ಮೈಸೂರಿನಲ್ಲಿ ‘ಪ್ರೊ ಕಬಡ್ಡಿ: ಪುನೀತ್‌ ಕಪ್‌'

ಮೈಸೂರು: ಮೈಸೂರು ಸ್ನೇಹಿತರ ಬಳಗ ಹಾಗೂ ಮೈಸೂರು ಅಮೆಚೂರ್‌ ಕಬಡ್ಡಿ ಸಂಸ್ಥೆಯಿಂದ ಜೂನ್‌ 3ರಿಂದ 5ರವರೆಗೆ ನಗರದ ಚಾಮುಂಡಿ ವಿಹಾರ ಒಳಾಂಗಣ ಕ್ರೀಡಾಂಗಣದಲ್ಲಿ ‘ಪ್ರೊ ಕಬಡ್ಡಿ: ಪುನೀತ್‌ ಕಪ್‌’ ಆಯೋಜಿಸಲಾಗಿದೆ ಎಂದು ಬಳಗದ ಕಾರ್ಯದರ್ಶಿ ಬಿ.ಎಸ್‌.ರಾಘವ ಹೇಳಿದರು.

‘ಜೂನ್‌ 3ರಂದು ಬೆಳಿಗ್ಗೆ 10.30ಕ್ಕೆ ಶಾಸಕ ಜಿ.ಟಿ. ದೇವೇಗೌಡ ಕಾರ್ಯಕ್ರಮ ಉದ್ಘಾಟಿಸುವರು. ಶಾಸಕ ಎಲ್‌. ನಾಗೇಂದ್ರ, ಮೈಸೂರು ಮತ್ತು ಚಾಮರಾಜನಗರ ಜಿಲ್ಲಾ ಸಹಕಾರ ಬ್ಯಾಂಕ್ ಅಧ್ಯಕ್ಷ ಜಿ.ಡಿ.ಹರೀಶ್‍ಗೌಡ, ಮುಖಂಡರಾದ ವಾಸು, ಭಾಗ್ಯ ಮಹದೇಶ್‌, ಎಸ್‌ಬಿಎಂ ಮಂಜು ಭಾಗವಹಿಸಲಿದ್ದಾರೆ. ಪ್ರತಿದಿನ ಬೆಳಿಗ್ಗೆ 8ರಿಂದ 11 ಹಾಗೂ ಸಂಜೆ 4ರಿಂದ ರಾತ್ರಿ 9.30ರವರೆಗೆ ಪಂದ್ಯಗಳು ನಡೆಯಲಿವೆ. 5ರಂದು ಸಂಜೆ 5ಕ್ಕೆ ಸೆಮಿ ಫೈನಲ್‌, ಫೈನಲ್‌ ಪಂದ್ಯಗಳು ನಡೆಯಲಿವೆ’ ಎಂದು ಬುಧವಾರ ಸುದ್ದಿಗೋಷ್ಠಿಯಲ್ಲಿ ತಿಳಿಸಿದರು.

ಬಳಗದ ಸಂಘಟನಾ ಕಾರ್ಯದರ್ಶಿ ಶಶಿಧರ ಮಾತನಾಡಿ, ‘8 ತಂಡಗಳನ್ನು ರಚಿಸಿದ್ದು, 31 ಪಂದ್ಯಗಳು ನಡೆಯಲಿವೆ. ರಾಜ್ಯದ ಎಲ್ಲ ಜಿಲ್ಲೆಗಳಿಂದ ಆಟಗಾರರು ಪಾಲ್ಗೊಳ್ಳಲಿದ್ದಾರೆ. ಪ್ರಥಮ ಬಹುಮಾನ ₹2 ಲಕ್ಷ, ದ್ವಿತೀಯ ಬಹುಮಾನ ₹1 ಲಕ್ಷ, ತೃತೀಯ ಹಾಗೂ 4ನೇ ಬಹುಮಾನ ತಲಾ ₹50 ಸಾವಿರ ನೀಡಲಾಗುತ್ತದೆ. ವೈಯಕ್ತಿಕ ಬಹುಮಾನಗಳನ್ನೂ ನೀಡಲಾಗುತ್ತದೆ’ ಎಂದರು.

ಪತ್ರಿಕಾಗೋಷ್ಠಿಯಲ್ಲಿ ಬಳಗದ ಉಪಾಧ್ಯಕ್ಷ ಜಿ.ಚಂದ್ರು, ಸಹ ಕಾರ್ಯದರ್ಶಿ ಮನೋಹರ, ನಂದೀಶ್‌, ನಂದನ್‌ ಇದ್ದರು.