ವಿಧಾನಸಭೆ: ತೋಳೇರಿಸಿದ ಡಿಸಿಎಂ ಡಿಕೆಶಿ, ಎದೆಯುಬ್ಬಿಸಿದ ಮಾಜಿ DCM ಅಶ್ವತ್ಥನಾರಾಯಣ

ಬೆಂಗಳೂರು: ನೀನು ಭ್ರಷ್ಟಾಚಾರದ ಪಿತಾಮಹ’ ಎಂದು ಉಪ ಮುಖ್ಯಮಂತ್ರಿ ಡಿ.ಕೆ. ಶಿವಕುಮಾರ್ ತೋಳೇರಿಸಿದಾಗ, ‘ನೀನು ಭ್ರಷ್ಟಾಚಾರಿ ಅಂತ ಇಡೀ ಲೋಕಕ್ಕೇ ಗೊತ್ತು’ ಎಂದು ಬಿಜೆಪಿಯ ಡಾ.ಸಿ.ಎನ್‌. ಅಶ್ವತ್ಥನಾರಾಯಣ ಎದೆಯುಬ್ಬಿಸಿ ತಿರುಗೇಟು ನೀಡಿದರು. ಇದು ಆಡಳಿತ–ವಿರೋಧ ಪಕ್ಷದ ಸದಸ್ಯರ ನಡುವೆ ಏಕವಚನದ ಆರೋಪ–ಪ್ರತ್ಯಾರೋಪಗಳಿಗೆ ಕಾರಣವಾಯಿತು.

ವಿಧಾನಸಭೆಯಲ್ಲಿ ಬುಧವಾರ ಭೋಜನ ವಿರಾಮದ ಬಳಿಕ ರಸಗೊಬ್ಬರ ಕೊರತೆ ಕುರಿತು ಚರ್ಚೆ ನಡೆಯುತ್ತಿದ್ದಾಗ, ವಿಷಯಾಂತರವಾಗಿ ಸ್ಮಾರ್ಟ್‌ ಮೀಟರ್‌, ರಾಮನಗರ ರಾಜಕೀಯ, ಜೈಲು, ಮತ ಕಳ್ಳತನ ಪ್ರಸ್ತಾಪಗೊಂಡು ಕಾಂಗ್ರೆಸ್‌-ಬಿಜೆಪಿ ಸದಸ್ಯರು ಅಕ್ಷರಶಃ ಸಮರಕ್ಕೆ ಮುಂದಾದರು.

ಈ ವೇಳೆ ಡಿ.ಕೆ. ಶಿವಕುಮಾರ್‌ ಅವರ ಆವೇಶಭರಿತ ಮಾತುಗಳು ವಿರೋಧ ಪಕ್ಷದ ಸದಸ್ಯರ ಮೇಲೆ ಆಡಳಿತ ಸದಸ್ಯರು ಮುಗಿ‌ಬೀಳುವಂತೆ ಮಾಡಿತು. ಕೋಲಾಹಲ, ಗದ್ದಲ ಹೆಚ್ಚಿದಾಗ ಸಭಾಧ್ಯಕ್ಷ ಪೀಠದಲ್ಲಿದ್ದ ಸಿ.ಎಸ್‌. ನಾಡಗೌಡ ಅವರು ಕಲಾಪವನ್ನು ಐದು ನಿಮಿಷ ಮುಂದೂಡಿದರು.

ರಸಗೊಬ್ಬರ ಕೊರತೆ ಬಗ್ಗೆ ಬಿಜೆಪಿಯ ಅರವಿಂದ ಬೆಲ್ಲದ ಮಾತಿಗೆ ಪ್ರತಿಕ್ರಿಯಿಸಿದ ಕೃಷಿ ಸಚಿವ ಎನ್‌. ಚಲುವರಾಯಸ್ವಾಮಿ, ‘ಸದನಕ್ಕೆ ಸುಳ್ಳು ಹೇಳಬೇಡಿ. ನೀವು ಸುಳ್ಳು ಹೇಳಿದರೂ ಕೇಳಿಸಿಕೊಂಡು ಕುಳಿತುಕೊಳ್ಳಬೇಕೇ’ ಎಂದು ಏರಿದ ದನಿಯಲ್ಲಿ ಪ್ರಶ್ನಿಸಿದರು. ಅದಕ್ಕೆ ಅಶ್ವತ್ಥನಾರಾಯಣ, ‘ಹಾಗಾದರೇ ನೀವು ಸತ್ಯವಂತರಾ’ ಎಂದು ಕೆಣಕಿದರು.

ಮಧ್ಯಪ್ರವೇಶಿಸಿದ ಇಂಧನ ಸಚಿವ ಕೆ.ಜೆ. ಜಾರ್ಜ್‌, ‘ನೀವು ಸತ್ಯ ಹರಿಶ್ಚಂದ್ರರಾ’ ಎಂದು ಪ್ರಶ್ನಿಸಿದರು. ರೊಚ್ಚಿಗೆದ್ದ ಅಶ್ವತ್ಥನಾರಾಯಣ, ‘ನಿಮ್ಮ ಇಲಾಖೆ ಬಗ್ಗೆ ಮಾತನಾಡಲು ನಿಮಗೆ ಧಮ್‌ ಇಲ್ಲ. ಸ್ಮಾರ್ಟ್‌ ಮೀಟರ್‌ ಬಗ್ಗೆ ಉತ್ತರ ನೀಡಲಾಗದೇ ಓಡಿ ಹೋದವರು ನೀವು’ ಎಂದು ಮುಗಿಬಿದ್ದರು. ಆಗ ಜಾರ್ಜ್‌, ‘ಸ್ಮಾರ್ಟ್ ಮೀಟರ್‌ ವಿಚಾರ ನ್ಯಾಯಾಲಯದಲ್ಲಿದೆ. ಕಾನೂನು ಇದೆ. ನೀವು ಸುಳ್ಳು ಹೇಳಬೇಡಿ. ಇಡೀ ಇಲಾಖೆ ಲೂಟಿ ಹೊಡೆದವರು ನೀವು’ ಎಂದು ಆರೋಪಿಸಿದರು‌. ಮತ್ತಷ್ಟು ಆಕ್ರೋಶಗೊಂಡ ಅಶ್ವತ್ಥನಾರಾಯಣ, ‘ನೀವು ಅಸಮರ್ಥ ಸಚಿವ’ ಎಂದು ವಾಗ್ದಾಳಿ ನಡೆಸಿದರು.

