ಮನಮೋಹನ ಸಿಂಗ್ ಹೆಸರಿಟ್ಟರೆ ಸಮಸ್ಯೆ ಏನು?: ವಿಪಕ್ಷಗಳ ಟೀಕೆಗೆ ಡಿಕೆಶಿ ಪ್ರಶ್ನೆ

ಬೆಂಗಳೂರು: ‘ಬಿಜೆಪಿ ಸರ್ಕಾರವಿದ್ದಾಗ ರಾಜ್ಯದ ಸಂಸ್ಥೆ–ಸ್ವತ್ತುಗಳಿಗೆ ದೀನದಯಾಳ್ ಅವರ ಹೆಸರು ಇಟ್ಟಿದ್ದಾರೆ. ಆಗ ಇಲ್ಲದ ಸಮಸ್ಯೆ, ಈಗ ಮನಮೋಹನ ಸಿಂಗ್‌ ಅವರ ಹೆಸರು ಇಡುವಾಗ ಏಕೆ ಬರುತ್ತಿದೆ’ ಎಂದು ಉಪ ಮುಖ್ಯಮಂತ್ರಿ ಡಿ.ಕೆ.ಶಿವಕುಮಾರ್‌ ಪ್ರಶ್ನಿಸಿದರು.

ನಗರದಲ್ಲಿ ಶನಿವಾರ ಸುದ್ದಿಗಾರರ ಜತೆ ಮಾತನಾಡುವಾಗ ಅವರು ಈ ಮಾತು ಹೇಳಿದರು. ಬೆಂಗಳೂರು ವಿಶ್ವವಿದ್ಯಾಲಯಕ್ಕೆ ಮಾಜಿ ಪ್ರಧಾನಿ ಮನಮೋಹನ ಸಿಂಗ್‌ ಅವರ ಹೆಸರು ಇಡುವುದಾಗಿ  ಬಜೆಟ್‌ನಲ್ಲಿ ಘೋಷಿಸಿರುವುದಕ್ಕೆ ಟೀಕೆ ವ್ಯಕ್ತವಾಗುತ್ತಿದೆ ಎಂದು ಸುದ್ದಿಗಾರರು ಪ್ರಸ್ತಾಪಿಸಿದಾಗ, ‘ಅವರಿಗೆ ಇನ್ನಷ್ಟು ಮನ್ನಣೆ ಸಿಗಬೇಕಿದೆ’ ಎಂದರು.

‘ಬೆಂಗಳೂರು ಅಂತರರಾಷ್ಟ್ರೀಯ ವಿಮಾನ ನಿಲ್ದಾಣಕ್ಕೆ ಮೇಲ್ಸೇತುವೆ, ಎಲೆಕ್ಟ್ರಾನಿಕ್‌ಸಿಟಿ ಮೇಲ್ಸೇತುವೆ, ನೆಲಮಂಗಲ ಮಲ್ಸೇತುವೆಗಳಿಗೆ ಅನುಮೋದನೆ ನೀಡಿದ್ದು ಮನಮೋಹನ ಸಿಂಗ್‌. ಅವರ ಹೆಸರು ಇಟ್ಟರೆ ತಪ್ಪೇನು’ ಎಂದು ಪ್ರಶ್ನಿಸಿದರು.

‘ದೇಶದ ಜನರಿಗೆ ಆಹಾರ ಭದ್ರತಾ ಕಾಯ್ದೆ, ನರೇಗಾ ಯೋಜನೆ, ಶಿಕ್ಷಣದ ಹಕ್ಕು, ಮಾಹಿತಿ ಹಕ್ಕು, ನಗರಾಭಿವೃದ್ಧಿ ಯೋಜನೆ, ಆಶಾ ಕಾರ್ಯಕ್ರಮ ಎಲ್ಲವನ್ನೂ ನೀಡಿದವರು ಅವರು. ತಾವು ಏನು ಮಾಡಿದ್ದೇವೆ ಎಂಬುದನ್ನು ಬಿಜೆಪಿಯವರು ರಾಜ್ಯದ ಜನರಿಗೆ ಹೇಳಲಿ’ ಎಂದರು.

ಬಜೆಟ್‌ ಕುರಿತು ವಿರೋಧ ಪಕ್ಷಗಳ ನಾಯಕರ ಟೀಕೆಯ ಬಗ್ಗೆ ಪ್ರಶ್ನಿಸಿದಾಗ, ‘ಎಲ್ಲ ರಾಜ್ಯಗಳಿಗೂ ಮಾದರಿಯಾಗುವಂತಹ ಬಜೆಟ್‌ ಅನ್ನು ಸಿದ್ದರಾಮಯ್ಯ ನೀಡಿದ್ದಾರೆ. ವಿರೋಧ ಪಕ್ಷದವರಿಗೆ ಹೇಳಲು ಏನೂ ಇಲ್ಲ. ಹೀಗಾಗಿ ಸುಳ್ಳು ಟೀಕೆ ಮಾಡುತ್ತಿದ್ದಾರೆ’ ಎಂದರು.

‘ಬೆಂಗಳೂರಿನಲ್ಲಿ ಡಬ್ಬಲ್‌ ಡೆಕ್ಕರ್‌ ಮೆಟ್ರೊ–ಮೇಲ್ಸೇತುವೆ, ರಾಜಕಾಲುವೆ ಇಕ್ಕೆಲದಲ್ಲಿ ರಸ್ತೆ, ಸುರಂಗ ಮಾರ್ಗ ನಿರ್ಮಿಸಲಿದ್ದೇವೆ. ಇದಕ್ಕಿಂತ ಇನ್ನೇನು ನೀಡಬೇಕು’ ಎಂದರು.