ಕಾಂಪೌಂಡರ್‌ಗಳಿಂದ ಮದ್ದು ಪಡೆಯುತ್ತಿರುವ ಕಾಂಗ್ರೆಸ್: ಗುಲಾಂ ನಬಿ ಆಜಾದ್ ಟೀಕೆ
ನವದೆಹಲಿ: ‘ಅನಾರೋಗ್ಯಪೀಡಿತ ಕಾಂಗ್ರೆಸ್ ಪಕ್ಷವು ವೈದ್ಯರಿಂದ ಔಷಧ ಪಡೆದುಕೊಳ್ಳುವ ಬದಲಿಗೆ ಕಾಂಪೌಂಡರ್‌ಗಳಿಂದ ಔಷಧ ಪಡೆದುಕೊಳ್ಳುತ್ತಿದೆ’ ಎಂದು ಕಾಂಗ್ರೆಸ್ ಪಕ್ಷವನ್ನು ಇತ್ತೀಚೆಗೆ ತೊರೆದಿರುವ ಗುಲಾಂ ನಬಿ ಆಜಾದ್ ಸೋಮವಾರ ಹೇಳಿದ್ದಾರೆ.
ಕಾಂಗ್ರೆಸ್ ನೆಲೆಗಟ್ಟು ದುರ್ಬಲ ವಾಗಿದೆ ಮತ್ತು ಪಕ್ಷವು ಯಾವುದೇ ಸಂದರ್ಭದಲ್ಲಿ ಕುಸಿಯ ಬಹುದು. ಆದರೆ, ಕಾಂಗ್ರೆಸ್ ನಾಯಕರಿಗೆ ಈ ಬಗ್ಗೆ ಗಮನ ಹರಿಸಲು ಸಮಯವಿಲ್ಲ ಎಂದು ಟೀಕಿಸಿದ್ದಾರೆ.
ರಾಜಕಾರಣವು ರಾಹುಲ್‌ ಗಾಂಧಿ ಅವರ ಸಹಜ ಪ್ರವೃತ್ತಿ ಅಲ್ಲ. ಅವರಿಗೆ ರಾಜಕಾರಣದಲ್ಲಿ ಆಸಕ್ತಿಯೂ ಇಲ್ಲ ಎಂದೂ ಹೇಳಿದ್ದಾರೆ.
ಪಕ್ಷವನ್ನು ಒಗ್ಗಟ್ಟಾಗಿ ಇರಿಸುವುದರ ಬದಲು ಮುಖಂಡರು ಪಕ್ಷ ಬಿಟ್ಟು ಹೋಗುವಂತೆ ಮಾಡಲಾಗುತ್ತಿದೆ ಎಂಬ ಭಾವನೆ ಜನರಲ್ಲಿ ಇದೆ ಎಂದು ಮಾಧ್ಯಮ ಪ್ರತಿನಿಧಿಗಳ ಜತೆಗೆ ತಮ್ಮ ನಿವಾಸದಲ್ಲಿ ಮಾತನಾಡಿದ ಆಜಾದ್ ಹೇಳಿದರು.
ತಮ್ಮದು ಕಾಂಗ್ರೆಸ್ ಸಿದ್ಧಾಂತ. ಪಕ್ಷವನ್ನು ತೊರೆಯಲು ಎಂದೂ ಬಯಸಿರಲಿಲ್ಲ. ತಾವು ವಿದ್ಯಾರ್ಥಿ ದೆಸೆಯಿಂದಲೇ ಪಕ್ಷದ ಜತೆ ಬೆಳೆದವರು. ಆದರೆ, ಪಕ್ಷ ತೊರೆಯುವಂತೆ ಬಲವಂತ ಮಾಡಲಾಯಿತು ಎಂದಿದ್ದಾರೆ. ಬಿಜೆಪಿ ಸೇರುವುದಿಲ್ಲ. ಅದು ಜಮ್ಮು–ಕಾಶ್ಮೀರದ ರಾಜಕಾರಣಕ್ಕೆ ಒಳ್ಳೆಯದಲ್ಲ ಎಂದ ಅವರು ಸ್ವಂತ ಪಕ್ಷ ಕಟ್ಟುವುದಾಗಿ ತಿಳಿಸಿದ್ದಾರೆ.
‘ಕಾಂಗ್ರೆಸ್ ಪಕ್ಷಕ್ಕೆ ನಾನು ಶುಭ ಹಾರೈಕೆಯನ್ನಷ್ಟೇ ಮಾಡಬಹುದು. ಆದರೆ, ನನ್ನ ಹಾರೈಕೆಗಿಂತ ಆ ಪಕ್ಷಕ್ಕೆ ಔಷಧ ಬೇಕಾಗಿದೆ’ ಎಂದು ಅವರು ಹೇಳಿದ್ದಾರೆ.
ಮೋದಿಯ ಮಾನವೀಯತೆ
‘ಮಕ್ಕಳು ಅಥವಾ ಕುಟುಂಬ ಇಲ್ಲದ ಕಾರಣ ಪ್ರಧಾನಿ ನರೇಂದ್ರ ಮೋದಿ ಅವರು ಒರಟಾಗಿ ಇರುತ್ತಾರೆ ಎಂಬ ಭಾವನೆ ನನ್ನಲ್ಲಿ ಇತ್ತು. ಆದರೆ ಅವರು ಮಾನವೀಯತೆ ಮೆರೆದರು’ ಎಂದು ಆಜಾದ್ ಹೇಳಿದ್ದಾರೆ.
