ಮಡಿಕೇರಿ: ದಸರೆ ಹೊಸ್ತಿಲಲ್ಲಿ ರಸ್ತೆ ಗುಂಡಿಗಳ ದರ್ಬಾರ್

ಮಡಿಕೇರಿ: ಮಡಿಕೇರಿ ದಸರೆ ಹೊಸ್ತಿಲಲ್ಲಿದೆ. ಆದರೆ, ನಗರದೊಳಗೆ ಎಲ್ಲಲ್ಲೂ ಗುಂಡಿಗಳಿವೆ. ‘ಬೆಳಕಿನ ದಸರೆ’ಗೆ ಮುನ್ನುಡಿ ಬರೆಯಲಿರುವ ಕರಗೋತ್ಸವಕ್ಕೆ ಇನ್ನು ಉಳಿದಿರುವುದು ಕೇವಲ ಎಂಟೇ ದಿನಗಳು ಮಾತ್ರ. ಹೀಗಿದ್ದರೂ, ನಗರದಲ್ಲಿ ನಡೆಯುತ್ತಿರುವ ಸಿದ್ಧತೆಗಳು ಏನೇನೂ ಸಾಲದಂತಾಗಿವೆ.

ನಗರದಲ್ಲಿರುವ ಬಹುತೇಕ ಎಲ್ಲ ರಸ್ತೆಗಳಲ್ಲೂ ಗುಂಡಿಗಳಿವೆ. ಗುಂಡಿಗಳೇ ಇಲ್ಲದ ರಸ್ತೆಗಳು ಹುಡುಕಿದರೂ ಸಿಗದ ಸ್ಥಿತಿ ನಗರದಲ್ಲಿದೆ. ಲಕ್ಷಾಂತರ ಮಂದಿ ಆಗಮಿಸುವ ದಸರೆ ನಗರಿಯ ಸ್ಥಿತಿ ಶೋಚನೀಯವಾಗಿದೆ.

ಎಲ್ಲ ಜನಪ್ರತಿನಿಧಿಗಳು ಹಾಗೂ ಅಧಿಕಾರಿಗಳು ಎಲ್ಲ ತಪ್ಪನ್ನೂ ಮಳೆಯ ಮೇಲೆ ಹಾಕುತ್ತಾರೆ. ಮಳೆ ಹೆಚ್ಚಾಗಿದ್ದರಿಂದ ರಸ್ತೆಗಳು ಹಾಳಾಗಿವೆ. ದುರಸ್ತಿಗೆ ಸಮಯವನ್ನೇ ಮಳೆ ಕೊಟ್ಟಿಲ್ಲ. ಹೀಗೆ ಮಳೆಯನ್ನೇ ಈ ಎಲ್ಲ ಸಮಸ್ಯೆಗಳಿಗೆ ಹಾಗೂ ದುರಸ್ತಿ ಮಾಡದಿರುವುದಕ್ಕೆ ಪ್ರಮುಖ ಜವಾಬ್ದಾರಿಯನ್ನಾಗಿ ಮಾಡಿ ನುಣುಚಿಕೊಳ್ಳುತ್ತಿದ್ದಾರೆ. ಇದು ಪ್ರತಿ ವರ್ಷವೂ ನಡೆಯುತ್ತಿದ್ದು, ಈ ವರ್ಷವೂ ಮುಂದುವರಿದಿದೆ.

ಯಾರೊಬ್ಬರೂ ಸಹ ಮೈಸೂರಿನಲ್ಲಿ ಜಂಬೂಸವಾರಿ ಮಾರ್ಗವನ್ನು ಅತ್ಯುತ್ತಮ ಕಾಂಕ್ರೀಟ್ ರಸ್ತೆಯನ್ನಾಗಿಸಿರುವುದರ ಕಡೆಗೆ ಗಮನಕೊಡುವುದೇ ಇದೆ. ಶಾಶ್ವತವಾದ ಹಾಗೂ ಅಷ್ಟೇ ಉತೃಷ್ಠವಾದ ಕಾಂಕ್ರೀಟ್ ರಸ್ತೆಗಳನ್ನು ನಿರ್ಮಿಸಿದರೆ ಪ್ರತಿ ವರ್ಷವೂ ಗುಂಡಿ ಮುಚ್ಚುವುದಕ್ಕೆ ಹಣ ವ್ಯಯಿಸುವುದು ತಪ್ಪುತ್ತದೆ ಎಂಬ ಆಲೋಚನೆ ಇನ್ನೂ ಯಾರಿಗೂ ಬಂದಂತಿಲ್ಲ. ಹಾಗಾಗಿಯೇ, ಪ್ರತಿ ವರ್ಷವೂ ಕೊನೆಗಳಿಗೆಯಲ್ಲಿ ಗುಂಡಿ ಮುಚ್ಚುವ ಪ್ರಹಸನ ನಡೆಯುತ್ತಿದೆ.

