ಕಾವಡ್ ಯಾತ್ರೆ ಮುಕ್ತಾಯ: 15 ದಿನಗಳಲ್ಲಿ ಹರಿದ್ವಾರಕ್ಕೆ 4.5 ಕೋಟಿ ಭಕ್ತರ ಭೇಟಿ

ಹರಿದ್ವಾರ: ಉತ್ತರಾಖಂಡದ ಹರಿದ್ವಾರದಲ್ಲಿ ಅಪಾರ ಭಕ್ತರ ಕಂಠದಿಂದ ಹೊರಬಂದ ‘ಹರ ಹರ ಮಹಾದೇವ’, ‘ಬಮ್ ಬಮ್ ಭೋಲೆ’ ಘೋಷದೊಂದಿಗೆ 15 ದಿನಗಳ ಕಾವಡ್‌ ಯಾತ್ರೆ ಬುಧವಾರ ಮುಕ್ತಾಯಗೊಂಡಿತು. 

ಲಕ್ಷಾಂತರ ಭಕ್ತರು ಗಂಗಾ ನದಿಯಲ್ಲಿ ಪವಿತ್ರ ಜಲ ಪಡೆದುಕೊಂಡರು. ಜತೆಗೆ ನಗರದಲ್ಲಿನ ಶಿವನ ದೇವಾಲಯಗಳಲ್ಲಿ ಜಲಾಭಿಷೇಕ ಕೈಗೊಂಡರು.

ಮೇಳ ನಿಯಂತ್ರಣ ಕೊಠಡಿಯ ಮಾಹಿತಿ ಪ್ರಕಾರ, ಈ ಬಾರಿಯ ಕಾವಡ್ ಯಾತ್ರೆಯಲ್ಲಿ 15 ದಿನಗಳಲ್ಲಿ 4.5 ಕೋಟಿ ಭಕ್ತರು ಹರಿದ್ವಾರಕ್ಕೆ ಬಂದು ಪವಿತ್ರ ಗಂಗಾಜಲವನ್ನು ಕೊಂಡೊಯ್ದಿದ್ದಾರೆ.

ಭಗವಂತ ಶಿವನ ಮಾವ ದಕ್ಷನ ನಿವಾಸ ಎಂದು ನಂಬಲಾದ ಕಂಖಾಲ್‌ ಪ್ರದೇಶದಲ್ಲಿರುವ ದಕ್ಷ ಪ್ರಜಾಪತಿ ಮಹಾದೇವ ದೇವಾಲಯದಲ್ಲಿ ಕೇಸರಿ ಬಣ್ಣದ ವಸ್ತ್ರಧರಿಸಿದ ಭಕ್ತರು ಅಪಾರ ಸಂಖ್ಯೆಯಲ್ಲಿ ನೆರೆದಿದ್ದರು.