ಲಂಡನ್: ಕೋವಿಡ್–19 ಮಾತ್ರವಲ್ಲದೆ ಭವಿಷ್ಯದಲ್ಲಿ ಪ್ರಾಣಿಗಳಿಂದ ಮನುಷ್ಯರಿಗೆ ಹರಡಬಹುದಾದ ಎಲ್ಲಾ ಬಗೆಯ ಕೊರೊನಾ ವೈರಸ್ಗಳ ವಿರುದ್ಧ ಹೋರಾಡಬಲ್ಲ ಹೊಸ ಲಸಿಕೆಯನ್ನು ಅಭಿವೃದ್ಧಿಪಡಿಸುವ ಯೋಜನೆಯನ್ನು ಕೇಂಬ್ರಿಡ್ಜ್ ವಿವಿ ಬುಧವಾರ ಘೋಷಿಸಿದೆ.
ಇದನ್ನೂ ಓದಿ: Explainer| ಲಸಿಕೆ ಹೇಗೆ ಕೆಲಸ ಮಾಡುತ್ತದೆ?
ಲಸಿಕೆಯನ್ನು DIOS-CoVax2 ಎಂದು ಕರೆಯಲಾಗಿದೆ. ಬಾವಲಿಗಳಲ್ಲಿ ಇರಬಹುದಾದ ಕೊರೊನಾ ವೈರಸ್ಗಳೂ ಸೇರಿದಂತೆ ಎಲ್ಲ ಬಗೆಯ ಕೊರೊನಾ ವೈರಸ್ಗಳ ಅನುವಂಶಿಯತೆಯನ್ನು ಈ ಲಸಿಕೆಯಲ್ಲಿ ಬಳಸಿಕೊಳ್ಳಲಾಗುತ್ತದೆ.
ಎಲ್ಲಾ ಪ್ರಯೋಗಗಳು ಪೂರ್ಣಗೊಂಡ ನಂತರ ಲಸಿಕೆಯನ್ನು ಸ್ಪ್ರಿಂಗ್-ಚಾಲಿತ ಜೆಟ್ ಇಂಜೆಕ್ಷನ್ ಮೂಲಕ ಚರ್ಮಕ್ಕೆ ಸೂಜಿ ರಹಿತವಾಗಿ ನೋವಿಲ್ಲದೇ ನೀಡಲಾಗುತ್ತದೆ.
‘ನಮ್ಮ ಪ್ರಯೋಗವು SARS-CoV-2 (ಕೋವಿಡ್–19) ವೈರಸ್ ರಚನೆಯ 3D ಕಂಪ್ಯೂಟರ್ ಮಾಡೆಲಿಂಗ್ ಅನ್ನು ಒಳಗೊಂಡಿರುತ್ತದೆ. ಇದು ಕೊರೊನಾ ವೈರಸ್ ಮತ್ತು ಅದರ ಇತರ ಮಾದರಿಗಳಾದ SARS, MERS ಮತ್ತು ಪ್ರಾಣಿಗಳಲ್ಲಿರಬಹುದಾದ ಇತರ ಕೊರೊನಾ ವೈರಸ್ಗಳ ಮಾಹಿತಿಗಳನ್ನು ಬಳಸಿಕೊಳ್ಳುತ್ತದೆ,’ ಎಂದು ಕೇಂಬ್ರಿಡ್ಜ್ ವಿಶ್ವವಿದ್ಯಾಲಯದ ವೈರಲ್ ಝೂನೋಟಿಕ್ಸ್ ಪ್ರಯೋಗಾಲಯದ ಮುಖ್ಯಸ್ಥ ಪ್ರೊಫೆಸರ್ ಜೊನಾಥನ್ ಹೀನಿ ಹೇಳಿದ್ದಾರೆ.
‘ರೋಗನಿರೋಧಕ ಪ್ರತಿಕ್ರಿಯೆಯನ್ನು ಸರಿಯಾದ ದಿಕ್ಕಿನಲ್ಲಿ ನಿರ್ದೇಶಿಸುವ ಲಸಿಕೆಯನ್ನು ಸೃಷ್ಟಿ ಮಾಡಲು ನಾವು ಬಳಸಬಹುದಾದ ವೈರಸ್ನ ನಿರ್ಣಾಯಕ ತುಣುಕಾದ ಅದರ ರಕ್ಷಾಕವಚದಲ್ಲಿ ಸಣ್ಣದೊಂದು ಬಿರುಕಿಗಾಗಿ ಹುಡುಕಾಟ ನೆಡೆಸುತ್ತಿದ್ದೇವೆ. ಆದರೆ, ಅಂತಿಮವಾಗಿ ನಾವು ಲಸಿಕೆ ತಯಾರಿಸುವುದು ನಮ್ಮ ಗುರಿ. ಅದು ಕೋವಿಡ್–19 ಮಾತ್ರವಲ್ಲ, ಪ್ರಾಣಿಗಳಿಂದ ಮನುಷ್ಯರಿಗೆ ಹರಡಬಹುದಾದ ಇತರ ಕೊರೊನಾ ವೈರಸ್ಗಳ ವಿರುದ್ಧವೂ ಪ್ರತಿರೋಧ ಶಕ್ತಿ ಸೃಷ್ಟಿ ಮಾಡಲಿದೆ,’ ಎಂದು ಅವರು ಹೇಳಿದರು.
ತಾಜಾ ಸುದ್ದಿಗಾಗಿ ಪ್ರಜಾವಾಣಿ ಟೆಲಿಗ್ರಾಂ ಚಾನೆಲ್ ಸೇರಿಕೊಳ್ಳಿ | ಪ್ರಜಾವಾಣಿ ಆ್ಯಪ್ ಇಲ್ಲಿದೆ: ಆಂಡ್ರಾಯ್ಡ್ | ಐಒಎಸ್ | ನಮ್ಮ ಫೇಸ್ಬುಕ್ ಪುಟ ಫಾಲೋ ಮಾಡಿ.