ಕಾಶಿ– ತಮಿಳು ಸಂಗಮದಲ್ಲಿ ತಮಿಳು ಕಲಿಯಿರಿ: ಪ್ರಧಾನಿ ನರೇಂದ್ರ ಮೋದಿ

ನವದೆಹಲಿ: ವಾರಾಣಸಿಯಲ್ಲಿ ನಡೆಯುವ ಕಾಶಿ– ತಮಿಳು ಸಂಗಮ ಕಾರ್ಯಕ್ರಮದಲ್ಲಿ ನಾಗರಿಕರು ಹೆಚ್ಚಿನ ಸಂಖ್ಯೆಯಲ್ಲಿ ಭಾಗಿಯಾಗಿ, ತಮಿಳು ಕಲಿಯಲು ಅವಕಾಶವನ್ನು ಪಡೆದುಕೊಳ್ಳಬೇಕು ಎಂದು ಪ್ರಧಾನಿ ನರೇಂದ್ರ ಮೋದಿ ಅವರು ಶನಿವಾರ ಒತ್ತಾಯಿಸಿದರು.

‌ನಾಲ್ಕನೇ ಆವೃತ್ತಿಯ ಕಾಶಿ– ತಮಿಳು ಸಂಗಮವು ವಾರಾಣಸಿಯ ನಮೋ ಘಾಟ್‌ನಲ್ಲಿ ಡಿಸೆಂಬರ್‌ 2ರಿಂದ ಆರಂಭವಾಗಲಿದೆ ಎಂದು ಮೋದಿ ಅವರು ‘ಮನ್‌ ಕಿ ಬಾತ್‌’ನಲ್ಲಿ ತಿಳಿಸಿದರು.

‘ಈ ವರ್ಷದ ಕಾಶಿ– ತಮಿಳು ಸಂಗಮವು ಆಸಕ್ತಿದಾಯಕ ವಿಷಯವನ್ನು ಹೊಂದಿದೆ. ಅದು ತಮಿಳು ಕಲಿಯಿರಿ– ತಮಿಳು ಕರ್ಕಾಲಂ. ಈ ಕಾರ್ಯಕ್ರಮವು ವಿಶ್ವದ ಹಳೆಯ ಭಾಷೆ ಮತ್ತು ವಿಶ್ವದ ಹಳೆಯ ನಗರದ ಸಂಗಮವಾಗಿದೆ. ತಮಿಳು ಭಾಷೆಯನ್ನು ಪ್ರೀತಿಸುವವರೆಲ್ಲರಿಗೂ ಈ ಕಾರ್ಯಕ್ರಮ ಒಂದು ಪ್ರಮುಖ ವೇದಿಕೆಯಾಗುತ್ತದೆ’ ಎಂದು ಮೋದಿ ಹೇಳಿದ್ದಾರೆ.

‘ಕಾಶಿ ಜನರು ಈ ಕಾರ್ಯಕ್ರಮವನ್ನು ಹೆಚ್ಚು ಆನಂದಿಸುತ್ತಾರೆ. ಇಲ್ಲಿ ಅವರಿಗೆ ಹೊಸದನ್ನು ಕಲಿಯಲು ಮತ್ತು ಹೊಸ ಜನರನ್ನು ಭೇಟಿಯಾಗಲು ಅವಕಾಶ ದೊರೆಯುತ್ತದೆ. ಕಾಶಿ ಜನರು ತಮಿಳುನಾಡಿನ ತಮ್ಮ ಸಹೋದರ– ಸಹೋದರಿಯರನ್ನು ಸ್ವಾಗತಿಸಲು ಹೆಚ್ಚು ಉತ್ಸಾಹಿಗಳಾಗಿದ್ದಾರೆ. ಈ ಕಾರ್ಯಕ್ರಮದಲ್ಲಿ ಭಾಗವಹಿಸುವಂತೆ ಎಲ್ಲರನ್ನೂ  ಒತ್ತಾಯಿಸುತ್ತೇನೆ. ಇದರೊಂದಿಗೆ ‘ಏಕ ಭಾರತ– ಶ್ರೇಷ್ಠ ಭಾರತ’ ಮನೋಭಾವವನ್ನು ಬಲಪಡಿಸಲು ಇತರ ವೇದಿಕೆಗಳನ್ನು ಪರಿಗಣಿಸಿ’ ಎಂದು ಪ್ರಧಾನಿ ಕರೆ ನೀಡಿದರು.