ಪ್ಯಾರಿಸ್: ಕೊರೊನಾ ಸೋಂಕು ಜಾಗತಿಕವಾಗಿ ದಿನೇ ದಿನೇ ತೀವ್ರಗತಿಯಲ್ಲಿ ವ್ಯಾಪಿಸುತ್ತಿದೆ. ಸೋಂಕು ಪೀಡಿತರ ಸಂಖ್ಯೆ 90,293ಕ್ಕೆ ಏರಿದ್ದು, ಮೃತರ ಸಂಖ್ಯೆ 9,020ಕ್ಕೆ ತಲುಪಿದೆ.
ಐರೋಪ್ಯ ರಾಷ್ಟ್ರಗಳಲ್ಲಿ ಅತ್ಯಧಿಕ ಅಂದರೆ 4,134 ಜನರು ಸತ್ತಿದ್ದರೆ, ಏಷ್ಯಾದ ರಾಷ್ಟ್ರಗಳಲ್ಲಿ 3,416 ಜನರು ಸತ್ತಿದ್ದಾರೆ. ಒಟ್ಟಾರೆ ಗರಿಷ್ಠ ಪ್ರಕರಣಗಳು ಚೀನಾದಲ್ಲಿ ಸಂಭವಿಸಿವೆ.
ರಷ್ಯಾದಲ್ಲಿ ಕೋವಿಡ್-19 ಮೊದಲ ಬಲಿ ಪಡೆದಿದೆ. ಸೋಂಕು ದೃಢಪಟ್ಟಿದ್ದ 79 ವರ್ಷದ ವೃದ್ಧೆ ಗುರುವಾರ ಸತ್ತಿದ್ದಾರೆ. ಇವರಿಗೆ ನ್ಯುಮೋನಿಯಾ ಕೂಡಾ ಇತ್ತು ವೈದ್ಯರು ತಿಳಿಸಿದ್ದಾರೆ.
ಕೈದಿಗಳಿಗೆ ಕ್ಷಮಾದಾನ: ಇರಾನ್ನಲ್ಲಿ ಮತ್ತೆ 149 ಜನರು ಸತ್ತಿದ್ದು, ಮೃತರ ಸಂಖ್ಯೆ 1,284ಕ್ಕೆ ಏರಿದೆ. 18,407 ಮಂದಿಗೆ ಸೋಂಕು ತಗುಲಿದೆ ಎಂದು ಇರಾನ್ನ ಉಪ ಆರೋಗ್ಯ ಸಚಿವ ಅಲಿಜೆರಾ ರೈಸಿ ಹೇಳಿದರು.
ಸೋಂಕು ವ್ಯಾಪಿಸುವುದನ್ನು ತಡೆಯುವ ಕ್ರಮವಾಗಿ 10,000ಕ್ಕೂ ಹೆಚ್ಚು ಕೈದಿಗಳಿಗೆ ಕ್ಷಮಾದಾನ ನೀಡಲು ಇರಾನ್ನ ಉನ್ನತ ನಾಯಕರು ನಿರ್ಧರಿಸಿದ್ದಾರೆ ಎಂದು ಸರ್ಕಾರದ ಅಧಿಕೃತ ಟಿ.ವಿ ವರದಿ ಮಾಡಿದೆ.
ಸ್ಪೇನ್, ಸಾವಿನ ಸಂಖ್ಯೆ 767ಕ್ಕೆ ಏರಿಕೆ: ಕೊರೊನಾ ಸೋಂಕಿನಿಂದ ದೇಶದಲ್ಲಿ ಮೃತಪಟ್ಟವರ ಸಂಖ್ಯೆ 767ಕ್ಕೆ ಏರಿದೆ ಎಂದು ಸ್ಪೇನ್ ಗುರುವಾರ ಪ್ರಕಟಿಸಿದೆ. ಸೋಂಕು ಪೀಡಿತರ ಸಂಖ್ಯೆಯು ಒಟ್ಟಾರೆ 17,147ಕ್ಕೆ ಏರಿದೆ ಎಂದು ಮಾಹಿತಿ ನೀಡಿದೆ.
ತಾಜಾ ಸುದ್ದಿಗಾಗಿ ಪ್ರಜಾವಾಣಿ ಟೆಲಿಗ್ರಾಂ ಚಾನೆಲ್ ಸೇರಿಕೊಳ್ಳಿ | ಪ್ರಜಾವಾಣಿ ಆ್ಯಪ್ ಇಲ್ಲಿದೆ: ಆಂಡ್ರಾಯ್ಡ್ | ಐಒಎಸ್ | ನಮ್ಮ ಫೇಸ್ಬುಕ್ ಪುಟ ಫಾಲೋ ಮಾಡಿ.