ತೀರ್ಥಹಳ್ಳಿ: ಕಲಿಕೆಗೆ ಅಡ್ಡಿಯಾಗದ ವಯಸ್ಸು,63ನೇ ವಯಸ್ಸಿಗೆ SSLC ಪಾಸಾದ ವೃದ್ಧೆ

ತೀರ್ಥಹಳ್ಳಿ: ಇಲ್ಲಿನ ದೊಡ್ಡಮನೆಕೇರಿ ನಿವಾಸಿ ಪ್ರಮೀಳಾ ನಾರಾಯಣ ಭಟ್‌ ಅವರು ತಮ್ಮ 63ನೇ ವಯಸ್ಸಿಗೆ ಎಸ್‌ಎಸ್‌ಎಲ್‌ಸಿ ಪರೀಕ್ಷೆ ಬರೆದು ಉತ್ತೀರ್ಣರಾಗಿದ್ದಾರೆ.

‘ಶಿರಸಿ ಸರ್ಕಾರಿ ಪ್ರೌಢಶಾಲೆಯಲ್ಲಿ ಎಸ್‌ಎಸ್‌ಎಲ್‌ಸಿ ಪರೀಕ್ಷೆ ಪಡೆದು ಅನುತೀರ್ಣಳಾಗಿದ್ದೆ. ಬಡತನದ ಕಾರಣಕ್ಕೆ ಪುನಃ ಪರೀಕ್ಷೆ ಬರೆಯಲು ಸಾಧ್ಯವಾಗಿರಲಿಲ್ಲ. ನಂತರ ಮದುವೆ ಆಗಿದ್ದರಿಂದ ಶಿಕ್ಷಣದ ಕನಸುಗಳು ಅಲ್ಲಿಗೆ ಮುಗಿದಂಗಾಗಿದ್ದವು. ಕಳೆದ ವರ್ಷ ಮೊಮ್ಮಗನಿಗೆ ಮನೆ ಪಾಠಕ್ಕೆ ಕಳಿಸುವ ಸಂದರ್ಭ ತಮಾಷೆಗೆ ಎಸ್‌ಎಸ್‌ಎಲ್‌ಸಿ ಪರೀಕ್ಷೆ ಬರೆಯುತ್ತೇನೆ ಎಂದು ಹೇಳಿದ್ದೆ. ಮನೆ ಪಾಠ ಮಾಡುತ್ತಿದ್ದ ಮಾನಸಾ ಮತ್ತು ಶ್ರೀದತ್ತ ಅವರಿಬ್ಬರೂ ನೀವು ಪರೀಕ್ಷೆ ಬರೆಯಲೇಬೇಕು ಎಂದು ಒತ್ತಾಯಿಸಿದ್ದರಿಂದ ನಾನೀಗ ಈ ಸಾಧನೆ ಮಾಡುವಂತಾಯಿತು’ ಎಂದು ಪ್ರಮೀಳಾ ಹೇಳಿದರು.

‘ಪರೀಕ್ಷೆ ತಯಾರಿಗೆ ಬೇಕಾದ ಪುಸ್ತಕ, ನೋಟ್ಸ್‌, ಹಳೆಯ ಪ್ರಶ್ನೆ ಪತ್ರಿಕೆಗಳನ್ನು ಸಂಗ್ರಹಿಸಿ ಕೊಟ್ಟರು. 6 ತಿಂಗಳು ವ್ಯಾಸಂಗ ಮಾಡಿ ಎಸ್‌ಎಸ್‌ಎಲ್‌ಸಿ ಪರೀಕ್ಷೆಯಲ್ಲಿ ಶೇ 44 ಅಂಕ ಪಡೆದಿದ್ದೇನೆ. ಇದೆಲ್ಲದಕ್ಕೂ ನನ್ನ ಪತಿ ಪ್ರಕಾಶ್‌ ಜಿ. ನಾಯಕ್‌ ಬೆಂಬಲ ಕೊಟ್ಟರು. 6 ತಿಂಗಳು ಅಡುಗೆ ಮಾಡುವಂತೆ ಒತ್ತಾಯಿಸುವ ಬದಲು ಹೋಟೆಲ್‌ ಊಟದ ಮೊರೆ ಹೋದರು. ನನಗೆ ಓದಲು ಇದು ಸಹಕಾರಿಯಾಯಿತು’ ಎಂದು ಅವರು ‘ಪ್ರಜಾವಾಣಿ’ಗೆ ಪ್ರತಿಕ್ರಿಯೆ ನೀಡಿದರು.