ಮಾಡುತ್ತಿದ್ದಾರೆ. ಅವುಗಳಲ್ಲಿ ವಿದೇಶಿ ತಳಿಗಳೂ ಇದ್ದು, ಆರ್ಕಿಡ್ ಪ್ರಿಯರಿಗೆ ಇವರ ಸಸ್ಯಾಗಾರ ಅಚ್ಚುಮೆಚ್ಚಿನ ತಾಣವಾಗಿದೆ.

ಕೊಡಗಿನಲ್ಲಿ ಸ್ವತಃ ಆರ್ಕಿಡ್ ಗಿಡಗಳನ್ನು ಬೆಳೆದು ಹೂವು ಸಮೇತ ಮಾರಾಟ ಮಾಡುತ್ತಿರುವ ಅತಿ ವಿರಳ ಮಂದಿಯಲ್ಲಿ ಇವರೂ ಒಬ್ಬರು.

ಹಾಲೆಂಡ್‌ನಿಂದ ಗಿಡಗಳನ್ನು ತರಿಸಿ ಅದನ್ನು ಸ್ಥಳೀಯವಾಗಿ  ತಾವೇ  ಬೆಳೆಸಿ ಮಾರಾಟ ಮಾಡುತ್ತಿರುವುದು ವಿಶೇಷ. ಡೆಂಡ್ರೋಬಿಯಂ, ಆನ್ಸಿಡಿಯಂ, ವ್ಯಾಂಡಾ, ಕೆಟ್ಲಿಯಾ ಸೇರಿದಂತೆ ಹಲವು ಆರ್ಕಿಡ್ ಪ್ರಬೇಧಗಳು ಇವರ ಬಳಿ ಇವೆ. ಕೇವಲ ಆರ್ಕಿಡ್ ಮಾತ್ರವಲ್ಲ, ಇವರ ಬಳಿ ಆಂಥೋರಿಯಂ ತೆರನಾದ ಒಳಾಂಗಣ ಆಲಂಕಾರಿಕ ಸಸ್ಯಗಳೂ ಇವರ ಬಳಿ ಇವೆ.

ಇವರ ಬಳಿ ಕಾಫಿ ಮಂಡಳಿ ನೀಡುವ ಬೀಜಗಳಿಂದ ತಯಾರಿಸಿದ ಕಾಫಿ ಗಿಡಗಳ ನರ್ಸರಿಯೂ ಇದೆ. ವಿಯಟ್ನಾಂ ತಳಿ ಟಿಆರ್– 9 ಮತ್ತು 11, ಸೆಲೆಕ್ಷನ್ 274, ಸಿxಆರ್‌ ಸೇರಿದಂತೆ ಹಲವು ವೈವಿಧ್ಯಮಯ ಕಾಫಿ ತಳಿಗಳ ಸಸ್ಯಗಳು ಇವರ ಬಳಿ ಲಭ್ಯ.

ಅಂದ ಹಾಗೆ, ಇವರು ಓದಿದ್ದು ಎಂಬಿಎ. ಬೆಂಗಳೂರಿನಲ್ಲಿ 3 ವರ್ಷ ಕೆಲಸ ಮಾಡಿ, ಕೃಷಿಯಲ್ಲಿ ತೊಡಗಿಸಿಕೊಳ್ಳುವ ಉದ್ದೇಶದಿಂದ ವಾಪಸ್ ಊರಿಗೆ ಬಂದರು. 12 ವರ್ಷದಿಂದ ಕಾಫಿ, ಕಾಳುಮೆಣಸು, ಅಡಿಕೆ ಹಾಗೂ ಭತ್ತವನ್ನು ಬೆಳೆಯುವ ಮೂಲಕ ಸಮಗ್ರ ಕೃಷಿಯಲ್ಲಿ ತೊಡಗಿಸಿಕೊಂಡರು.  5 ವರ್ಷದಿಂದ ಈಚೆಗೆ ಸಸ್ಯಾಗಾರ ಆರಂಭಿಸಿದರು. 3 ವರ್ಷದಿಂದ ಈಚೆಗೆ ಕಾಫಿ ಸಸ್ಯಾಗಾರ ಶುರು ಮಾಡಿ ಯಶಸ್ಸು ಪಡೆದಿದ್ದಾರೆ.

ಇವರ ಬಳಿ ಕನಿಷ್ಠ ₹ 150 ರಿಂದ ಆರಂಭಿಸಿ, ಗರಿಷ್ಠ ₹ 4 ಸಾವಿರದವರೆಗೆ ಆರ್ಕಿಡ್‌ ಗಿಡಗಳು ಸಿಗುತ್ತವೆ. ಗಿಡಗಳ ವಯಸ್ಸು, ಅವುಗಳ ಪ್ರಬೇಧದ ಆಧಾರದ ಮೇಲೆ ಬೆಲೆ ನಿರ್ಧಾರಿತವಾಗುತ್ತದೆ ಎಂದು ಚೆಪ್ಪುಡೀರ ಸುಬ್ಬಯ್ಯ ಹೇಳುತ್ತಾರೆ.

ಇವರ ಸಮಗ್ರ ಕೃಷಿಯನ್ನು ಮೆಚ್ಚಿದ ಕೃಷಿ ಇಲಾಖೆಯ ಆತ್ಮ ಯೋಜನೆಯಡಿ ಜಿಲ್ಲಾಮಟ್ಟದ ಶ್ರೇಷ್ಠ ಕೃಷಿಕ ಪ್ರಶಸ್ತಿ ನೀಡಿ ಸಿಕ್ಕಿದೆ.

ತಜ್ಞರ ಸಲಹೆ ಮಾರ್ಗದರ್ಶನ ಕಾರಣ

ಸಮಗ್ರ ಕೃಷಿ ಪದ್ಧತಿಯ ಅನುಸರಿಸಲು ಗೋಣಿಕೊಪ್ಪಲು ಕೃಷಿ ವಿಜ್ಞಾನ ಕೇಂದ್ರದ ತಜ್ಞರು ನೀಡಿದ ತರಬೇತಿ ಮಾರ್ಗದರ್ಶನ ಕಾರಣ ಎಂದು ಚೆಪ್ಪುಡೀರ ಸುಬ್ಬಯ್ಯ ಹೇಳುತ್ತಾರೆ. ‘ಎಂಬಿಎ ಪದವಿ ಪಡೆದರೂ ನಾನು ಕೃಷಿಯಲ್ಲೇ ಖುಷಿ ಕಂಡೆ. ಒಂದೇ ಬೆಳೆ  ವಿಧಾನವನ್ನು ಅನಸರಿಸದೆ ಸಮಗ್ರ ಕೃಷಿ ಕ್ರಮ ಅನುಸರಿಸಬೇಕು ಕೃಷಿಗೆ ಸಂಬಂಧಿಸಿದ ಉಪಕಸುಬುಗಳನ್ನು ಮಾಡಬೇಕು. ಆಗ ಕೃಷಿ ನಿಜವಾಗಿಯೂ ಲಾಭದಾಯಕವಾಗಿರುತ್ತದೆ’ ಎಂದು ಅವರು ತಿಳಿಸುತ್ತಾರೆ.