ಕೋವಿಡ್‌ ಹಿನ್ನೆಲೆ: ಮೌಂಟ್ ಎವರಸ್ಟ್ ಶಿಖರದಲ್ಲಿ ಪ್ರತ್ಯೇಕ ರೇಖೆಗೆ ಚೀನಾ ನಿರ್ಧಾರ
ಬೀಜಿಂಗ್‌: ಮೌಂಟ್ ಎವರೆಸ್ಟ್ ಶಿಖರವನ್ನು ನೇಪಾಳದ ದಿಕ್ಕಿನಿಂದ ಏರುವವರಿಂದ ಕೋವಿಡ್‌ ಸೋಂಕು ಹರಡದಂತೆ ತಡೆಯಲು, ಶಿಖರದ ತುದಿಯಲ್ಲಿ ಪ್ರತ್ಯೇಕ ವಿಭಜನಾ ರೇಖೆಯನ್ನು ರೂಪಿಸಲು ಚೀನಾ ನಿರ್ಧರಿಸಿದೆ ಎಂದು ಅಲ್ಲಿನ ಮಾಧ್ಯಮ ಸೋಮವಾರ ವರದಿ ಮಾಡಿದೆ.
ಶಿಖರಯಾತ್ರಿಗಳು ಚೀನಾದ ದಿಕ್ಕಿನಿಂದ ಈ ರೇಖೆ ದಾಟದಂತೆ ಗಮನಿಸಲು ಟಿಬೆಟನ್‌ ಶಿಖರಯಾತ್ರಿಗಳ ತಂಡವನ್ನು ರಚಿಸಲಾಗುತ್ತದೆ ಎಂದು ಚೀನಾದ ಕ್ಸಿನುಹಾ ನ್ಯೂಸ್‌ ಏಜೆನ್ಸಿ ವರದಿ ಮಾಡಿದೆ.
ಪ್ರತ್ಯೇಕತಾ ರೇಖೆಯನ್ನು ಹೇಗೆ ರೂಪಿಸಲಾಗುತ್ತದೆ ಎಂಬ ಬಗ್ಗೆ ತಕ್ಷಣಕ್ಕೆ ಸ್ಪಷ್ಟತೆ ಇಲ್ಲ. ಶಿಖರವನ್ನು ಉತ್ತರ ದಿಕ್ಕಿನಿಂದ ಅಂದರೆ ಚೀನಾ ಭಾಗದಿಂದ ಏರುವವರು ಈ ರೇಖೆ ದಾಟದಂತೆ ನಿರ್ಬಂಧಿಸಲಾಗುತ್ತದೆ. ಹಾಗೆಯೇ, ದಕ್ಷಿಣ ದಿಕ್ಕಿನಿಂದ ಶಿಖರ ಏರುವವರ ಸಂಪರ್ಕಕ್ಕೆ ಬಾರದಂತೆ ತಡೆಯಲಾಗುತ್ತದೆ ಎಂದು ಹೇಳಿದೆ.
ಈ ಬಗ್ಗೆ ನೇಪಾಳ ಸರ್ಕಾರ ಅಥವಾ ಸಂಬಂಧಿತ ಅಧಿಕಾರಿಗಳು ತಕ್ಷಣಕ್ಕೆ ಯಾವುದೇ ಪ್ರತಿಕ್ರಿಯೆ ನೀಡಿಲ್ಲ. ಸದ್ಯ, ಕೋವಿಡ್‌ ಪರಿಸ್ಥಿತಿ ಹಿನ್ನೆಲೆಯಲ್ಲಿ ಉಭಯ ದೇಶಗಳು ಮೌಂಟ್ ಎವರೆಸ್ಟ್ ಶಿಖರ ಏರುವುದಕ್ಕೆ ನಿರ್ಬಂಧ ಹೇರಿವೆ.
ತಾಜಾ ಸುದ್ದಿಗಾಗಿ ಪ್ರಜಾವಾಣಿ ಟೆಲಿಗ್ರಾಂ ಚಾನೆಲ್ ಸೇರಿಕೊಳ್ಳಿ | ಪ್ರಜಾವಾಣಿ ಆ್ಯಪ್ ಇಲ್ಲಿದೆ: ಆಂಡ್ರಾಯ್ಡ್ | ಐಒಎಸ್ | ನಮ್ಮ ಫೇಸ್‌ಬುಕ್ ಪುಟ ಫಾಲೋ ಮಾಡಿ.