ಜಮ್ಮು–ಕಾಶ್ಮೀರದಲ್ಲಿ ಗುಜರಾತ್‌ನ ಜನರು ಇದ್ದ ಬಸ್‌ನಲ್ಲಿ2007ರಲ್ಲಿ ಗ್ರೆನೇಡ್‌ ಸ್ಫೋಟಿಸಲಾಗಿತ್ತು. ಆಗ ಮೋದಿ ಅವರು ಗುಜರಾತ್‌ ಮುಖ್ಯಮಂತ್ರಿಯಾಗಿದ್ದರು. ಆಜಾದ್ ಅವರು ಜಮ್ಮು–ಕಾಶ್ಮೀರ ಮುಖ್ಯಮಂತ್ರಿಯಾಗಿದ್ದರು. ಆಜಾದ್ ಅವರು ರಾಜ್ಯಸಭೆಯಿಂದ ನಿವೃತ್ತಿಯಾದಾಗ ಈ ಘಟನೆಯನ್ನು ನೆನಪಿಸಿಕೊಂಡು ಮೋದಿ ಭಾವುಕರಾಗಿದ್ದರು.
ಮೋದಿ ಅವರು ಮಾಡಿದ ವಿದಾಯ ಭಾಷಣದಲ್ಲಿ ಅವರು ಭಾವುಕರಾದದ್ದು ‘ಅನಕ್ಷರಸ್ಥ’ ಕಾಂಗ್ರೆಸಿಗರಲ್ಲಿ ಭಿನ್ನ ಭಾವನೆಯನ್ನು ಸೃಷ್ಟಿಸಿದೆ. ಅಂದು ರಾಜ್ಯಸಭೆಯಲ್ಲಿ ವ್ಯಕ್ತವಾದ ಭಾವನೆ ಆ ದುರಂತದ ಕುರಿತೇ ಹೊರತು ಪರಸ್ಪರರಿಗೆ ಸಂಬಂಧಿಸಿ ಅಲ್ಲ ಎಂದು ಆಜಾದ್ ಹೇಳಿದ್ದಾರೆ.
ಇವನ್ನೂ ಓದಿ
*ಕಾಂಗ್ರೆಸ್ ಪಕ್ಷದ ಎಲ್ಲ ಹುದ್ದೆಗಳಿಗೆ ಗುಲಾಂ ನಬಿ ಆಜಾದ್ ರಾಜೀನಾಮೆ
*Explainer: ಆಳ-ಅಗಲ; ಕಾಂಗ್ರೆಸ್ ಒಳಜಗಳದ ಕೋಲಾಹಲ
*ಗುಲಾಂ ನಬಿ ಆಜಾದ್‌ಗೆ ‘ಪದ್ಮಭೂಷಣ’: ಕಾಂಗ್ರೆಸ್‌ನಲ್ಲಿ ಕಚ್ಚಾಟ
*ಗುಲಾಂ ನಬೀ ಆಜಾದ್‌ಗೆ ಪದ್ಮಭೂಷಣ: ಮೌನಕ್ಕೆ ಶರಣಾದ ಜಮ್ಮು–ಕಾಶ್ಮೀರ ನಾಯಕರು
*ಸೋನಿಯಾರನ್ನು ಭೇಟಿಯಾಗಿ ಪಕ್ಷದ ಸಂಘಟನೆ ಬಲಪಡಿಸಲು ಸಲಹೆಗಳನ್ನು ಮುಂದಿಟ್ಟ ಆಜಾದ್
*ಕಾಂಗ್ರೆಸ್ ಸೇರಿ ಎಲ್ಲಾ ಪಕ್ಷಗಳು ಜನರಲ್ಲಿ ಒಡಕು ಮೂಡಿಸುತ್ತಿವೆ: ಆಜಾದ್
*ರಾಹುಲ್‌ ಅವರ ಆ ಬಾಲಿಶ ನಡೆಯಿಂದ 2014ರಲ್ಲಿ ಕಾಂಗ್ರೆಸ್‌ಗೆ ಸೋಲಾಯಿತು: ಆಜಾದ್
*ಗುಲಾಂ ನಬಿ ಆಜಾದ್ ಡಿಎನ್‌ಎ ‘ಮೋದಿ’ಫೈಡ್‌ ಆಗಿದೆ: ಜೈರಾಮ್‌ ರಮೇಶ್‌ ಗೇಲಿ
*ಗುಲಾಂ ನಬಿ ಆಜಾದ್ ಬೆಂಬಲಿಸಿ ಮತ್ತಷ್ಟು ನಾಯಕರು ಕಾಂಗ್ರೆಸ್‌ಗೆ ವಿದಾಯ
ತಾಜಾ ಸುದ್ದಿಗಾಗಿ ಪ್ರಜಾವಾಣಿ ಟೆಲಿಗ್ರಾಂ ಚಾನೆಲ್ ಸೇರಿಕೊಳ್ಳಿ | ಪ್ರಜಾವಾಣಿ ಆ್ಯಪ್ ಇಲ್ಲಿದೆ: ಆಂಡ್ರಾಯ್ಡ್ | ಐಒಎಸ್ | ನಮ್ಮ ಫೇಸ್‌ಬುಕ್ ಪುಟ ಫಾಲೋ ಮಾಡಿ.