ಗುರಿಯನ್ನು ತಲುಪಲು ದಾರಿಯಿದೆ, ಗುರುತಿಸುವುದು ಸವಾಲು: ಯಶ್‌!
ಕೆಜಿಎಫ್‌–2ನಲ್ಲಿ ಗನ್‌ ಹಿಡಿದು ಶತ್ರು ಸೇನೆಯನ್ನು ಧೂಳಿಪಟಗೊಳಿಸಿದ್ದ ರಾಕಿಭಾಯ್‌ ಯಶ್‌, ಮತ್ತೆ ಅಬ್ಬರಿಸಿದ್ದಾರೆ. ಆದರೆ ಈ ಸಲ ಯಾವುದೇ ಸಿನಿಮಾಕ್ಕಾಗಿ ಅಲ್ಲ. ಬದಲಿಗೆ, ಅಮೆರಿಕ ಪ್ರವಾಸದಲ್ಲಿರುವ ಯಶ್‌ ಅಲ್ಲಿನ ಶೂಟಿಂಗ್‌ ತರಬೇತಿ ಕೇಂದ್ರಕ್ಕೆ ಭೇಟಿ ನೀಡಿದ್ದಾರೆ. ತಾವು ಶೂಟ್‌ ಮಾಡಿ ಗುರಿ ತಲುಪಿದ ಪೋಸ್ಟ್‌ ಅನ್ನು ತಮ್ಮ ಇನ್‌ಸ್ಟಾಗ್ರಾಂ ಖಾತೆಯಲ್ಲಿ ಹಂಚಿಕೊಂಡಿದ್ದಾರೆ.
ಹಾಲಿವುಡ್‌ ನಿರ್ದೇಶಕನ ಜೊತೆ ಅಮೆರಿಕದ ತರನ್ ಟ್ಯಾಕ್ಟಿಕಲ್ ಇನ್ನೋವೇಶನ್ಸ್ ಶೂಟ್‌ ತರಬೇತಿ ಕೇಂದ್ರಕ್ಕೆ ಭೇಟಿ ನೀಡಿರುವ ಯಶ್‌, ಗನ್‌ ಹಿಡಿದು ಶೂಟ್‌ ಮಾಡಿ ಟಾರ್ಗೆಟ್‌ ತಲುಪಿದ ವಿಡಿಯೊ ಹಂಚಿಕೊಂಡಿದ್ದಾರೆ. ಜೊತೆಗೆ ಯಾವಾಗಲೂ ಗುರಿ ತಲುಪಲು ದಾರಿಗಳಿರುತ್ತವೆ. ಆದರೆ, ಅದನ್ನು ಹುಡುಕುವುದು ಸವಾಲುಎಂಬ ಸಾಲುಗಳನ್ನು ಬರೆದು ಹಂಚಿಕೊಂಡಿದ್ದಾರೆ. ಅದಕ್ಕೆ ಅಭಿಮಾನಿಗಳು ವಿವಿಧ ರೀತಿಯಲ್ಲಿ ಪ್ರತಿಕ್ರಿಯಿಸಿದ್ದಾರೆ.
ಕಷ್ಟಪಟ್ಟು ಬೆಳೆದು ಬಂದ ಯಶ್‌ ಸ್ಫೂರ್ತಿದಾಯಕ ಡೈಲಾಗ್‌ಗಳಿಂದಲೇ ಚಿರಪರಿಚಿತ. ಕೆಜಿಎಫ್‌ ಚಿತ್ರದಲ್ಲಿಯೂ ಬೆಳವಣಿಗೆಗೆ ಹುಮ್ಮಸ್ಸು ನೀಡುವ, ವಂಶಪಾರಂಪರ್ಯದ ಗೆಲುವುಗಳನ್ನು ಅಣಕಿಸುವ ಒಂದಷ್ಟು ಡೈಲಾಗ್‌ಗಳನ್ನು ಹೇಳಿ ಯಶ್‌ ಪ್ರೇಕ್ಷಕರ ಮನ ಗೆದ್ದಿದ್ದರು. ಈಗ ಕೂಡ ಗುರಿ ತಲುಪುವ ದಾರಿ ತೋರಿಸಿರುವ ಯಶ್‌ ಪೋಸ್ಟ್‌ ಸಖತ್‌ ವೈರಲ್‌ ಆಗಿದೆ.
ತಾಜಾ ಸುದ್ದಿಗಾಗಿ ಪ್ರಜಾವಾಣಿ ಟೆಲಿಗ್ರಾಂ ಚಾನೆಲ್ ಸೇರಿಕೊಳ್ಳಿ | ಪ್ರಜಾವಾಣಿ ಆ್ಯಪ್ ಇಲ್ಲಿದೆ: ಆಂಡ್ರಾಯ್ಡ್ | ಐಒಎಸ್ | ನಮ್ಮ ಫೇಸ್‌ಬುಕ್ ಪುಟ ಫಾಲೋ ಮಾಡಿ.