ಉತ್ತರ ಕೊರಿಯಾದ ಸರ್ವಾಧಿಕಾರಿ ನಾಯಕ ಕಿಮ್ ಜಾಂಗ್ ಉನ್ ಅವರ ಅಂತಿಮ ದರ್ಶನದ ವಿಡಿಯೊವೊಂದು ಜಾಗತಿಕವಾಗಿ ವೈರಲ್ ಆಗಿದೆ.
ಕಿಮ್ ಜಾಂಗ್ ಉನ್ ಸಾರ್ವಜನಿಕವಾಗಿ ಕಾಣಿಸಿಕೊಳ್ಳುತ್ತಿಲ್ಲ, ಅವರು ಶಸ್ತ್ರಚಿಕಿತ್ಸೆಗೆ ಒಳಗಾದರು ಎಂಬ ಸುದ್ದಿಗಳು ಹೊರ ಬೀಳುತ್ತಲೇ, ಕಿಮ್ ಅಂತ್ಯಕ್ರಿಯೆಯದ್ದು ಎನ್ನಲಾದ ವಿಡಿಯೊ ಕೂಡ ಸದ್ದು ಮಾಡುತ್ತಿದೆ.
ಅಲ್ಲದೆ, ಕಿಮ್ ಜಾಂಗ್ ಉನ್ ಅವರ ಕಳೇಬರವನ್ನು ಸಾರ್ವಜನಿಕ ದರ್ಶನಕ್ಕೆ ಇರಿಸಲಾದ ಫೋಟೋಗಳೂ ಸಾಮಾಜಿಕ ಜಾಲತಾಣದಲ್ಲಿ ಕಾಣಿಸಿಕೊಂಡಿವೆ.
ಸತ್ಯ ಏನು?
ಸದ್ಯ ಜಗತ್ತಿನಲ್ಲಿ ವೈರಲ್ ಆಗಿರುವ ಕಿಮ್ ಜಾಂಗ್ ಉನ್ ಅಂತ್ಯಕ್ರಿಯೆಯದ್ದು ಎನ್ನಲಾದ ವಿಡಿಯೊಅವರದ್ದಲ್ಲ. ಬದಲಾಗಿ ಅವರ ತಂದೆ, ಕಿಮ್ ಜಾಂಗ್ ಇಲ್ ಅವರದ್ದು.
ವಿಚಿತ್ರವೆಂದರೆ, ಕಿಮ್ ಅಂತ್ಯಕ್ರಿಯೆಯ ಸನ್ನವೇಶಎನ್ನಲಾದ ವಿಡಿಯೊದ ಅಲ್ಲಲ್ಲಿ ಅವರೇ ಕಾಣಿಸಿಕೊಳ್ಳುತ್ತಾರೆ!
2011ರಲ್ಲಿ ನಡೆದಿದ್ದ ಕಿಮ್ ಜಾಂಗ್ ಇಲ್ ಅವರ ಅಂತ್ಯಕ್ರಿಯೆಯ ವಿಡಿಯೊವನ್ನು ಅಂತರರಾಷ್ಟ್ರೀಯ ಸುದ್ದಿ ಸಂಸ್ಥೆ ‘ಎಪಿ’ ತನ್ನ ಯೂಟ್ಯೂಬ್ ಚಾನೆಲ್ಗೆ 2015ರಲ್ಲಿ ಅಪ್ಲೋಡ್ ಮಾಡಿದೆ.
ಈಗ ವೈರಲ್ ಆಗಿರುವ ವಿಡಿಯೊದಲ್ಲಿ ಇರುವ ಕಳೇಬರವೂ ಕಿಮ್ ಜಾಂಗ್ ಉನ್ ತಂದೆ ಕಿಮ್ ಜಾಂಗ್ ಇಲ್ ಅವರದ್ದೇ ಎಂದು ಸತ್ಯಾನ್ವೇಷಣೆ ಮಾಡಿರುವ ಬೂಮ್ ಲೈವ್ ವೆಬ್ಸೈಟ್ ವರದಿ ಮಾಡಿದೆ.
ಉತ್ತರ ಕೊರಿಯಾದ ನಾಯಕ ಕಿಮ್ ಹೃದಯರಕ್ತನಾಳದ ಶಸ್ತ್ರಚಿಕಿತ್ಸೆಗೆ ಒಳಗಾಗಿದ್ದಾರೆ ಎಂದು ವರದಿಯಾದ ನಂತರ ಆರೋಗ್ಯ ಮತ್ತು ಸಾವಿನ ಕುರಿತು ಊಹಾಹಾಪೋಹಗಳೆದ್ದಿವೆ. ಉತ್ತರ ಕೊರಿಯಾದ ಸರ್ವಾಧಿಕಾರಿ ಏಪ್ರಿಲ್ 11 ರಿಂದ ಸಾರ್ವಜನಿಕವಾಗಿ ಕಾಣಿಸಿಕೊಂಡಿಲ್ಲ. ಏಪ್ರಿಲ್ 15 ರಂದು ತಮ್ಮ ತಾತ ಕಿಮ್ ಸೋಂಗ್ ಜನ್ಮಾಚರಣೆಗೂ ಅವರು ಗೈರುಹಾಜರಾಗಿದ್ದರು.
ದಕ್ಷಿಣ ಕೊರಿಯಾದ ಸರ್ಕಾರ ಮತ್ತು ಮಾಧ್ಯಮಗಳು ಕಿಮ್ ಜೊಂಗ್-ಉನ್ ಅವರ ಕುರಿತ ವದಂತಿಗಳನ್ನು ತಳ್ಳಿಹಾಕಿದೆ. ಆದರೆ ಅಮೆರಿಕವು ರಹಸ್ಯ ರಾಷ್ಟ್ರ ಉತ್ತರ ಕೊರಿಯಾದಿಂದ ಹೊರಬರುವ ವರದಿಗಳ ಮೇಲೆ ನಿಗಾ ಇಟ್ಟಿದೆ.
ತಾಜಾ ಸುದ್ದಿಗಾಗಿ ಪ್ರಜಾವಾಣಿ ಟೆಲಿಗ್ರಾಂ ಚಾನೆಲ್ ಸೇರಿಕೊಳ್ಳಿ | ಪ್ರಜಾವಾಣಿ ಆ್ಯಪ್ ಇಲ್ಲಿದೆ: ಆಂಡ್ರಾಯ್ಡ್ | ಐಒಎಸ್ | ನಮ್ಮ ಫೇಸ್ಬುಕ್ ಪುಟ ಫಾಲೋ ಮಾಡಿ.