'ಮೆಟಾವರ್ಸ್‌'ನತ್ತ ಪ್ರಯಾಣ ಬೆಳೆಸಿದ ದೀಪಿಕಾ ಪಡುಕೋಣೆ!
ನವದೆಹಲಿ: ನಟಿ ದೀಪಿಕಾ ಪಡುಕೋಣೆ ಕೆಂಪು ಬಣ್ಣದ ಕಾರು ಹತ್ತಿ ದೀರ್ಘ ಪ್ರಯಾಣ ಆರಂಭಿಸಿದ್ದಾರೆ. ಖುಷಿಯಿಂದಲೇ ಕಾರು ಚಲಾಯಿಸಿಕೊಂಡು ಹೋಗುತ್ತಿರುವ ದೀಪಿಕಾ ಎಚ್ಚರಿಕೆಯ ಬೋರ್ಡ್‌ ನೋಡಿದ್ದೇ ಗಾಬರಿಗೊಳಗಾಗುತ್ತಾರೆ. ಲಗುಬಗೆಯಲ್ಲೇ ಕಾರಿನ ಗಾಜನ್ನು ಏರಿಸುತ್ತಾರೆ. ಆದರೆ ಅಷ್ಟರಲ್ಲಿ ಕಾಲ ಮಿಂಚಿದೆ, ದೀಪಿಕಾ 'ಮೆಟಾವರ್ಸ್‌' ಲೋಕದೊಳಗೆ ಪ್ರವೇಶಿಸಿ ಆಗಿದೆ. ನಂತರ ನೋಡಿದರೆ ದೀಪಿಕಾರ ಕಾರು ಬಾಹ್ಯಾಕಾಶ ನೌಕೆಯಂತೆ ಮಾರ್ಪಾಡುಗೊಂಡಿದೆ.
ಅರೇ, ಇದು ಯಾವ ಸಿನಿಮಾದ ದೃಶ್ಯ? ಎಂಬ ಕುತೂಹಲ ಕೆರಳಿಸುತ್ತದೆ. ದೀಪಿಕಾ ಪಡುಕೋಣೆ ಇನ್‌ಸ್ಟಾಗ್ರಾಂನಲ್ಲಿ ಹಂಚಿಕೊಂಡಿರುವ ಆ್ಯನಿಮೇಟೆಡ್‌ ದೃಶ್ಯವಿದು. ಅಭಿಮಾನಿಗಳನ್ನು ಕುತೂಹಲದ ಕಡಲಿಗೆ ತಳ್ಳಿ, ಕಾತರದಿಂದ ಕಾಯುವಂತೆ ಮಾಡುವುದು ದೀಪಿಕಾ ಸ್ಟೈಲ್‌. ಈ ಬಾರಿಯೂ ಇಂತಹ ಪ್ರಯತ್ನದಲ್ಲಿ ಯಶಸ್ವಿಯಾಗಿದ್ದಾರೆ. ಈಗಾಗಲೇ ವಿಡಿಯೊಗೆ 30 ಲಕ್ಷಕ್ಕೂ ಹೆಚ್ಚು ವೀವ್ಸ್‌ ಸಿಕ್ಕಿದೆ. ಸುಮಾರು 4 ಲಕ್ಷ ಮಂದಿ ಲೈಕ್ ಮಾಡಿದ್ದಾರೆ.
ಮೆಟಾವರ್ಸ್‌ ಎಂಬುದು ಮಿಥ್ಯಾವಾಸ್ತವ ಲೋಕ. ಕಂಪ್ಯೂಟರ್‌ ಮೂಲಕ ಸೃಷ್ಟಿಸಿದ ಬಾಹ್ಯಾಕಾಶ. ಹಾಗಾಗಿ ದೀಪಿಕಾ ಪಡುಕೋಣೆ ಬಾಹ್ಯಾಕಾಶಕ್ಕೆ ಸಂಬಂಧಿಸಿದ ಸಿನಿಮಾ ನಿರ್ಮಿಸುತ್ತಿದ್ದಾರೆಯೇ ಎಂಬು ಕುತೂಹಲ ಮೂಡಿದೆ.
ದೀಪಿಕಾ ಪಡುಕೋಣೆ ನವೆಂಬರ್ 14ಕ್ಕೆ ರಣವೀರ್‌ ಸಿಂಗ್‌ ಜೊತೆ 3ನೇ ವರ್ಷದ ವಿವಾಹವಾರ್ಷಿಕೋತ್ಸವವನ್ನು ಉತ್ತರಾಖಂಡದಲ್ಲಿ ಆಚರಿಸಿಕೊಂಡರು. ರಣವೀರ್‌ ಸಿಂಗ್‌ ಅವರು ಕಪಿಲ್‌ ದೇವ್‌ ಪಾತ್ರದಲ್ಲಿ ಅಭಿನಯಿಸಿರುವ '83' ಸಿನಿಮಾ ಡಿಸೆಂಬರ್‌ 24ಕ್ಕೆ ಬಿಡುಗಡೆಯಾಗುತ್ತಿದೆ. ಈ ಹಿನ್ನೆಲೆಯಲ್ಲಿ ದೀಪಿಕಾ ಚಿತ್ರದ ಟೀಸರ್‌ ಅನ್ನು ಹಂಚಿಕೊಂಡು ಸಂಭ್ರಮಿಸಿದ್ದಾರೆ.
ತಾಜಾ ಸುದ್ದಿಗಾಗಿ ಪ್ರಜಾವಾಣಿ ಟೆಲಿಗ್ರಾಂ ಚಾನೆಲ್ ಸೇರಿಕೊಳ್ಳಿ | ಪ್ರಜಾವಾಣಿ ಆ್ಯಪ್ ಇಲ್ಲಿದೆ: ಆಂಡ್ರಾಯ್ಡ್ | ಐಒಎಸ್ | ನಮ್ಮ ಫೇಸ್‌ಬುಕ್ ಪುಟ ಫಾಲೋ ಮಾಡಿ.