ಮುಚ್ಚಿದ ಗುಂಡಿಗಳೂ ಸಹ ದಸರೆ ಮುಗಿದ ಸ್ವಲ್ಪ ದಿನಗಳಲ್ಲೆ ಮತ್ತೆ ಬಾಯ್ತೆರೆಯುತ್ತವೆ. ಅದರ ಅಕ್ಕಪಕ್ಕದಲ್ಲೂ ಗುಂಡಿಗಳು ಮೂಡುತ್ತದೆ. ಒಂದೇ ಒಂದು ಮಳೆಗೆ ಮತ್ತೆಲ್ಲ ರಸ್ತೆಗಳೂ ಹೊಂಡಮಯವಾಗುತ್ತಿವೆ. ಶಾಶ್ವತವಾದ ರಸ್ತೆ ಕಾಮಗಾರಿ ಎನ್ನುವುದು ಮಡಿಕೇರಿಯ ಪಾಲಿಗೆ ಮರೀಚಿಕೆ ಎನಿಸಿದೆ.

ಕರಗಧಾರಿಗಳಿಗೆ ಸಂಕಷ್ಟ

ರಸ್ತೆ ಗುಂಡಿಗಳು ಕೇವಲ ದಸರಾ ದಶಮಂಟಪಗಳ ಶೋಭಾಯಾತ್ರೆಗಷ್ಟೇ ತೊಂದರೆಯಾಗಿಲ್ಲ. ಅದಕ್ಕೂ ಮೊದಲು ನಡೆಯುವ ಕರಗೋತ್ಸವಕ್ಕೂ ಅವು ಉಪಟಳಕಾರಿಯಾಗಿವೆ. ನಗರದ ನಾಲ್ಕೂ ಶಕ್ತಿದೇವತೆಗಳ ಕರಗಧಾರಿಗಳು ಕರಗಗಳನ್ನು ಹೊತ್ತು ಬರಿಗಾಲಿನಲ್ಲಿ ಹೆಜ್ಜೆ ಹಾಕುತ್ತಾ, ಕುಣಿಯುತ್ತಾ ಹೋಗುತ್ತಾರೆ. ಕರಗೋತ್ಸವದ ನಂತರವೂ ಅವರು ನಿತ್ಯ ತಮ್ಮ ದೇಗುಲ ವ್ಯಾಪ್ತಿಯ ರಸ್ತೆಗಳಲ್ಲಿ ಬರಿಗಾಲಿನಲ್ಲಿ ಕರಗ ಹೊತ್ತು ನಡೆಯುತ್ತಾರೆ. ಆಗ ಗುಂಡಿಮಯ ರಸ್ತೆಗಳು ಅಕ್ಷರಶಃ ತೊಂದರೆ ಕೊಡುತ್ತವೆ.

ಮತ್ತೊಂದೆಡೆ, ಐತಿಹಾಸಿಕ ಮಡಿಕೇರಿ ದಸರೆಯಲ್ಲಿ ಕರಗೋತ್ಸವ ನಡೆಯುವ ಪಂಪಿನ ಕೆರೆಯ ಆವರಣದಲ್ಲಿ ಇನ್ನೂ ಕಾಮಗಾರಿ ಪೂರ್ಣಗೊಂಡಿಲ್ಲ. ಕೆರೆಯ ಆವರಣದಲ್ಲಿ ಕರಗ ಕಟ್ಟೆಗಳಿಗೆ ಮಾರ್ಬಲ್ ಅಳವಡಿಸುವ ಕೆಲಸ ಹಾಗೂ ಮುಖ್ಯ ದ್ವಾರದ ಕಾಮಗಾರಿ ಇನ್ನೂ ನಡೆಯುತ್ತಿದೆ. ಭಾನುವಾರ ಈ ಕಾಮಗಾರಿಗಳನ್ನು ಮಡಿಕೇರಿ ನಗರಸಭಾ ಉಪಾಧ್ಯಕ್ಷ ಮಹೇಶ್ ಜೈನಿ ವೀಕ್ಷಿಸಿದರು. ಶುಚಿತ್ವದ ಕುರಿತೂ ಪರಿಶೀಲಿಸಿದರು.