ಜಾರ್ಜ್‌ ಬೆನ್ನಿಗೆ ನಿಂತ ಡಿ.ಕೆ.ಶಿವಕುಮಾರ್‌, ‘ನೀನು ಅಸಮರ್ಥ. ಜನ ವೋಟ್‌ ಹಾಕಿ ಜಾರ್ಜ್‌ ಅವರನ್ನು ಇಲ್ಲಿ ಕೂರಿಸಿದ್ದಾರೆ. ನೀನು ಭ್ರಷ್ಟಾಚಾರದ ಪಿತಾಮಹ’ ಎಂದು ಅಶ್ವತ್ಥನಾರಾಯಣ ವಿರುದ್ಧ ವಾಗ್ದಾಳಿ ನಡೆಸಿದರು. 

ಸದಸ್ಯರ ಮಾತು ಹಳಿ ತಪ್ಪುತ್ತಿದ್ದಂತೆ ಸಭಾಧ್ಯಕ್ಷರು ಕಲಾಪವನ್ನು ಮುಂದೂಡಿದರು. ಪೀಠದಿಂದ ಸಭಾಧ್ಯಕ್ಷರು ತೆರಳಿದ ನಂತರವೂ ಎರಡೂ ಕಡೆಯ ಸದಸ್ಯರು ಏರಿದ ದನಿಯಲ್ಲಿ ಪರಸ್ಪರ ಕೆಲಹೊತ್ತು ಘೋಷಣೆ ಕೂಗಿದರು. ಮುಖ್ಯಮಂತ್ರಿ ಸಿದ್ದರಾಮಯ್ಯ ಈ ಮಾತಿನ ಸಮರಕ್ಕೆ ಮೂಕಪ್ರೇಕ್ಷರಾದರು.

ತಮ್ಮ ಕೊಠಡಿಗೆ ಸಭಾಧ್ಯಕ್ಷ ಯು.ಟಿ. ಖಾದರ್‌ ಅವರು ಆಡಳಿತ ಮತ್ತು ವಿರೋಧ ಪಕ್ಷದ ನಾಯಕರನ್ನು ಕರೆಸಿಕೊಂಡು ಸಮಾಧಾನಪಡಿಸಿದರು.

ಏಟು–ಎದಿರೇಟು

ಅಶ್ವತ್ಥನಾರಾಯಣ: ‘ಕೊಲೆಗಡುಕ, ಅಸಮರ್ಥ, ಭ್ರಷ್ಟಾಚಾರದ ಸರ್ಕಾರ’ 

ಡಿಕೆಶಿ: ‘ನೀನು ಅಸಮರ್ಥ’

ಅಶ್ವತ್ಥನಾರಾಯಣ: ‘ನಿಮ್ಮ ಸರ್ಕಾರ ಜನ ವಿರೋಧಿ. ಅಸಮರ್ಥ, ಭ್ರಷ್ಟಾಚಾರದ ಸರ್ಕಾರ, ನೈತಿಕತೆ ಇಲ್ಲ’

ಡಿಕೆಶಿ: ‘ನೀನು ಭ್ರಷ್ಟಾಚಾರದ ಪಿತಾಮಹ’

ಅಶ್ವತ್ಥನಾರಾಯಣ: ‘ಇಡೀ ಲೋಕಕ್ಕೆ ಗೊತ್ತು. ಹೇಳುವುದೇ ಬೇಡ... ಯಾರು ಭ್ರಷ್ಟಾಚಾರದ ಪಿತಾಮಹ ಎಂದು’

ಡಿಕೆಶಿ: ‘ರಾಮನಗರಕ್ಕೆ ಬಂದಿದ್ದಲ್ಲಪ್ಪ ಒಂದು ಸೀಟೂ ಬರಲಿಲ್ಲ.. ನಿನಗೆ. ಠೇವಣಿಯೂ ಸಿಗಲಿಲ್ಲ’

ಅಶ್ವತ್ಥನಾರಾಯಣ: ‘ಅಸಮರ್ಥರು, ಭ್ರಷ್ಟಾಚಾರದ ಸರ್ಕಾರ’ ( ಮತ್ತೆ.... ಮತ್ತೆ) 

ಡಿಕೆಶಿ: (ಕೆರಳಿ ತೋಳೇರಿಸುತ್ತಾ...) ‘ಒಬ್ಬ ಮೈನಾರಿಟಿ ಸಚಿವರಿಗೆ ಅಸಮರ್ಥರು ಎಂದು ನೀನು ಹೇಳುತ್ತಿದ್ದಿಯಾ’ 

(ಹಲವು ಬಾರಿ ಇಬ್ಬರೂ ಪರಸ್ಪರ ಏಕವಚನದಿಂದ ಬೈದಾಡಿಕೊಂಡರು

ಯಾರೇನೆಂದರು?